Details
-
- ሰላም፡ ለዝክረ፡ ስምከ፡ በሰሌዳ፡ ሞገስ፡ ዘተቀልመ፨
- ወበጼወ፡ ክህነት፡ ተቀስመ፨
- ብፁዐ፡ አምላክ፡ ዐዋዲ፡ እንተ፡ ሰበከ፡ ዓለመ፨
- እንተ፡ ትብል፡ ወልደ፡ አምላክ፡ በእንተ፡ ፍቅረ፡ ሰብእ፡ ዘሐመ፨
- በከመ፡ ዳዊት፡ ነበበ፡ ወቄርሎስ፡ ተርጐመ፨
-
- ሰላም፡ ሰላም፡ ይደሉ፡ በውዳሴ፨
- ለመቅደሰ፡ ወንጌል፡ ከርሥከ፡ ዘአኅረመ፡ ቍርባነ፡ ባዕሴ፨
- ብፁዐ፡ አምላክ፡ አልዐዛር፡ በቤትከ፡ ቤተ፡ ቅዳሴ፨
- አመ፡ ገብሩ፡ ክናሴ፡ አጋእዝትየ፡ ሥላሴ፨
- ምሥጢረ፡ ምሥጢራት፡ ነጸርከ፡ ዘኢርእየ፡ ሙሴ፨
-
- ሰላም፡ ለበድነ፡ ሥጋከ፡ በኵረ፡ ድንግል፡ ዘገነዞ፨
- በመዐዛ፡ ዕጣን፡ ንጹሕ፡ እንዘ፡ ያምዕዝ፡ አምዕዞ፨
- ብፁዐ፡ አምላክ፡ ፍንው፡ ለምሕረት፡ ወለናዝዞ፨
- ለሲኦል፡ መዛግብቲሃ፡ አመ፡ አግአዝከ፡ አግዕዞ፨
- መልአከ፡ ጽልመት፡ ደንገፀ፡ በዐቢይ፡ ተክዞ፨
-
- ሰላም፡ ለግንዘተ፡ ሥጋከ፡ ለበኵረ፡ ድንግል፡ በእዱ፨
- በልብሰ፡ ሜላት፡ ንጹሕ፡ ከመ፡ እለ፡ እንጦንስ፡ አልመዱ፨
- ብፁዐ፡ አምላክ፡ በጸጋ፡ እለ፡ ኪያከ፡ ወለዱ፨
- ቦ፡ በእግር፡ ዲበ፡ ዘባነ፡ ባሕር፡ ዘኬዱ፨
- ወቦ፡ በእሳት፡ ማየ፡ ባሕር፡ አንደዱ፨
-
- ሰላም፡ ለመቃብሪከ፡ ኀበ፡ ሥላሴ፡ አመሩ፨
- እንዘ፡ ይቤሉ፡ ዝየ፡ ለሥጋከ፡ መካነ፡ ዝኅሩ፨
- ብፁዐ፡ አምላክ፡ ክብረከ፡ ሶበ፡ በልቡና፡ ነጸሩ፨
- እንዘ፡ ይብሉ፡ በእንቲአከ፡ እለ፡ ጳውሎስ፡ ነገሩ፨
- እምነ፡ ኮከብ፡ ይኄይስ፡ ለኮከብ፡ ክብሩ፨
-
- አብ፡ ወወልድ፡ ወመንፈስ፡ ቅዱስ፡ ይትባረኩ፨
- በዲበ፡ ክብርከ፡ ክብረ፡ ዘለለ፡ ጽባሑ፡ ወሰኩ፨
- ብፁዐ፡ አምላክ፡ በለኒ፡ ሶበ፡ ስመከ፡ ጸዋዕኩ፨
- ሠመርኩ፡ መኀልየከ፡ ወዕሤተ፡ አብዛኅኩ፨
- እስመ፡ አደመኒ፡ ሊተ፡ ንባብከ፡ ዝኩ፨
- ተረፈ፡ መልክእ፡
-
- ድርዐ፡ ሃይማኖት፡ ዕጹፍ፡ በሰሌዳ፡ ሰማይ፡ ጽሑፍ፨
- አሚነ፡ ሥላሴ፡ እምንእሱ፡ ውኩፍ፨
- ብፁዐ፡ አምላክ፡ ልሳነ፡ ሰይፍ፨
-
- ሰላም፡ ለከ፡ ኮለ፡ ደብረ፡ ቢዘን፡ ሐዋዝ፨
- እምነ፡ አፈዋት፡ ምዑዝ፨
- በላዔ፡ መጻሕፍት፡ ከመ፡ ሐባውዝ፨
- ብፁዐ፡ አምላክ፡ ሠናየ፡ ግዕዝ፨
-
- ሰላም፡ ለከ፡ ለርስዓንየ፡ ሐድሳ፨
- ኀዘነ፡ ልብየ፡ በሐሤት፡ አንፍሳ፨
- ብፁዐ፡ አምላክ፡ ሠርጐ፡ ከኒሳ፨
-
- ሰላም፡ ለከ፡ መትልወ፡ ሃይማኖት፡ ዝጉብ፨
- ወሀሊበ፡ ወንጌል፡ ጽጉብ፨
- ወሪደከ፡ ዝየ፡ እምነ፡ ተድባብ፨
- በረከተ፡ ወልድ፡ አኮኑ፡ ዕቁብ፨
- ባርከኒ፡ አባ፡ በጥዑም፡ ንባብ፨