Details
-
- ናሁ፡ ወጠንኩ፡ ለመልክእከ፡ ሰላሞ፨
- በብዙኅ፡ ጽሂቅ፡ ወአስተሐምሞ፨
- እስትንፋሰ፡ ክርስቶስ፡ ሕሩም፡ እምበቀል፡ ወተቀይሞ፨
- አንጠብጥብ፡ በላዕሌየ፡ ለስብሐቲከ፡ ቀለሞ፨
- ከመ፡ ሠናይተ፡ እንብብ፡ ወእክሀል፡ ፈጽሞ፨
-
- ሰላም፡ ለዝክረ፡ ስምከ፡ አምሳለ፡ ጸቃውዕ፡ ጣዕሙ፨
- ወሞገስ፡ ጥቀ፡ ለገብረ፡ መንፈስ፡ ቅዱስ፡ ከመ፡ ስሙ፨
- እስትንፋሰ፡ ክርስቶስ፡ መምህር፡ አበ፡ ቅዱሳን፡ ኵሎሙ፨
- ሰማዕታተ፡ ዘመልክእከ፡ በበ፡ መሌሊቱ፡ ወዐቅሙ፨
- በሰሌዳ፡ ልብየ፡ ረሲ፡ ጠቢባን፡ ይቅልሙ፨
-
- ሰላም፡ ለዕርገትከ፡ መንግሥተ፡ ሰማያት፡ ትትዋረሱ፨
- ዘዐይነ፡ መዋቲ፡ ኢርእየ፡ ወዘኢኀለየ፡ መንፈሱ፨
- አበ፡ አእላፍ፡ አንተ፡ እስትንፋሰ፡ ክርስቶስ፡ ምስለ፡ ወልድከ፡ ኢያሱ፨
- ወምስለ፡ ኵሎሙ፡ እለ፡ ገድለከ፡ ኀሠሡ፨
- ወእለ፡ ምስሌከ፡ ህላዌ፡ ቀደሱ፨
-
- ስብሐት፡ ለእግዚአብሔር፡ ዘአጽሀቀኒ፡ በፈቃዱ፨
- ውዳሴ፡ መልክእከ፡ እጽሐፍ፡ ለለ፡ አሐዱ፨
- እንዘ፡ ጊጉየ፡ ልብ፡ አነ፡ እምእለ፡ በዝኁ፡ ወውኅዱ፨
- ለአብ፡ ኢተወላዲ፡ እስትንፋሰ፡ ወልዱ፨
- አኮኑ፡ ለእግዚእከ፡ ምሕረት፡ ልማዱ፨
-
- እመ፡ ኢፈደዮሙ፡ ሰርከ፡ ለገባዕተ፡ መፍርህ፡ ዘሐቅል፨
- እስመ፡ ይከውኖ፡ ኀፍረተ፡ ለበዓለ፡ ገራህት፡ ባዕል፨
- እስትንፋሰ፡ ክርስቶስ፡ ጸግወኒ፡ ዕሤተ፡ ቡራኬ፡ በቃል፨
- ተዘኪረከ፡ እግዚኦ፡ በመጽሐፈ፡ ዳግም፡ ክፍል፨
- ለዐሳብ፡ ዐስቦ፡ ኢታዕቢ፡ ዘይብል፨