Details
-
- በስመ፡ እግዚአብሔር፡ ንጉሥ፡ በአፈ፡ ኵሉ፡ ዘተቀደሰ፨
- በዕበየ፡ ስብሐት፡ ዘለብሰ፨
- ዘጺዖተ፡ መና፡ ጻድቃን፡ ባርኩኒ፡ ሥልሰ፨
- ከመ፡ እንብብ፡ በበ፡ ጾታሁ፡ መልክአክሙ፡ ውዱሰ፨
- ወውስተ፡ አፉየ፡ ደዩ፡ ነገረ፡ ሐዲሰ፨
-
- ሰላም፡ ለዝክረ፡ ስምክሙ፡ ዘተጽሕፈ፡ ሆህያቲሁ፨
- በሰሌዳ፡ ሰማይ፡ ብሩህ፡ ምስለ፡ ሥዕርትክሙ፡ በበ፡ ጾታሁ፨
- ዘጺዖተ፡ መና፡ ጻድቃን፡ ለእግዚአብሔር፡ ኅሩያኒሁ፨
- ሰአሉ፡ በእንቲአነ፡ ወአስተምሕሩ፡ ኀቤሁ፨
- ከመ፡ በትፍሥሕት፡ ንብጻሕ፡ ወንቁም፡ ቅድሜሁ፨
-
- ሰላም፡ ለልሳንክሙ፡ ወለቃልክሙ፡ አእኳቲ፨
- ዕበያተ፡ ግብሩ፡ ዕፁብ፡ ለክርስቶስ፡ ክብረ፡ መዋቲ፨
- ዘጺዖተ፡ መና፡ ጻድቃን፡ አእላፈ፡ ከኒሳ፡ አሐቲ፨
- ኀበ፡ ኢይክሉ፡ ቀሪቦታ፡ ሠራዊተ፡ ሰይጣን፡ መስሐቲ፨
- እስመ፡ ላዕለ፡ ደብር፡ ተሐንፀት፡ ይእቲ፨
-
- ሰላም፡ ለመከየድክሙ፡ ምስለ፡ አጻብዒክሙ፡ ቅዱሳት፨
- ለአጽፋሪሆን፡ ዓዲ፡ ዘኢረከቦን፡ ዕቅፍት፨
- ዘጺዖተ፡ መና፡ ጻድቃን፡ አኃወ፡ ኅሩያን፡ ሰማዕት፨
- ጸዊሮሙ፡ በመታክፍት፡ መስቀለ፡ ወልደ፡ አብ፡ ሕይወት፨
- እለ፡ ጌሡ፡ ለመጥቆ፡ ነፍሶሙ፡ ለሞት፨
-
- ሰላም፡ ለመቃብሪክሙ፡ ዘኮነተክሙ፡ ዝኅረ፨
- ጾማዕተ፡ ዕብን፡ ፌማ፡ እስመ፡ ላዕሌሃ፡ ኀደረ፨
- ዘፈለገ፡ መና፡ ጻድቃን፡ ሰአሉ፡ ወትረ፨
- ትንሣኤ፡ ሥጋ፡ አመ፡ ይከውን፡ ድኅረ፨
- ከመ፡ ቅድመ፡ አምላክ፡ ንረስ፡ ሐዳሰ፡ ሀገረ፨
-
- በአስተሐምሞ፡ ወጻህቅ፡ ናሁ፡ ነበብኩ፨
- ውዳሴ፡ መልክእክሙ፡ ዘንተ፡ እስመ፡ እምኵሉ፡ አፍቀርኩ፨
- ማኅበረ፡ ጻድቃን፡ ኄራን፡ በጸጋክሙ፡ ዝኩ፨
- ዐስበ፡ ማሕሌትየ፡ ለገብርክሙ፡ ባርኩ፨
- ከመ፡ ኢይክሀል፡ ጠስዮትየ፡ ለዓለም፡ መልአኩ፨