Details
- ማስገቢያ፡
-
- ያሬድ፡ ማሕሌታይ፡ ለእግዚአብሔር፡ ካህኑ፨
- ስብሐተ፡ ትንሣኤ፡ ዘይዜኑ፨
- ኦሪት፡ ቶታኑ፡ ወወንጌል፡ አሣዕኑ፨
- ትርድአነ፡ ነዓ፡ በህየ፡ መካኑ፨
- ከመ፡ ጸበል፡ ግሁሳነ፡ ፀርነ፡ ይኩኑ፨
-
- ሰላም፡ ለዝክረ፡ ስምከ፡ ዘተጸውዖቱ፡ መዐር፨
- ወለሥዕርትከ፡ ጽዕድው፡ ከመ፡ ዘጌዴዎን፡ ፀምር፨
- ማሕሌታይ፡ ያሬድ፡ ወነባቤ፡ ሐዋዝ፡ መዝሙር፨
- እመ፡ ኮነ፡ ብርአ፡ ሊባኖስ፡ ወቀለመ፡ ባሕር፨
- እምኢኀልቀ፡ በተጽሕፎ፡ ዘዚአከ፡ ክብር፨
-
- ሰላም፡ ለግንዘተ፡ ሥጋከ፡ ዘኢተኬነዋ፡ መዋቲ፨
- ወለመቃብሪከ፡ ኅብእት፡ ዘኢረከባ፡ ሐታቲ፨
- መቃብረ፡ ሥጋከ፡ ያሬድ፡ መካነ፡ በረድ፡ ይእቲ፨
- እግዚአብሔር፡ ንጉሥ፡ ኰናኔ፡ ዓለማት፡ ክልኤቲ፨
- እስመ፡ ይቤለከ፡ ምዕራፍከ፡ ዛቲ፨
-
- መዝሙረ፡ ማሕሌት፡ ሐዋዝ፡ ዘመዋዕለ፡ ክረምት፡ ወሐጋይ፨
- ዘመፀው፡ ወዘፀደይ፨
- ዘሠራዕከ፡ ያሬድ፡ ካህነ፡ ዝማሬ፡ ሠናይ፨
- ሰላምየ፡ ድሉ፡ እግዚኦ፡ መካልየ፡ ልዑል፡ ሰማይ፨
- አኮ፡ ዘወርቅ፡ ወብሩር፡ ጽሩይ፨
-
- መዝሙረ፡ አምላክ፡ ሕያው፡ ወዘወላዲቱ፡ ቡርክት፨
- ወዘትጉሃን፡ መላእክት፨
- ዘነቢያት፡ ወሐዋርያት፡ ዘጻድቃን፡ ወሰማዕት፨
- ዘደናግል፡ ወመነኮሳት፡ ዘካህናት፡ ወዲያቆናት፨
- ዘነበብከ፡ ወጸሐፍከ፡ ጸውዖተ፡ ስምከ፡ ይኩነኒ፡ ማሕየዌ፡ እሞት፨