Details
-
- ናሁ፡ ወጠንኩ፡ ለመልክእከ፡ ውዳሴሁ፨፨
- እንዘ፡ አስተዋድድ፡ በበ፡ ጾታሁ፨
- ተንሥአ፡ መድኅን፡ ጻድቅ፡ ተራድአኒ፡ ለለ፡ ጊዜሁ፨
- ከመ፡ ዘይረድኦ፡ ዐርክ፡ ጊዜ፡ መከራሁ፨
- እስመ፡ አጽአቀኒ፡ ሊተ፡ ለዓለም፡ ሥራሁ፨
-
- ሰላም፡ ለዝክረ፡ ስምከ፡ ኀበ፡ ዐምደ፡ ብርሃን፡ ዘተሥዕለ፨
- በእደ፡ ፈጣሪ፡ ኬንያ፡ ዘኢየአምር፡ በቀለ፨
- ተንሥአ፡ መድኅን፡ ክቡር፡ ኀበ፡ ስምከ፡ ተልዕለ፨
- ኢይኩን፡ ሕጸተ፡ ማይ፡ ወህጠተ፡ ሥርናይ፡ እክለ፨
- ባሕቱ፡ ለአምክከ፡ ሰአሎ፡ ስኢለ፨
-
- ሰላም፡ ለርእስከ፡ ሥርግወ፡ ሠናይ፡ አስኬማ፨
- በመዋዕሊሁ፡ ለአባ፡ ከሣቴ፡ ብርሃን፡ ሰላማ፨
- ተንሥአ፡ መድኅን፡ ሐዋርያ፡ ክሉለ፡ ሞገስ፡ ወግርማ፨
- ይኩነነ፡ ረድኤትከ፡ ከመ፡ ዘውስተ፡ ፀምር፡ ቃማ፨
- ወበረድኤትከ፡ ይርኅቅ፡ መስቴማ፨
-
- ሰላም፡ ለቀራንብቲከ፡ መአድማነ፡ እለ፡ ኮና፨
- ከመ፡ ዐይነ፡ ርግብ፡ ሠናይት፡ ወከመ፡ ዖፍ፡ ብርጋና፨
- ተንሥአ፡ መድኅን፡ ኅሩይ፡ ለደብረ፡ ዓሥዓ፡ ጸወና፨
- አስትየነ፡ ወይነ፡ ሃይማኖት፡ በማኅፈደ፡ ዚአከ፡ ንጽሕና፨
- እስመ፡ ነጽፈ፡ ጤግሮስ፡ ሙስና፨
-
- ሰላም፡ ለአዕይንቲከ፡ ምሥጢረ፡ መለኮት፡ እለ፡ ርእያ፨
- ውስተ፡ መንበሩ፡ ለአብ፡ አምላከ፡ ጳውሎስ፡ ሐዋርያ፨
- ተንሥአ፡ መድኅን፡ ኀቤከ፡ በቅድመ፡ ሰላማ፡ ኬንያ፨
- ሰገዱ፡ ወአስተብረኩ፡ ሕዝበ፡ ደብረ፡ ዓሣ፡ ሶርያ፨
- እስመ፡ አንተ፡ ለሕዝብከ፡ መድኃኒት፡ ነያ፨
-
- ሰላም፡ ለአእጋሪከ፡ እለ፡ ኤላ፡ ለሕዋጼ፨
- ደብረ፡ አስቦ፡ ለተጋድሎ፡ በኢልማደ፡ ሰብእ፡ ድንጋፄ፨
- ምስለ፡ ሕዝቅኤል፡ ሰይፍከ፡ ወአሌፍ፡ ማኅጼ፨
- በኀይለ፡ ጸሎትከ፡ አባ፡ እንተ፡ አድከምከ፡ ዐመጻ፨
- ፍሬ፡ ረድኤትከ፡ ዲቤነ፡ ለይኩን፡ ሠራጼ፨
-
- ሰላም፡ ለሰኳንዊከ፡ እምፍና፡ እግረ፡ ወልድ፡ እለ፡ ኢድኅፃ፨
- አመ፡ ደብረ፡ ሐውዜን፡ ሖርከ፡ ታርኁ፡ አንቀጻ፨
- ተንሥአ፡ መድኅን፡ በኵረ፡ ጽድቅ፡ ውሳጤ፡ ሀገርከ፡ ኆፃ፨
- ደፊነከ፡ ቅዕበተ፡ ለግብጻዊ፡ ዘልማደ፡ ቤቱ፡ ዐመጻ፨
- ትትካፈል፡ እምእሊአከ፡ ክፍለ፡ ርስት፡ ዕፃ፨
-
- ሰላም፡ ለመቃብሪከ፡ ለደብረ፡ ዓሣ፡ ገቦሃ፨
- እንተ፡ ለጉቡኣን፡ ኵልነ፡ ኮነተነ፡ ምክሐ፨
- ተንሥአ፡ መድኅን፡ አቡነ፡ እንተ፡ ኖምከ፡ በውሳጤሃ፨
- ዕቀበነ፡ በተኣምሪከ፡ በከመ፡ ንቤ፡ አሜሃ፨
- ከመ፡ ኢይብጽሐነ፡ ሞት፡ ሀበነ፡ ንሥሓ፨
-
- ሰላም፡ ለፍልሰተ፡ ሥጋከ፡ በእደ፡ ጻድቃን፡ ስድስቱ፨
- እምበአትከ፡ ላዕላይ፡ ያውርዱከ፡ ኀበ፡ ታሕቱ፨
- ተንሥአ፡ መድኅን፡ አቡነ፡ ለክርስቶስ፡ መጋቤ፡ ቤቱ፨
- አንተኑ፡ በዓለ፡ መካልይ፡ ዐሠርቱ፨
- እንተ፡ ተሠየምከ፡ በአድባር፡ ሰብዓቱ፨
-
- ተንሥአ፡ መድኅን፡ ተወኪፈከ፡ ዘአወፈይኩከ፡ ዘንተ፨
- አምኃ፡ ልሳንየ፡ ኃምሣ፡ ወዘይተሉ፡ ምእተ፨
- ጊዜ፡ አንበበ፡ ካህን፡ ዘትሬስዮ፡ ቅጽበተ፨
- ዘይፌውስ፡ ደዌ፡ ሕሙማን፡ ወዘያነሥእ፡ ምዉተ፨
- ለኅጡአ፡ ምግባር፡ ገብርከ፡ ሀበኒ፡ ዕሤተ፨
- ተረፈ፡ መልክእ፡
-
- ሰላም፡ ለመጽአትከ፡ እምግብጽ፡ ክፍለ፡ ኤፍራታ፨
- ለኢትዮጵያ፡ ውስቴታ፨
- ተንሥአ፡ መድኅን፡ አቡነ፡ በረከተ፡ ኤልያስ፡ ዘሰራጵታ፨
- ሰውረነ፡ ለደቂቅከ፡ አመ፡ ይከውን፡ ሐተታ፨
- ወአመ፡ ታገብእ፡ ምድር፡ ዘነሥአት፡ ማሕፀንታ፨
-
- ሰላም፡ ለከ፡ ተንሥአ፡ መድኅን፡ ምሉአ፡ በረከት፡ ወሣህል፨
- ከመ፡ ሐዋርያ፡ ዘጽድቅ፡ ማርይቆስ፡ ኀያል፨
- በጸሎትከ፡ ኲናት፡ ወዘሰይፍከ፡ ወንጌል፨
- ሰዐርከ፡ በኀይልከ፡ ጋኔነ፡ ዐመጻ፡ ወቀትል፨
- ዘለዘርአ፡ ብእሲ፡ አቀመ፡ መስገርቶ፡ ለሐጕል፨