Details
-
- ህላዌ፡ ዚአከ፡ ጰራቅሊጦስ፡ መንክር፡ ወመድምም፨
- እምቅድመ፡ ዓለም፡ ቅድመ፡ ወእምጥንተ፡ ዓለም፡ እስከ፡ ዮም፨
- እምዮም፡ ዓዲ፡ እስከ፡ ዘዝዓለም፡ ተፍጻም፨።
- እምተፍጻመ፡ ዓለም፡ ድኅረ፡ ለዓለመ፡ ዓለም፡ ግሩም፨
- ወዕጹብ፡ አምላኪየ፡ እስከ፡ ድኅር፡ እምቅድም፨
-
- ሰላም፡ ለዝክረ፡ ስምከ፡ በዝክረ፡ ስመ፡ አብ፡ ቅዱስ፨
- ወበዝክረ፡ ስሙ፡ ለወልድ፡ ስቡሕ፡ ወውዱስ፨
- አምላከ፡ ስብሐት፡ አንተ፡ ለዓለመ፡ ዓለም፡ ጰራቅሊጦስ፨
- ሕጽበኒ፡ ወአንጽሐኒ፡ እምነውረ፡ ኀጢአት፡ ወደነስ፨
- ወጽሑደ፡ ረስየኒ፡ በሥጋ፡ ወነፍስ፨
-
- ሰላም፡ ለመልክእከ፡ መልክአ፡ ቅዳሴ፡ ትሩፍ፨
- ከመ፡ መልክአ፡ አብ፡ ረቂቅ፡ ወመልክአ፡ ወልድ፡ ግዙፍ፨
- እንዘ፡ በአካላት፡ ትሤለስ፡ ምስለ፡ እሉ፡ እስመ፡ በመለኮት፡ ትሳተፍ፨
- ናዝዘኒ፡ በምጽአትከ፡ እምጽርሐ፡ አርያም፡ ምዕራፍ፨
- ጰራቅሊጦስ፡ አምላኪየ፡ መናዝዝ፡ ዖፍ፨
-
- ለስቴ፡ ወይን፡ ጽድቅ፡ ክፍለኒ፡ ጰራቅሊጦስ፡ ወመብልዐ፡ ኅብስት፡ ጵርስፎራ፨
- ወአመ፡ ጊዜ፡ ሞት፡ በጽሐኒ፡ በጼና፡ ምዑዝ፡ ነከራ፨
- ምስጣ፡ ለነፍስየ፡ ውስተ፡ ኤዶማዊት፡ ደብተራ፨
- ወሰውረኒ፡ እምዐይነ፡ ሞት፡ ወለጸአተ፡ ነፍስ፡ እምጻዕራ፨
- በከመ፡ ሰወርኮሙ፡ ቅድመ፡ ለሄኖክ፡ ወዕዝራ፨