Bibliography
Z
Fritsch, Emmanuel. “Une hymne eucharistique éthiopienne : le Malk’a Qwerbān ou «Portrait de l’Eucharistie».” Irénikon 75, no. 2–3 (2002): 195–228.
-
- በስመ፡ አብ፡ ወወልድ፡ ___ ___፨
- ወመንፈስ፡ ቅዱስ፡ አሐዱ፡ ጸጋ፨
- ሥርዓተ፡ ቍርባን፡ አንበረ፡ ለቤተ፡ ክርስቲያን፡ መልዕልተ፡ ሕጋ፨
- ይትዌለጡ፡ ወይከውኑ፡ እንበለ፡ ተፈልጦ፡ ወንትጋ፨
- ደመ፡ መለኮት፡ ነባቢ፡ ወሕያው፡ ሥጋ፨
-
- አኮ፡ አኮ፡ በከመ፡ ትርእይዎ፨
- አምሳለ፡ ምድራዊ፡ ኅብስት፨
- አላ፡ ውእቱ፡ እሳተ፡ መለኮት፨
- ዘያውዒ፡ በነበልባሉ፡ ኀጢአተ፡ ኵሉ፡ ፍጥረት፨
- ከመ፡ ሣዕረ፡ ገዳም፡ ያውዒ፡ ምድራዊ፡ እሳት፨
-
- ኦዘትትሜጦ፡ ለኅብስተ፡ ቍርባን፡ ዝንቱ፨
- ወትሰትዮ፡ ለወይን፡ እንተ፡ ምሉእ፡ ቅድሐቱ፨
- እመን፡ ወተአመን፡ ከመ፡ ሥጋ፡ ክርስቶስ፡ ውእቱ፨
- ወደሙ፡ ክቡር፡ እንተ፡ ተክዕወ፡ በሞቱ፨
- አኮ፡ አምሳል፡ ወምትሐት፡ ከንቱ፨
-
- ይወርድ፡ መንፈስ፡ ቅዱስ፡ ኀበ፡ ኅብስቱ፡ ወወይኑ፨
- ሶበ፡ ይብል፡ ካህን፡ ጸጋ፡ መንፈስ፡ ቅዱስ፡ ፈኑ፨
- በዛቲ፡ ቅድስት፡ ቤተ፡ ክርስቲያኑ፨
- ይዌልጦሙ፡ በቅጽበት፡ መሊሊተ፡ ክርስቶስ፡ ይኩኑ፨
- በኀይለ፡ ጥበቡ፡ መንክር፡ ወዕጹብ፡ ኪኑ፨
-
- ኣአምን፡ ወእትአመን፡ እስከ፡ ደኃራኢት፡ እስትንፋስ፨
- ከመ፡ ዝንቱ፡ ኅብስት፡ ሥጋ፡ ኢየሱስ፡ ክርስቶስ፨
- ወዝኒ፡ ጽዋዕ፡ ደመ፡ ገቦሁ፡ ቅዱስ፨
- ዘተገብረ፡ በቀራንዮ፡ ለሕይወተ፡ ኵሉ፡ ዘነፍስ፨
- ዘንሕነ፡ ንገበሮ፡ በሥርዓት፡ ሐዲስ፨
-
- ኦአኃው፡ ዕለታታ፡ ጾም፡ ቀድሱ፨
- እምኀውዘ፡ መብልዕ፡ ወመስቴ፡ እንዘ፡ ትትንሐሱ፨
- ነሢአ፡ ሥጋሁ፡ ለክርስቶስ፡ እመ፡ ተሐሥሡ፨
- ዘይትሜጦ?፡ እንዘ፡ ኢንጽሕት፡ ነፍሱ፨
- መቅሠፍተ፡ ወደይነ፡ ይነሥእ፡ ለርእሱ፨
-
- ከመ፡ እመቦ፡ እምኔነ፡ እንዘ፡ ኃጥእ፡ ተመጥወ፡ ቍርባን፡ መፍቅዱ፨
- መንገለ፡ ንስሓ፡ ጽሪት፡ እንበለ፡ ይትመየጥ፡ እምካህዱ፨
- ይመስል፡ ሕፃን፡ ጥባዌ፡ ሶበ፡ ትእዛዞ፡ እበዱ፨
- አፍሐመ፡ እሳት፡ ዘያውዒ፡ ነዱ፨
- ዘይፈቀድ፡ ይበላዕ፡ ወይግሥሥ፡ በእዱ፨
-
- ብላዒ፡ ውእቱ፡ ዘይበልዕ፡ እማፅያነ፨
- ወእሳት፡ ነዳዲ፡ ዘያውዒ፡ ኃጥኣነ፨
- ኅብስተ፡ ቍርባን፡ ዝንቱ፡ እስመ፡ ሥጋ፡ አምላክ፡ ኮነ፨
- ለጻድቃን፡ ባሕቱ፡ ይከውኖሙ፡ መድኅነ፨
- ከመ፡ ኢይርአዩ፡ ኰነኔ፡ ወደይነ፨
-
- እንበለ፡ ንስሓ፡ ኃጥእ፡ ተመጠወ፡ ቍርባነ፡ ለእመ፡ ጽሕቀ፨
- ይዌስክ፡ ደዌ፡ ኀጢአት፡ ጽፉቀ፨
- አኮኑ፡ ሕሙም፡ ድኅረ፡ ለሐይው፡ አልጸቀ፨
- እመጣልዕ፡ ዘአሕረምዎ፡ ለእመ፡ ተመጠወ፡ ሕቀ፨
- ሶቤሃ፡ ይመውት፡ ወይደዊ፡ ጥቀ፨
-
- አእምሩ፡ ወሕቱ፡ ነፍስክሙ፨
- እንዘ፡ ኀጢአት፡ አፍአዊ፡ ወጌጋየ፡ ውስጥ፡ ብክሙ፨
- ለኢየሱስ፡ ክርስቶስ፡ ከመ፡ ኢትድፍሩ፡ ጸወዖ፡ ስሙ፨
- ወበተሀብሎ፡ ኢትንሥኡ፡ ኅብስተ፡ ሥጋሁ፡ ወደሙ፨
- እስመ፡ እሳት፡ ውእቱ፡ ዘያውዒ፡ ፍሕሙ፨
-
- ኦዘትቀውም፡ ለሱታፌ፡ ምሥጢር፡ እንግዳ፨
- እንበለ፡ ንስሓፅሪት፡ ኅሊና፡ አምላክ፡ ዘይፈቅዳ፨
- እለኩ፡ ተዘከር፡ ተንሥኦተ፡ ሰይጣን፡ ላዕለ፡ ይሁዳ፨
- እምእደ፡ ክርስቶስ፡ ሶበ፡ ነሥአ፡ ኅብስተ፡ ቍርባን፡ ጸዐዳ፨
- እንዘ፡ ውስተ፡ ልቡ፡ ምሉእ፡ ኀጢአት፡ ወዕዳ፨
-
- ደመ፡ ጥብሐ፡ በግዕ፡ ሶበ፡ ነዝኀ፡ ራግዛተ፡ ቤቶሙ፡ ለአይሁድ፨
- አድኃኖሙ፡ ሙሴ፡ እምቀትለ፡ ግብጻዊ፡ ብድብድ፨
- ለነሰ፡ ሊቀ፡ ሠራዊትነ፡ ወልድ፨
- አድኅነነ፡ ወቤዝወነ፡ እሞተ፡ ኀጢአት፡ ፈድፉድ፨
- በንዝኀተ፡ ደሙ፡ ክቡር፡ ወአኮ፡ በባዕድ፨
-
- ደመ፡ አባግዒከ፡ እስራኤል፡ ሶበ፡ ኢኮነ፡ በቍዔተ፨
- በግዐ፡ አምላክ፡ ክርስቶስ፡ ተፈኖከ፡ እንተ፨
- ለአንጽሖ፡ ዚአነ፡ ትኩን፡ ቍርባነ፡ ፍጻሜ፡ ብሁተ፨
- እመ፡ ብከሰ፡ ኢንጻሕነ፡ ወኢረክበነ፡ ሰርየተ፨
- መነ፡ እምይእዜ፡ ንገብር፡ መሥዋዕተ፨
-
- ብሂለ፡ ቅዱሳት፡ ለቅዱሳን፡ እምአፈ፡ ካህን፡ ሶበ፡ ሰምዐ፨
- ወይ፡ ሎቱ፡ ለዘበድፍረት፡ በልዐ፨
- ሥጋ፡ አማኑኤል፡ ቃል፡ እማርያም፡ ዘነሥአ፨
- እመሰ፡ ተአዘዘ፡ ወእምነ፡ ቍርባን፡ ተከልአ፨
- ብፁዕ፡ ውእቱ፡ ዘይሰመይ፡ ረድአ፨
-
- ነጸረ፡ ላዕላነ፡ ወአውድቆ፡ ርእስነከመ፡ በድን፨
- ጸሎተ፡ ንስሓ፡ ላዕሌነ፡ ሶበ፡ ይጼሊ፡ ካህን፨
- ቍርባነ፡ ፍጻሜ፡ ክርስቶስ፡ ወመሥዋዕተ፡ ደኃራይ፡ ዘመን፨
- እንበለ፡ ሥጋከሰ፡ ወክዕወተ፡ ደምከ፡ ወይን፨
- አልቦ፡ መሥዋዕት፡ ወአልቦ፡ ቍርባን፨
-
- ኦክርስቶስ፡ መዝገበ፡ ፍሥሓ፡ ወኑዛዜ፨
- በሣህለ፡ ሕዝብከ፡ እግዚኦ፡ ትዝካረኒ፡ ማእዜ፨
- በእንተ፡ ሥጋከ፡ ስቁል፡ ወበእንተ፡ ደምከ፡ ነቅዐ፨
- ትከዜ፡ እመ፡ አንተሰ፡ ኀደገኒ፡ ውስተ፡ ግበ፡ እሙቅ፡ እንባዜ፨
- ለዓለመ፡ ዓለም፡ ወጺእ፡ አልብነ፡ እምይእዜ፨
-
- ኣአምን፡ ወእሰግድ፡ ለኅብስተ፡ ቍርባን፡ ቡርክ፨
- እስመ፡ ተወሀደ፡ ቦቱ፡ አመለኮተ፡ ክርስቶስ፡ አምላክ፨
- ለኅብስተ፡ ቍርባን፡ ዝንቱ፡ ዘኢይስግድ፡ በብርክ፨
- ውጉዘ፡ ይኩን፡ ወርጉመ፡ በልሳነ፡ ጳውሎስ፡ ላእክ፨
- እምብእሴ፡ ሥጋ፡ ውእቱ፡ ወሕያው፡ አምላክ፨
-
- ኢታሰተ፡ ማስልዎ፡ ለኅብስተ፡ ቍርባን፡ ኅብስተ፡ ሥርናይ፡ ዕራቆ፨
- በጊዜ፡ ቅዳሴ፡ ወጸሎት፡ እስመ፡ መለኮት፡ ይትላጸቆ፨
- አኮኑ፡ መቃርዮስ፡ ዕበየ፡ ቍርባን፡ ለአጠይቆ፨
- ድኅረ፡ ተመጠወ፡ በአሚን፡ እንበለ፡ ያእምር፡ ናፍቆ፨
- ስሳ፡ ዓመተ፡ ኢተፍአ፡ ምራቆ፨