Details
-
- እትፌሣሕ፡ ማርያም፡ በልደትኪ፡ ወእሴፎ፡ ተስፋ፨
- በይነ፡ ዘወለድኪ፡ አምላከ፡ በድንግልና፡ በኢዘለፋ፨
- ወበሀልዎትኪ፡ ቅድመ፡ ዓለም፡ በኅሊና፡ አምላክ፡ አልፋ፨
- ሕይወትየ፡ በልደትኪ፡ አስተዳለወት፡ ምዕራፋ፨
- ከመ፡ ትርከብ፡ ቅድመ፡ ፀር፡ ኵለሄ፡ ሀገፋ፨
-
- ሰላም፡ ለልደትኪ፡ እምትካት፡ እንተቦ፡ ውዳሴ፨
- እስመ፡ ውሉደ፡ ኖኅ፡ አድኃነ፡ አምነ፡ ማየ፡ አይኅ፡ ድምሳሴ፨
- ክህነተ፡ መልከ፡ ጼዴቅ፡ ማርያም፡ ወክህነተ፡ አሮን፡ እኅወ፡ ሙሴ፨
- ሀብኒ፡ መና፡ አእምሮ፡ እሴሰይ፡ ዘለኪ፡ ቅዳሴ፨
- አምጣነ፡ ርኁብ፡ ከርሥየ፡ ዘኮነ፡ አባሴ፨
-
- ሰላም፡ ለዝክረ፡ ስምኪ፡ ለዘይጼውዖ፡ አዳም፨
- ለሥዕርተ፡ ርእስኪ፡ ካዕበ፡ ወለርእስኪ፡ ሰላም፨
- ማርያም፡ ንግሥት፡ ወለተ፡ ዳዊት፡ ሥዩም፨
- ዕቀብኒ፡ በልደትኪ፡ እምሕማመ፡ ሥጋ፡ ድኩም፨
- ካዕበኒ፡ እመዊት፡ ዳግም፨
-
- ሰላም፡ ለፍልሰተ፡ ሥጋኪ፡ እመካነ፡ ብካይ፡ ውስተ፡ ፍሥሓ፨
- በሣልስት፡ ዕለት፡ በየማነ፡ ወልድኪ፡ ዘተቶስሐ፨
- ትንበሪ፡ ዘልፈ፡ በሕገ፡ ትንሣኤ፡ ብሩሀ፨
- አንሥእኒ፡ በትንሣኤኪ፡ ለእንተ፡ ጌጋይየ፡ በዝኀ፨
- ማርያም፡ ንግሥትየ፡ ዘአጽፍኪ፡ ንጽሓ፨
-
- ሥነ፡ ልደትኪ፡ ማርያም፡ እፎ፡ ይሴኒ፡ እምኵሉ፨
- ሠናይ፡ በግብሩ፡ ወጥዑም፡ በቃሉ፨
- እስመ፡ በላዕሌሁ፡ ተክዕወ፡ ሞገሰ፡ ፈጣሪ፡ ዘላዕሉ፨
- ለማሕፀነ፡ እመኪ፡ ሐና፡ ስብሐት፡ ይደሉ፨
- በዓለ፡ ልደትኪ፡ ነቢያት፡ አቅዲሙ፡ አብዐሉ፨
-
- ተወክፊ፡ እግዝእትየ፡ ዘንተ፡ አምኃ፡ ወስብሐተ፨
- በይነ፡ ዘአቅረብኩ፡ ለኪ፡ እምዘተክህለኒ፡ ሊተ፨
- ዕንቈ፡ ወራውሬ፡ ማርያም፡ ዘተሐይዊ፡ ምዉተ፨
- ይበልኪ፡ አርእይኒ፡ ላህየ፡ ገጽኪ፡ ብርህተ፨
- እስመ፡ ኃጥእ፡ ኢይክል፡ ርእዮተ፨
-
- ስብሐት፡ ይደሉ፡ ለስምኪ፡ በሰጊድ፡ በኢግፍታዔ፨
- ወግናይ፡ ካዕበ፡ ለድንግልናኪ፡ ክልኤ፨
- ማርያም፡ ርኅርኅት፡ እንተ፡ አልብኪ፡ ምማዔ፨
- ክፍልኒ፡ ለገብርኪ፡ ቀዊመ፡ ቅድመ፡ ጊባኤ፨
- ምስለ፡ አግብርትኪ፡ ኅሩያን፡ ዘለክብር፡ ትንሣኤ፨
-
- ስብሐት፡ ለእግዚአብሔር፡ ለዘፈጠረ፡ ዓለማተ፨
- ወለዘገብረ፡ ዐበይተ፡ ብርሃናተ፨
- ወለዘአሠርገወ፡ ምድረ፡ ዘበበ፡ ፍሬሁ፡ ጽጌያተ፨
- ዕበይ፡ ወክብር፡ ለመስቀለ፡ ክርስቶስ፡ ዘብሕተ፨
- በዘቦቱ፡ ረከብነ፡ ኵልነ፡ ሕይወተ፨