Details
-
- ሰላም፡ ለዝክረ፡ ስምኪ፡ ዘሀሎ፡ ቅድመ፡ ዘመን፨
- በፈቃደ፡ አብ፡ ወወልድ፡ ወመንፈስ፡ ቅዱስ፡ በኪን፨
- ማርያም፡ ጽዮን፡ ማኅደረ፡ ወልድ፡ መድኅን፨
- ተንብሊ፡ ለነ፡ አሜሃ፡ አመ፡ ዕለተ፡ ፍዳ፡ ወደይን፨
- ይትቀጥቀጥ፡ ፀርነ፡ ወይጕየይ፡ ሰይጣን፨
-
- ሰላም፡ ለፍልሰተ፡ ሥጋኪ፡ ዘኤዶም፡ መሠረታ፨
- አመ፡ ሐዋርያት፡ መጽኡ፡ ለተቀብሎታ፨
- ወመላእክትኒ፡ አምጽኡ፡ አመ፡ ሰዓታ፨
- ማርያም፡ ጽዮን፡ እግዝእትየ፡ አእምሮ፡ ሥጋየ፡ ለሐተታ፨
- ተጽዕቀ፡ ወንዕሰ፡ በእንተ፡ ኩነታ፨
-
- በኵሉ፡ መልክእኪ፡ ዘተአመነ፡ በንጽሕና፨
- ወኵላ፡ ጸጋኪ፡ እንተ፡ ዘአፍቀረ፡ ሥና፨
- ኀጢአቶ፡ ደምስሲ፡ ወአበሳሁ፡ በጥዒና፨
- ዋካ፡ ማሕሌትየ፡ ጽዮን፡ በጊዜ፡ ረኀብ፡ መና፨
- ወሊተ፡ ኩኒ፡ ለነፍስየ፡ ፍና፨
-
- ስብሐት፡ ለኪ፡ ማርያም፡ ጽዮን፡ መጠነ፡ ኆፃ፡ ዘባህር፨
- ስብሐት፡ ለኪ፡ ማርያም፡ ጽዮን፡ መጠነ፡ ከዋክብት፡ ዘአየር፨
- ስብሐት፡ ለኪ፡ ማርያም፡ ጽዮን፡ መጠነ፡ ፍጥረታት፡ ዘክብር፨
- ስብሐት፡ ለኪ፡ ወርቀ፡ ሕይወትየ፡ መጠነ፡ ዕፀዋት፡ ወአዕዋፋተ፡ አድባር፨
- ስብሐት፡ ለኪ፡ መዐረ፡ አፉየ፡ መጠነ፡ አዕባን፡ ወሣዕር፨
-
- ስብሐት፡ ለኪ፡ ሮማነ፡ ነፍስየ፡ መጠነ፡ መላእክት፡ ዘኅብር፨
- ስብሐት፡ ለኪ፡ ዐረፍተ፡ ነፍስየ፡ መጠነ፡ ዓመታት፡ ዘወትር፨
- ስብሐት፡ ለኪ፡ ናዛዚተ፡ ልብየ፡ መጠነ፡ ፍጡራን፡ ወኢፍጡራነ፡ ነገር፨
- ለክብርኪ፡ ጽዮን፡ ዘመድኃኔ፡ ዓለም፡ ማኅደር፨
- ከመ፡ መላእክት፡ እዜምር፡ በሐዋዝ፡ መዝሙር፨