መልክአ፡ መብዐ፡ ጽዮን፡
Malkəʾa Mabʿa Ṣəyon
Image of Mabʿa Ṣəyon
-
- በስመ፡ እግዚአብሔር፡ ስቡሕ፡ ዘተሰብሐ፡ እምቅድም፨
- በአፈ፡ መላእክት፡ ወሰብእ፡ ለገቢረ፡ ኵሉ፡ ዓለም፨
- ድርሳነ፡ መልክእከ፡ እንብብ፡ ተክለ፡ ማርያም፡ ፍጹም፨
- አስትየኒ፡ ወይነ፡ ጥበብ፡ በአርአያ፡ እሳት፡ ወፍሕም፨
- በከመ፡ አስተዮ፡ ለዕዝራ፡ ኡራኤል፡ ሥዩም፨
-
- ሰላም፡ ለዝክረ፡ ስምከ፡ ዘተጸውዐ፡ በዝክረ፡ ስማ፨
- ለድንግለ፡ ሙሴ፡ ነቢይ፡ ዘትሰመይ፡ ካልእተ፡ ራማ፨
- ተክለ፡ ማርያም፡ እንጦንስ፡ ወመቃርስ፡ መፍቀሬ፡ ጻማ፨
- አድኅነኒ፡ በረድኤትከ፡ እምእደ፡ ፀራዊ፡ መስቴማ፨
- ከመ፡ አምላከ፡ ጽድቅ፡ ይፈትሕ፡ በዐቢይ፡ ግርማ፨
-
- ሰላም፡ ለፀአተ፡ ነፍስከ፡ ለእግዚአብሔር፡ በፈቃዱ፨
- ወለበድነ፡ ሥጋከ፡ ህልው፡ ለደብረ፡ ማርያም፡ ውስተ፡ ዐጸዳ፨
- ተክለ፡ ማርያም፡ አቡነ፡ ፍትወ፡ ምግባር፡ ዘእምናርዱ፨
- ባርከነ፡ አምሳለ፡ ኖኅ፡ በበረከተ፡ ሤም፡ አሐዱ፨
- ከመ፡ ባረኮ፡ አብርሃም፡ ለይስሐቅ፡ ወልዱ፨
-
- ሰላም፡ ለግንዘተ፡ ሥጋከ፡ በድምፀ፡ ከበሮ፡ ወበብኅንዛ፨
- ወለመቃብሪከ፡ ሰላም፡ መልአከ፡ ሰማይ፡ ዘይናዝዛ፨
- ተክለ፡ ማርያም፡ ያዕቆብ፡ ሰዋስው፡ ዘምድረ፡ ሎዛ፨
- ሥጋከ፡ ትዕርግ፡ እምጻማሃ፡ አመ፡ ፈጣሪሃ፡ አዘዛ፨
- ህየንተ፡ አምኃ፡ ናርዶስ፡ ወሀበ፡ መዐዛ፨
-
- ሰላም፡ ለተፅዕኖትከ፡ በፈረሰ፡ መንፈስ፡ ጸዐዳ፨
- ምስለ፡ ዘርአ፡ ያዕቆብ፡ ንጉሥ፡ ዘሠረጸ፡ እምቤተ፡ ይሁዳ፨
- ተክለ፡ ማርያም፡ ፍትው፡ ወምዑዝ፡ እምጽጌ፡ ረዳ፨
- ጸሐፈኒ፡ ከመ፡ ቀለም፡ ውስተ፡ ልብከ፡ ሰሌዳ፨
- ወበለኒ፡ ጊዜ፡ ሞትየ፡ ዘአነ፡ እንግዳ፨
-
- ይትባረክ፡ መድኃኔ፡ ዓለም፡ በጽንዐ፡ ሕያው፡ ጥበቡ፨
- ድርሳነ፡ መልክእከ፡ እንብብ፡ ረሰየኒ፡ ማእከለ፡ ሕዝቡ፨
- ተክለ፡ ማርያም፡ አቡየ፡ ለክርስቶስ፡ ወርኀ፡ ምግቡ፨
- ጸግወኒ፡ በቅድመ፡ ድርሳን፡ ለኁላቌከ፡ ዐሳቡ፨
- እስመ፡ መንፈስ፡ ቅዱስ፡ ኅቡእ፡ ዘእምኅቡእ፡ መዝገቡ፨
Other Titles
-
ሁለተኛ፡ መልክአ፡ ተክለ፡ ማርያም፡ ዘይሰመይ፡ መብዐ፡ ጽዮን፡
Hulataññā Malkəʾa Takla Māryām za-Yəsammay Mabʿa Ṣəyon
Second Image of Takla Māryām, Named Mabʿa Ṣəyon