Bibliography
Z
ታየ ገብረ ማርያም. መልክአ፡ ኢየሱስ፡ ምስለ፡ ምክሐ፡ ምእመናን።. አሥመራ: ማኅበረ ክርስቲያን, ፲፰፻፺፬ ዓ/ም.
-
- ኣአምን፡ ኅቡረ፡ በስመ፡ ሥላሴ፡ አጋእዝት፨
- እለ፡ ሀለዉ፡ በቅድምና፡ ወበአሐቲ፡ መለኮት፨
- እምቅድመ፡ ይትፈጠር፡ ዓለም፡ ወኵሎሙ፡ መላእክት፨
- ወእምዝ፡ እዌጥን፡ ድርሳነ፡ ለዘተወልደ፡ እምብእሲት፨
- ቃለ፡ አቡ፡ አሐዱ፡ እምነ፡ ሠለስቱ፡ አካላት፨
-
- ሰላም፡ ለህላዌከ፡ እምቅድመ፡ ዓለማት፡ ዘሀሎ፨
- ምስለ፡ አቡከ፡ ደርገ፡ ወምስለ፡ መንፈስከ፡ በተልዕሎ፨
- ኢየሱስ፡ ቃለ፡ አብ፡ ወአምላከ፡ ሳሙኤል፡ ዘደብረ፡ ሴሎ፨
- አስተርእየኒ፡ ከማሁ፡ ወባልሐኒ፡ እምተሀጕሎ፨
- እስመ፡ አንተ፡ ኖላዊ፡ ዘተዐቅብ፡ ኵሎ፨
-
- ሰላም፡ ለግዝረትከ፡ ከመ፡ ተነግረ፡ በኦሪት፨
- እምልደትከ፡ በሥጋ፡ በሰሙን፡ ዕለት፨
- ኢየሱስ፡ መድኅን፡ አበ፡ ምእመናን፡ ዘበጥምቀት፨
- ምስለ፡ አቡከ፡ መሓሪ፡ እንተ፡ አሐቲ፡ ሥምረት፨
- ወምስለ፡ መንፈስከ፡ ማሕየዊ፡ ዘለከ፡ መንግሥት፨
-
- ሰላም፡ ለዝክረ፡ ስምከ፡ ስመ፡ መድኃኒት፡ ሥሙር፨
- ስም፡ ልዑል፡ ወስም፡ ክቡር፨
- ኢየኡስ፡ ክርስቶስ፡ እግዚአ፡ ሰማያት፡ ወምድር፨
- አንጽሐኒ፡ በሥምረትከ፡ እምነ፡ አበሳ፡ ወነውር፨
- ዘትሰሪ፡ ኵሎ፡ እስመ፡ አንተ፡ ኄር፨
-
- ሰላም፡ ለመልክእከ፡ አምሳለ፡ ክበቡ፡ ከመ፡ ወርኅ፨
- ለዘይሬእዮ፡ አዳም፡ ወጥቀ፡ ፍሡሕ፨
- ኢየሱስ፡ ክርስቶስ፡ በውስተ፡ ቅዱሳን፡ ስቡሕ፨
- አድኅነኒ፡ እግዚኦ፡ እምነ፡ መከራ፡ ብዙኅ፨
- እስመ፡ አነ፡ ኃጥእ፡ ወአንተ፡ ርኅሩኅ፨
-
- ሰላም፡ ለፈንዎትከ፡ በአምሳለ፡ ነፋስ፡ ወእሳት፨
- ጰራቅሊጦስሃ፡ ናዛዜ፡ ወቀዳሴ፡ ኵሉ፡ ፍጥረት፨
- ኢየሱስ፡ ክርስቶስ፡ አምላከ፡ ነቢያት፡ ወሐዋርያት፨
- ሀበኒ፡ መንፈሰከ፡ ያንጽሐኒ፡ እምኀጢአት፨
- ወዓዲ፡ ይምርሐኒ፡ በሠናይ፡ ፍኖት፨
-
- ሰላም፡ ለፍትሕከ፡ ማእከለ፡ ጻድቃን፡ ወኃጥኣን፨
- እንዘ፡ ኢትኤምጽ፡ ምንተ፡ ከመ፡ ነገሥተ፡ ምድር፡ ባዕዳን፨
- ኢየሱስ፡ ክርስቶስ፡ ተስፋ፡ ግፉዓን፨
- አቅመኒ፡ እግዚኦ፡ ጊዜ፡ ፍትሕከ፡ በየማን፨
- እስመ፡ አንተ፡ ፈታሒ፡ በኵሉ፡ አዝማን፨
- ተረፈ፡ መልክእ፡
-
- ስብሐት፡ ለከ፡ ፈጣሪየ፡ በምልዐ፡ ኵሉ፡ አባልየ፨
- ስብሐት፡ ለከ፡ አምላኪየ፡ በምልዐ፡ ኵሉ፡ አእምሮትየ፨
- ስብሐት፡ ለከ፡ ንጉሥየ፡ በምልዐ፡ ኵሉ፡ ልብየ፨
- ስብሐት፡ ለከ፡ መድኃኒትየ፡ በምልዐ፡ ኵሉ፡ ፈቃድየ፨
- ስብሐት፡ ለከ፡ መንጽሔ፡ ኀጢአትየ፡ ዘደመ፡ ዚአከ፡ ሕይወትየ፨
-
- ስብሐት፡ ለከ፡ እግዚኦ፡ ዘበሰማያት፡ አቡነ፨
- ወበስምከ፡ ቅዱስ፡ ቀድሶ፡ ለሰምነ፨
- ወጊዜ፡ ምጽአትከ፡ ግሩም፡ መንገለ፡ የማን፡ አቅመነ፨
- ወከመ፡ ንግበር፡ ፈቃደከ፡ ኀይለ፡ ዚአከ፡ ሀበነ፨
- ወሲሳየነ፡ ዘዕለት፡ ወእንተ፡ ለዓለም፡ ምግበነ፨
-
- ስረይ፡ ለነ፡ እግዚኦ፡ ወኵለንታነ፡ ሐድስ፨
- እንዘ፡ ኢትሌሊ፡ ምሕረተከ፡ እምዐቢይ፡ ወንኡስ፨
- ወአድኅነነ፡ ዓዲ፡ እመከራ፡ ሥጋ፡ ወነፍስ፨
- ምስለ፡ አኃውየ፡ ወአኃትየ፡ ዘመንፈስ፡ ቅዱስ፨
- ሊተ፡ ለገብርከ፡ እገሌ፡ ጽኑስ፨