Details
-
- በስመ፡ እግዚአብሔር፡ ሕያው፡ ዘእምቅድመ፡ ዓለም፡ መንግሥቱ፨
- እንዘ፡ በአካላት፡ ሥላስ፡ ወዋሕድ፡ በመለኮቱ፨
- ለዝ፡ አምላክ፡ ወለተ፡ ጴጥሮስ፡ አመቱ፨
- አርትዒ፡ ቃለ፡ አፉየ፡ እስመ፡ ድኩመ፡ ኀይል፡ ውእቱ፨
- ውዳሴ፡ መልክእኪ፡ እንብብ፡ ወእትናገር፡ ቦቱ፨
-
- ሰላም፡ ሰላም፡ ለዝክረ፡ ስምኪ፡ ሰላም፨
- እምአስካለ፡ ወይን፡ ጥዑም፨
- ወለተ፡ ጴጥሮስ፡ በጸጋ፡ ወላዲተ፡ ኵሉ፡ ዓለም፨
- እስመ፡ ይቤሉኪ፡ ካህናተ፡ የማን፡ ወፅግም፨
- ለባርኮቶሙ፡ ንዒ፡ እምልዑል፡ አርያም፨
-
- ሰላም፡ ለሥዕርትኪ፡ ወለርእስኪ፡ ዘተቀጸለ፨
- ዘትሩፋነ፡ ገድል፡ ጻድቃን፡ ወዘሰማዕታት፡ አክሊለ፨
- ወለተ፡ ጴጥሮስ፡ ዜናኪ፡ እምአርእስተ፡ አድባር፡ ተልዕለ፨
- ቦ፡ ጊዜ፡ ኀበ፡ መሀርኪ፡ ወንጌለ፨
- ወቦ፡ ጊዜ፡ ዘጾርኪ፡ መስቀለ፨
-
- ሰላም፡ ለገጽኪ፡ ዘተገልበበ፡ በግርማ፨
- ወለቀራንብትኪ፡ ኪሩብ፡ ዘመልዕልተ፡ አዕይንት፡ ተሰይማ፨
- ወለተ፡ ጴጥሮስ፡ እኅቶሙ፡ ለመላእክተ፡ ኀይል፡ ዘራማ፨
- ታስተበፅዐኪ፡ በአእጋረ፡ ኀሤት፡ ቀዊማ፨
- መቃብረ፡ ቅዱስ፡ ሥጋኪ፡ ደብረ፡ ፍቅር፡ ሬማ፨
-
- ሰላም፡ ለበድነ፡ ሥጋኪ፡ በማየ፡ ንስሓ፡ ሕጹብ፨
- ወለግንዘትኪ፡ ሰላም፡ በእደ፡ ኅሩያን፡ አርጋብ፨
- እኅተ፡ ደናግል፡ ኃምስ፡ ወለተ፡ ጴጥሮስ፡ ጠባብ፨
- ኢይትአጸው፡ በላዕሌኪ፡ ጽርሐ፡ ሰማያዊት፡ ከብካብ፨
- አመ፡ መርዓዊ፡ ይመጽእ፡ በስብሐት፡ ዕጹብ፨
-
- ሰላም፡ እብል፡ ዘዚአኪ፡ መቃብረ፨
- ቅድመ፡ ዕረፍትኪ፡ ይብጻሕ፡ ኀበ፡ እዴኪ፡ አመረ፨
- ለወለተ፡ ጴጥሮስ፡ አስቴር፡ ሃይማኖትኪ፡ ዘከብረ፨
- እንዘ፡ ሥርወ፡ ሰግላ፡ ይመልሕ፡ ወእንዘ፡ ያፈልስ፡ ደብረ፨
- ኵሉ፡ ዘርእየ፡ አንክሮ፡ አንከረ፨
-
- ፍዳ፡ አቅረብኩ፡ ሰላመ፡ ለመልክእኪ፡ ክቡር፨
- በዘአክሀለኒ፡ ሊተ፡ እግዚአብሔር፨
- ወለተ፡ ኦኤጥሮስ፡ እምየ፡ ዘወለድክኒ፡ በፍቅር፨
- አግዕዝኒ፡ በጸሎትኪ፡ እምቅኔ፡ ኃጢአት፡ ሙፋር፨
- እስመ፡ አግዕዞቶ፡ ትፈቅድ፡ እግዝእት፡ ለገብር፨