Details
-
- በስመ፡ እግዚአብሔር፡ አብ፡ ህላዌ፡ ዓለማት፡ ዘይጸውር፨
- እንዘ፡ መሠረት፡ ውእቱ፡ እስመ፡ ለሊሁ፡ ጠፈር፨
- አምጣነ፡ አኀዝኩ፡ እንግር፡ ጽድቀ፡ ማቴዎስ፡ ክቡር፨
- ከመ፡ አሳፍ፡ በመሰንቆ፡ ወከመ፡ ዳዊት፡ በመዝሙር፨
- አጽምዕ፡ ሰማይ፡ ወስምዒ፡ ምድር፨
-
- ሰላም፡ ለዝክረ፡ ስምከ፡ ወለሥዕርትከ፡ ጽሑድ፨
- በመንፈሰ፡ ቅብእ፡ ጥሉል፡ ጥንተ፡ ሕይወቱ፡ ለወልድ፨
- ማቴዎስ፡ ዮሐንስ፡ ወልደ፡ ነጐድጓድ፨
- ያስተበፅዑከ፡ ኵሉ፡ ትውልድ፨
- ወእነግር፡ አነ፡ ጽድቀከ፡ ለባዕድ፨
-
- ሰላም፡ ለመቃብሪከ፡ ደብረ፡ ሐዋርያት፡ እንታክቲ፨
- ከመ፡ ዝኅረ፡ ሙሴ፡ ነቢይ፡ ዘትትከበት፡ ይእቲ፨
- ትንሣኤ፡ መለኮት፡ ማቴዎስ፡ ሕይወተ፡ ኵሉ፡ መዋቲ፨
- ያድኅነኒ፡ ምክረ፡ ዚአከ፡ እምኂጠተ፡ አርሴ፡ ምስሓቲ፨
- ወይዕቀበኒ፡ ጥበብከ፡ እመሥገርት፡ ዛቲ፨
-
- ንስረ፡ ገነተ፡ ጽድቅ፡ ቴዎድሮስ፡ ዘውርዙትከ፡ ተሐደሰ፨
- ወመልአከ፡ ሰማይ፡ ማቴዎስ፡ ዘረሰይከ፡ መንፈሰ፨
- ለዐሪገ፡ ገነት፡ ሀቡኒ፡ አክናፈ፡ ምግባራት፡ ሠላሰ፨
- እምነፍሳቲሆሙ፡ ሄኖክ፡ ኢይሁበኒ፡ ሐዋርያ፡ ዕርገት፡ ነፍሰ፨
- ወይከልአኒ፡ ኤልያስ፡ ፈውሰ፨
-
- መልአ፡ ምድረ፡ ወሰማያተ፡ ከደነ፨
- ነገረ፡ ስብሐቲከ፡ አባ፡ ከመ፡ ኢይፈጽም፡ አነ፨
- ማቴዎስ፡ ወልዱ፡ ለማዕቀበ፡ አልፋ፡ አቡነ፨
- ባሕቱ፡ ተወከፍ፡ አምኃየ፡ መጠነ፡ መልአ፡ ወሰነ፨
- ከመ፡ ተወክፈ፡ አምላከ፡ ጽድቅ፡ ዘአቤል፡ ቍርባነ፨
-
- ናሁ፡ ድርሳን፡ ለመልክእከ፡ መጠነ፡ ፍቅዱ፨
- እንዘ፡ እመልእ፡ ሠላሳ፡ በበ፡ አሐዱ፡ አሐዱ፨
- ተልሚደ፡ አብሳዲ፡ ማቴዎስ፡ ወለቴዎድሮስ፡ ወልዱ፨
- አድኅነኒ፡ እቁም፡ እግዚኦ፡ ለምሕረትከ፡ በዐውዱ፨
- አመ፡ አድለቅለቁ፡ ሰማያት፡ ወአድባር፡ ርዕዱ፨