Details
-
- በስመ፡ አብ፡ ወወልድ፡ ወመንፈስ፡ ቅዱስ፡ ዘለዓለም፡ ሥላሴ፨
- ናሁ፡ ወጠንኩ፡ ለዕበይከ፡ ውዳሴ፨
- ከመ፡ ትርድአኒ፡ ነዓ፡ ሳሙኤል፡ ነቅዐ፡ ቅዳሴ፨
- ሠናየ፡ ነግደ፡ ከዊነከ፡ ወኄረ፡ ፈላሴ፨
- እንዘ፡ አንበሳ፡ ትጼዐን፡ ወትከይድ፡ ከይሴ፨
-
- ሰላም፡ ለዝክረ፡ ስምከ፡ ዘይጥዕም፡ ወይሤኒ፨
- እምጣዕመ፡ መዐር፡ ወሶከር፡ ዘኢይትማሰሎ፡ ምንተኒ፨
- ፀሓየ፡ ደናግል፡ ሳሙኤል፡ አርእስተ፡ ከዋክብት፡ ዘትቀኒ፨
- ለሞገስከ፡ ከዳኒ፡ ወለስምከ፡ ሰፋኒ፨
- ይሰግድ፡ ብርክ፡ ወልሳን፡ ይገኒ፨
-
- ሰላም፡ ለመቃብሪከ፡ ከመ፡ ሕገ፡ አበው፡ ዘተቀብሩ፨
- ውስተ፡ ምድር፡ ቅድስት፡ ለእግዚአብሔር፡ ሕንጻ፡ ሀገሩ፨
- ሳሙኤል፡ ሥመር፡ ጊዜ፡ ስመከ፡ ዘከሩ፨
- በረከተ፡ አባ፡ አድኃኒ፡ ወተክለ፡ ሃይማኖት፡ መምህሩ፨
- ከመ፡ ላዕለ፡ ሕዝብከ፡ ይኅድር፡ በሠናይ፡ ይኅድሩ፨
-
- አኮ፡ በአንኆ፡ ወቃለ፡ ዝንጋዔ፡ አላ፡ በአኅፅሮ፨
- እንበይነ፡ ዘአቅረብኩ፡ ለከ፡ አምኃ፡ ማሕሌት፡ ወዘምሮ፨
- ሳሙኤል፡ ዐስብየ፡ ምስለ፡ እለ፡ ቴዎድሮስ፡ በአማኅብሮ፨
- ሀበኒ፡ ልብሰ፡ ብርሃን፡ ዘወልደ፡ ነጐድጓድ፡ ነጸሮ፨
- ወአክሊለ፡ ሕይወት፡ መጥወኒ፡ ዘእደ፡ ሰብእ፡ ኢገብሮ፨
-
- በከመ፡ ለሐወት፡ ሮምያ፡ በሞተ፡ ኦኤጥሮስ፡ ወጳውሊ፨
- ከማሁ፡ ለሐወት፡ ገዳመ፡ ዋሊ፨
- በሞተ፡ ሳሙኤል፡ አቡነ፡ ዘለነፍሰ፡ ኵሉ፡ ይጼሊ፨
- ከመ፡ አንቂጦስ፡ ተጋዳሊ፡ ዓለመ፡ ዘኢይሄሊ፨
- ኀበ፡ አምላኩ፡ በእንቲአነ፡ ይጸሊ፨