Details
-
- በስመ፡ እግዚአብሔር፡ አብ፡ ወበስመ፡ ዋሕድ፡ ወልዱ፨
- ወመንፈስ፡ ቅዱስ፡ ሕያው፡ ዘፈቃዶሙ፡ ፈቃዱ፨
- ውዳሴ፡ መልክእከ፡ እጽሐፍ፡ ለለ፡ አሐዱ፡ አሐዱ፨
- ሐድፈኒ፡ ለወልድከ፡ እምባሕረ፡ ኀጢአት፡ አዕዱ፨
- ከመ፡ ኢያሥጥመኒ፡ አባ፡ ለዓለም፡ ሞገዱ፨
-
- ሰላም፡ ለዝክረ፡ ስምከ፡ መከ፡ ጣዕመ፡ ወይን፡ ሠናይ፨
- ዘያስተፌሥሕ፡ አልባበ፡ በጊዜ፡ ስታይ፨
- ኮከበ፡ ጽባሕ፡ ዮሐንስ፡ ተላዌ፡ ፀሓይ፨
- ዘበልደትከ፡ ይትፌሣሕ፡ ሰማይ፨
- ወበጥምቀትከ፡ ትትሐሠይ፡ ቀላይ፨
-
- ሰላም፡ ለግንዘተ፡ ሥጋከ፡ በልብሰ፡ ገርዜን፡ ክቡር፨
- ወለመቃብሪከ፡ ሰላም፡ ሠናየ፡ ዜና፡ ወዝክር፨
- ብፁዕ፡ ዮሐንስ፡ ዘደብረ፡ ቢዘን፡ መምህር፨
- መላእክት፡ ይሴብሑከ፡ በቃለ፡ ሐዋዝ፡ መዝሙር፨
- ወበጊዜ፡ ሞትከ፡ ታድለቀልቅ፡ ምድር፨
-
- ሰላም፡ እብል፡ ለመልክእከ፡ በፍጻሜ፨
- ውስተ፡ ደብረ፡ ቢዘን፡ ቅድስት፡ ሥርጉተ፡ ደመና፡ ወጊሜ፨
- መምህረ፡ ሃይማኖት፡ ዮሐንስ፡ ወምዑዝ፡ ከመ፡ አበሜ፨
- ዘትሁብ፡ ሰላመ፡ አብ፡ ወእለ፡ መጽኡ፡ በሱላሜ፨
- ሶበ፡ ተጋብኡ፡ ይስምዑ፡ ትርጓሜ፨
-
- ሰላም፡ እብል፡ ለመልክኣቲከ፡ ኵሎን፨
- ዘበበ፡ ክፍሎን፨
- ነቢየ፡ ወንጌል፡ ዮሐንስ፡ ዘደብረ፡ ቢዘን፨
- አይጸግብ፡ በነጽሮ፡ ሥነ፡ መልክእከ፡ ዐይን፨
- ወእምነ፡ ሰሚዕ፡ ዜና፡ ገድልከ፡ ኢይጸግብ፡ እዝን፨
-
- ስብሐት፡ ለአብ፡ ዘእምቅድመ፡ ዓለም፡ ሀሎ፨
- ወስብሐት፡ ለወልድ፡ ዘኮነ፡ ቃሎ፨
- ለመንፈስ፡ ቅዱስ፡ ስብሐት፡ በቃለ፡ ብፅዓን፡ እንዘ፡ አሌዕሎ፨
- እስመ፡ ሰማዕኩ፡ እምንእስየ፡ ለዮሐንስ፡ ገድሎ፨
- ወግብረ፡ መልክኡ፡ ፈጸምኩ፡ ሰሚዕየ፡ ኵሎ፨