Details
-
- ኦክርስቶስ፡ ናዝራዊ፡ ዘተወከፍከ፡ ሕማመ፨
- ፀሓይ፡ ብሩህ፡ ወጽዱል፡ አመ፡ ሱራሬሁ፡ አጽለመ፨
- መጽሐፈ፡ ዜናሁ፡ ለሳሙኤል፡ መንፈሳዊ፡ ወዘመልክኡ፡ ሰላመ፨
- ጸሐፍ፡ ውስተ፡ ልብየ፡ እንዘ፡ ትገብር፡ ቀለመ፨
- ደመከ፡ አምላካዊ፡ በመስቀል፡ ዘዘንመ፨
-
- ሰላም፡ ለዝክረ፡ ስምከ፡ ሳሙኤል፡ ብርሃን፨
- ዘፍካሬሁ፡ ተብህለ፡ ጽጌ፡ አበሞ፡ አማን፨
- ለዝስምከ፡ ነጋሢ፡ ዘኢየዐርቆ፡ ሥልጣን፨
- ሶበ፡ ይጼውዖ፡ ልሳንየ፡ ውስተ፡ ገጸ፡ ኵሉመካን፨
- ይደንግፅ፡ ሞት፡ ወይጕየይ፡ ሰይጣን፨
-
- ሰላም፡ ለበድነ፡ ሥጋከ፡ በገዳመ፡ ዋሊ፡ ዘተበፅአ፨
- ቢጸ፡ ኤልያስ፡ አንተ፡ ለሕገ፡ አምላክ፡ ዘቀንዐ፨
- መምህረ፡ መምህራን፡ ሳሙኤል፡ እንተ፡ ታጸድቅ፡ ኃጥአ፨
- ጌጋይየ፡ ስረይ፡ ለአባሲ፡ ከመ፡ መምህርከ፡ ሠርዐ፨
- ወኅድግ፡ አበሳየ፡ በበ፡ ስብዕ፡ ስብዐ፨
-
- በስሙ፡ ለመንፈስ፡ ቅዱስ፡ ሰላም፡ ሰላም፨
- ለሥነ፡ ቆምኪ፡ አዳም፨
- አመተ፡ ማርያም፡ ገነት፡ ዘመዐዛኪ፡ ጥዑም፨
- ይትከዐው፡ ውስተ፡ አፉየ፡ ሐሊበ፡ አጥባትኪ፡ ዮም፨
- ከመ፡ እምደመና፡ ይትከዐው፡ ወይወርድ፡ ዝናም፨
-
- ሰላም፡ እብሎን፡ ለመልክእኪ፡ አርብዓ፡ ወሠለስቱ፨
- ዓዲ፡ ሰላም፡ ለጠባይዕኪ፡ አርባዕቱ፨
- አመተ፡ ማርያም፡ ቅድስት፡ ለሳሙኤል፡ ወላዲቱ፨
- ሰአሊዮ፡ በእንቲአየ፡ ከመ፡ ኢይጥፋእ፡ በከንቱ፨
- ለእግዚአብሔር፡ አምላከ፡ ጽድቅ፡ ዘብዙኅ፡ ምሕረቱ፨
-
- ድርሳነ፡ መልክኡ፡ ለሳሙኤል፡ ወአቡሁ፡ ወአመተ፡ ማርያም፡ አባሉ፨
- ናሁ፡ ጸሐፍኩ፡ እንዘ፡ አስተዋጽእ፡ እምነ፡ ገድሉ፨
- ባርኪ፡ ሊተ፡ ማርያም፡ እግዝእተ፡ ኵሉ፨
- ዘባረኪ፡ በዲበ፡ ምድር፡ ቡሩክ፡ ውእቱ፡ በላዕሉ፨
- ወዘቀደስኪ፡ ለዓለም፡ ይሄሉ፨