መልክአ፡ ይባርከነ፡ ክርስቶስ፡ ዘወገሪቆ፡
Malkəʾa Yǝbārkanna Krǝstos za-Wagariqo
Image of Yǝbārkanna Krǝstos of Wagariqo
-
- ሰላም፡ ለዝክረ፡ ስምከ፡ ዘይጥዕም፡ እምጸቃውዕ፨
- ወእምኔሁ፡ ይጽግቡ፡ ኢተክህሎሙ፡ ለሰብእ፨
- በስቅለ፡ አርሳንዮስ፡ ወርቅ፡ ይባርከነ፡ ክርስቶስ፡ ምሉእ፨
- ሠርዐከ፡ ዘተሐዩ፡ ሠራዔ፡ ቅዱሳን፡ እግዚእ፨
- ከመ፡ ባሕታዊ፡ አርሳንዮስ፡ በገዳም፡ ሥሩዕ፨
-
- ሰላም፡ ለመቃብሪከ፡ እስከ፡ ጊዜ፡ ምሕረት፡ ወሣህል፨
- ውስተ፡ ደብረ፡ ጽጌ፡ ገነቱ፡ ለተክለ፡ ሃይማኖት፡ ጥሉል፨
- ይባርከነ፡ ክርስቶስ፡ አምሳሉ፡ ለኖላዊነ፡ ኄር፡ በገድል፨
- ለይእቲ፡ መቃብሪከ፡ መካነ፡ ተአምር፡ ወኀይል፨
- ኀፁር፡ የዐውዳ፡ ወጽጌ፡ ረዳ፡ በትእምርተ፡ መስቀል፨
-
- አኰቴት፡ ለእግዚአብሔር፡ ቀዋለ፡ በረከት፡ ለስሙ፨
- አምጣነ፡ ኢረስአ፡ ብነ፡ ለተክለ፡ ሃይማኖት፡ ስብረተ፡ ዐፅሙ፨
- ወከፈለነ፡ ርትዕተ፡ ሃይማኖት፡ ኄራን፡ ኵሎሙ፨
- ወይእቲ፡ ሃይማኖትነ፡ እስከ፡ የሕልፍ፡ ዓለሙ፨
- ብሂለ፡ አምልኮ፡ ለወልድ፡ ወሰጊድ፡ ለእሙ፨
-
- ፍሬያተ፡ ሰላም፡ አቅረብኩ፡ መተንብለ፡ ሥርየት፡ ኃጥእ፨
- ይባርከነ፡ ክርስቶስ፡ ለከ፡ መይጠነ፡ ሰብዓቱ፡ አርባዕ፨
- በእንተ፡ ዝንቱ፡ ክፍለኒ፡ ሰላመ፡ ርጉዝ፡ በግዕ፨
- አውያተ፡ ልሳን፡ አመ፡ ይረክቦ፡ ለሰብእ፨
- ወምረረ፡ ብካይ፡ ይከውን፡ ዘአልቦ፡ ባቍዕ፨
-
- ሰላም፡ ለከ፡ ይባርከነ፡ ክርስቶስ፡ እምከርሥ፡ ዘቀደሰከ፡ አምላክ፨
- ወአስኬማ፡ መልአክ፡ ዘመጽአ፡ እምነ፡ ፈለክ፨
- ረሰየከ፡ ከመ፡ መልአክ፨
-
- ተዘከረነ፡ እንድርያስ፡ ተረፈ፡ ደቂቁ፡ ኄራን፨
- ለተክለ፡ ሃይማኖት፡ አቡነ፡ በዓለ፡ ኪዳን፨
- ዘወለደ፡ በበ፡ መካን፨
-
- ሰላም፡ ለክሙ፡ ይባርከነ፡ ክርስቶስ፡ እንድርያስ፡ ወኖላዊነ፡ ኄር፡ ሠለስቱ፨
- ሰአሉ፡ ለነ፡ ብዝኀ፡ ምሕረቱ፨
- ለአምላከ፡ ምሕረት፡ ክርስቶስ፡ ዲበ፡ ፍጥረቱ፨
- ዘረሰዮ፡ ይሠሀል፡ ቅኔቱ፨