Details
-
- ሰላም፡ ለምጽአትክሙ፡ በመንግሥተ፡ አብርሃ፡ ወአጽብሃ፨
- ወለጉባኤክሙ፡ ሰላም፡ ዘምስለ፡ ብዙኅ፡ አምኃ፨
- አእላፈ፡ ጻድቃን፡ እለ፡ ተሠርገውክሙ፡ ንጽሐ፨
- ጸልዩ፡ በእንቲአየ፡ እስመ፡ ኃጢአትየ፡ በዝኀ፨
- ከመ፡ ይምሐረኒ፡ አምላክክሙ፡ ሰማየ፡ ዘሰፍሐ፨
-
- ሰላም፡ ለዝክረ፡ ስምክሙ፡ ዘኃንባር፡ ጉድባ፡ ጻድቃን፨
- ወለኅንብርትክሙ፡ ሰላም፡ በዐጸደ፡ ዛቲ፡ መካን፨
- አእላፍ፡ አንትሙ፡ አርአያ፡ አእላፍ፡ ኄራን፨
- ጸልዩ፡ በእንቲአየ፡ ለለ፡ ሠርቀ፡ ኵሉ፡ ዘመን፨
- ከመ፡ ያድኅነኒ፡ እመንሱት፡ ለብእሲ፡ ምኑን፨
-
- ሰላም፡ ለመልክእክሙ፡ ዘተኀርየ፡ እምዕንቈ፡ ሶም፨
- ወእምሠርጐ፡ ኵሉ፡ ዓለም፨
- እስእለክሙ፡ ጻድቃን፡ በኀይለ፡ ኢየሱስ፡ ግሩም፨
- ከመ፡ ትጸግዉኒ፡ መጠነ፡ ሰብዓ፡ አክራም፨
- አምጣነ፡ ምኑን፡ አነ፡ ወብእሲ፡ ድኩም፨
-
- ተወከፉ፡ አኃውየ፡ ዘንተ፡ ስብሐተ፡ ወውዳሴ፨
- አርአያ፡ ክርስቶስ፡ ተወክፈ፡ መሥዋዕተ፡ አሮን፡ ወሙሴ፨
- ዘትጸውሩ፡ ጻድቃን፡ አስማተ፡ ቅድስት፡ ሥላሴ፨
- ከመ፡ ትባልሑ፡ ኃጥእ፡ ብእሴ፨
- ወታድኅኑ፡ እመንሱት፡ ወብዙኅ፡ ድምሳሴ፨
-
- ይባረክ፡ አብ፡ በአፈ፡ ኵሉ፡ ነፍስ፨
- ወይትባረክ፡ ወልድ፡ እስከ፡ ቀላያት፡ ወየብስ፨
- መንፈስ፡ ቅዱስ፡ ይትባረክ፡ ሕይወተ፡ ሥዹስ፡ ቅዱስ፨
- ዘነበብክሙ፡ ምሴተ፡ በነገር፡ ሐዲስ፨
- እንዘ፡ ኃጥእ፡ አነ፡ ወብእሲ፡ ዕቡስ፨