Māḥleta Ṣəge (Canticle of the Flower)

ማስገቢያ፡
- በስመ፡ እግዚአብሔር፡ ሕያው፡ በልሳነ፡ ኵሉ፡ ዘኢይትነገር፨
- ወበስምኪ፡ ማርያም፡ ወላዲተ፡ ክርስቶስ፡ ክቡር፨
- ማሕሌተ፡ ጽጌ፡ ወጠንኩ፡ ለተኣምርኪ፡ በመዝሙር፨
- ድንግል፡ ማርያም፡ ንግሥተ፡ ሰማያት፡ ወምድር፨
- አምጣነ፡ ይጥዕም፡ ውዳሴኪ፡ እመዓር፡ ወሦከር፨
- ሰላም፡ ለዝክረ፡ ስምኪ፡ ሐመልማለ፡ ጽጌ፡ ገነት፨
- በአፈ፡ ነቢይ፡ ሙሴ፡ ወበአፈ፡ ንጉሥ፡ ዳዊት፨
- ሰአሊተ፡ ምሕረት፡ ማርያም፡ ለውሉደ፡ ኵሉ፡ ፍጥረት፨
- ኢሳይያስ፡ ዘነጸረኪ፡ በዐይነ፡ ልቡና፡ ትንቢት፨
- ተወከፊ፡ ማሕሌትየ፡ በኵሉ፡ ሰዓት፨

- ጽጌ፡ አስተርአየ፡ ሠሪፆ፡ እምዐጽሙ፨
- ለዘአምኃኪ፡ ጽጌ፡ ለገብርኤል፡ ምስለ፡ ሰላሙ፨
- ወበእንተዝ፡ ማርያም፡ ሶበ፡ ሐወዘኒ፡ መዐዛ፡ ጣዕሙ፨
- ለተኣምርኪ፡ አሐሊ፡ እሙ፨
- ማሕሌተ፡ ጽጌ፡ ዘይሰመይ፡ ስሙ፨
- ተኣምርኪ፡ ማርያም፡ አብቈለት፡ ዕፀ፡ ትእምርት፨
- ወአውፅአት፡ ጽጌ፡ በአፈ፡ ምዉት፨
- መሐርኪያ፡ ፍቅረ፡ ዚአኪ፡ ለአሐቲ፡ ብእሲት፨
- እንዘ፡ ትብሊ፡ ኢትጐጕዒ፡ አንብቦተ፡ ዛቲ፡ ጸሎት፨
- እስመ፡ ትኤድመኒ፡ ሊተ፡ እምኵሉ፡ ስብሐት፨
- ተኣምርኪ፡ ማርያም፡ ተሰብከ፡ በኦሪት፨
- አመ፡ ተሰነአውኪ፡ ጳጦስ፡ ምስለ፡ መለኮት፨
- ዘርእየኪ፡ ሙሴ፡ ሊቀ፡ ነቢያት፨
- ጸልልኒ፡ በአዕፁቅኪ፡ ሐመልሚል፡ ዕፀት፨
- ሦከ፡ ኃጢአትየ፡ ያውዒ፡ ጽጌኪ፡ እሳት፨
- ዘሰ፡ ይብል፡ ኣፈቅረኪ፡ ወኢያፈቅር፡ ተኣምረኪ፡ ክርስቲያናዊ፨
- ኢክርስቱን፡ ውእቱ፡ ፀረ፡ ወልድኪ፡ ማሕየዊ፨
- ወሠርፀ፡ እስጢፋ፡ ሐሳዊ፨
- አንሰ፡ እቤ፡ በማኅሌተ፡ ሰሎሞን፡ ወልደ፡ ሰንቃዊ፨
- አፈቅሮ፡ ለፍግዕኪ፡ ወለተ፡ ይሁዳ፡ ወሌዊ፨
- ከመ፡ መርዓቶ፡ ያፈቅር፡ ጽጌኪ፡ መርዓዊ፨
- አይኑ፡ ዘተገብረ፡ ፈውስ፨
- እንበለ፡ ትትወለዲ፡ ድንግል፡ እምቤተ፡ ክህነት፡ ወንግሥ፨
- መድኃኔ፡ ዓለም፡ ኮነ፡ ደመ፡ ጽጌኪ፡ ክርስቶስ፨
- እሰግድ፡ ለተኣምርኪ፡ በአብራከ፡ ሥጋ፡ ወነፍስ፨
- በከመ፡ ሰገደ፡ ለኪ፡ ዮሐንስ፡ በከርሥ፨
- ያኀዝነኒ፡ ማርያም፡ ዘረከበኪ፡ ድክትምና፨
- አመ፡ ቤተ፡ መቅደስ፡ ቦእኪ፡ እንዘ፡ ትጠብዊ፡ ሐሊበ፡ ሐና፨
- ወያስተፌሥሐኒ፡ ካዕበ፡ ትእምርተ፡ ልህቅትኪ፡ በቅድስና፨
- ምስለ፡ አብያጺሁ፡ ከመ፡ አብ፡ እንዘ፡ ይሴስየኪ፡ መና፨
- ፋኑኤል፡ ጽጌ፡ ነድ፡ ዘይከይድ፡ ደመና፨
- እግዚአብሔር፡ ነጸረ፡ ኵሎ፡ ዓለመ፨
- ወኢረከበ፡ ማርያም፡ ዘከማኪ፡ እመ፨
- ለሊሁሰ፡ ጽጌ፡ እማኅፀንኪ፡ ተቀስመ፨
- ዳዊትኒ፡ አመረኪ፡ እንዘ፡ ይብል፡ ቅድመ፨
- ስምዒ፡ ወለትየ፡ ወርእዪ፡ ዳግመ፨
- እስመ፡ ፈተወ፡ ንጉሥ፡ ሥነኪ፡ አዳመ፨
- እንዘ፡ ተሐቅፊዮ፡ ለሕፃንኪ፡ ጽጌ፡ ፀዓዳ፡ ወቀይሕ፨
- ውስተ፡ ቤተ፡ መቅደስ፡ ጌስኪ፡ በዕለተ፡ ተኣምር፡ ዘንጽሕ፨
- ንዒ፡ ርግብየ፡ ትናዝዝኒ፡ እምላሕ፨
- ወንዒ፡ ሠናይትየ፡ ምስለ፡ ገብርኤል፡ ፍሡሕ፨
- ወሚካኤል፡ ከማኪ፡ ርኅሩኅ፨
- መኑ፡ ጠቢብ፡ እንበለ፡ ጽጌኪ፡ ዘየአምር፡ ጥዩቀ፨
- ከዋክብተ፡ ሰማይ፡ ኈሊቆ፡ ወኆፃ፡ ባሕር፡ ድቁቀ፨
- ለውዳሴኪ፡ ማርያም፡ ከመ፡ ለበሓዊ፡ ዘጽሕቀ፨
- እስመ፡ ኢንክል፡ ፈጽሞ፡ ተኣምረኪ፡ ጥንቁቀ፨
- ናርምም፡ ስብሐተኪ፡ ነጊረነ፡ ሕቀ፨
- ስብሐት፡ ለኪ፡ ማርያም፡ በጽጌ፡ መላእክት፡ ትጉሃን፨
- ስብሐት፡ ለኪ፡ ማርያም፡ በጽጌ፡ ነቢያት፡ ቅዱሳን፨
- ስብሐት፡ ለኪ፡ ማርያም፡ በጽጌ፡ ሐዋርያት፡ ሰባክያን፨
- ስብሐት፡ ለኪ፡ ማርያም፡ በጽጌ፡ ሰማዕታት፡ ወጻድቃን፨
- ወስብሐት፡ ይደሉ፡ ለማሕሌተ፡ ጽጌኪ፡ ወይን፨
- እስመ፡ በጽጌኪ፡ ወይን፡ ይትፌሣሕ፡ ኅዙን፨

ተረፈ፡ መልክእ፡
- ሰላም፡ ለኪ፡ መንበረ፡ ፀሓይ፡ ሰማይ፡ ዘከዋክብት፡ አክሊላ፨
- ወምድርኒ፡ ሥርጉት፡ በጽጌ፡ ሔላ፨
- ማርያም፡ ዘመነ፡ ተድላ፨
- ሰላም፡ ለኪ፡ አመ፡ ይወፅእ፡ አዳም፡ እምሀገረ፡ ጽጌ፡ ገነት፨
- ዘአዕረገ፡ ብኪ፡ ዕጣነ፡ ጸሎት፨
- ማርያም፡ ሥነ፡ ሰንበልት፨
- ሰላም፡ ለኪ፡ ለለ፡ እብለኪ፡ ሰላመ፡ ከመ፡ ገብርኤል፡ መልአክ፨
- እምአፉየ፡ ጽጌ፡ ጊዜ፡ ነግህ፡ ወሰርክ፨
- ተመጠዊ፡ እመ፡ አምላክ፨
- ሰላም፡ ለኪ፡ ማርያም፡ ዳግመ፡ ተኣምረኪ፡ ክሥቲ፨
- እምድኅረ፡ ንዋምየ፡ ለመዋቲ፨
- ምስለ፡ ሰላምኪ፡ ፍሥሓ፡ ዘባቲ፨
- ያስተርኢ፡ ከመ፡ ጽጌ፡ ልሳንየ፡ ዛቲ፨

ማሕሌተ፡ ጽጌ፡ Māḥleta Ṣəge

Canticle of the Flower

Other Titles

Subject