Details
-
- በስመ፡ እግዚአብሔር፡ አብ፡ ወበስመ፡ ክርስቶስ፡ መድኅን፨
- ወበስመ፡ ቅዱስ፡ መንፈስ፡ ዘሐሤተ፡ ኵሉ፡ ኅዙን፨
- ከመ፡ ጽድቀ፡ ዚአከ፡ እንግር፡ አፍቀርአነ፡ እግዚእ፡ ምእመን፨
- አስትየኒ፡ እንበለ፡ ጻማ፡ ንጽሕና፡ ጥበብከ፡ ወይን፨
- ሕገ፡ አርድእተ፡ ቃል፡ ዘሰትዩ፡ እምኀምስ፡ ዘመን፨
-
- ሰላም፡ ለዝክረ፡ ስምከ፡ ዘኢይትጋወሮ፡ ሙስና፨
- ለዘዘክሮቱ፡ ያዔድም፡ እማዕደ፡ ቃና፨
- አፍቀረነ፡ እግዚእ፡ ሳሙኤል፡ ፍሬ፡ ከርሠ፡ ጥበብ፡ ሐና፨
- ሴስየኒ፡ ለጸማድከ፡ ጣዕመ፡ ትሩፋቲከ፡ መና፨
- ወበጊዜ፡ ነጊድ፡ ምርሐኒ፡ ዘትኄይስ፡ ፍና፨
-
- ሰላም፡ ለአስናኒከ፡ ዘለግብረ፡ ሰሐቅ፡ መነና፨
- ወለልሳንከ፡ ሰላም፡ ሙራደ፡ ጽሌ፡ ሕገ፡ ሲና፨
- አፍቀረነ፡ እግዚእ፡ ቄርሎስ፡ ለመቅደሰ፡ ዴጐ፡ ብርሃና፨
- ታስተበፅዐከ፡ በአብዝኆ፡ ንባብ፡ ወዜና፨
- እስመ፡ እምነዋኃት፡ አድባር፡ አልዐልከ፡ መጠና፨
-
- ሰላም፡ ለእመትከ፡ እንተ፡ ቈጠጠ፡ በሰጊድ፨
- ወለእራኅከ፡ ስፉሕ፡ ለውሂበ፡ ኵሉ፡ መፍቅድ፨
- አፍቀረነ፡ እግዚእ፡ ሌዋዊ፡ ርሱየ፡ ቅዳሴ፡ መረግድ፨
- ነያ፡ ትብለከ፡ ደብረ፡ ዴጐ፡ ዘምስለ፡ ምእመናን፡ ነገድ፨
- ምስፍናከ፡ እግዚእየ፡ ኢትሀብ፡ ለባዕድ፨
-
- ሰላም፡ ለፀአተ፡ ነፍስከ፡ አመ፡ ሰብዑ፡ ለታኅሣሥ፨
- ወለበድነ፡ ሥጋከ፡ ሰላም፡ ርጢነ፡ ኵሉ፡ ዘነፍስ፨
- አፍቀረነ፡ እግዚእ፡ አስተብቍዕ፡ ኀበ፡ ንጉሠ፡ ጽድቅ፡ ክርስቶስ፨
- ኢይግዝማ፡ እንበለ፡ ጊዜ፡ ለሕይወትየ፡ በለስ፨
- እስመ፡ እንበለ፡ አቅም፡ አብዝኀት፡ ግማኔ፡ ወርኵስ፨
-
- ሰላም፡ ለግንዘተ፡ ሥጋከ፡ በእደ፡ አግብርት፡ ኅሩያን፨
- ወለመቃብሪከ፡ ሰላም፡ ውስተ፡ ጽርሐ፡ ዴጐ፡ መካን፨
- ወራሴ፡ ሢመቱ፡ ለአቤል፡ አፍቀረነ፡ እግዚእ፡ መስፍን፨
- ተወከፍ፡ ሊተ፡ እግዚኦ፡ አምኃ፡ ነባቢ፡ ድርሳን፨
- ለዘምስለ፡ ግናይ፡ አቅረብኩ፡ ወልድከ፡ ምስኪን፨
-
- ግብረ፡ አረጋዊ፡ ወእንጦንስ፡ እንተ፡ ረሰይኩ፡ ሥላቀ፨
- ወግዕዘ፡ ቅዱሳን፡ አበው፡ ዘእምሰብእናየ፡ ርኅቀ፨
- አፍቀረነ፡ እግዚእ፡ ተንብል፡ እንዘ፡ ትሠረገው፡ ሠቀ፨
- እመኒ፡ አምላክከ፡ ኀሢሠ፡ ጸባሕት፡ ጽህቀ፨
- ለሰሎሞን፡ በሎ፡ ለቅሐኒ፡ ወርቀ፨
- ተረፈ፡ መልክእ፡
-
- ሰላም፡ ሰላም፡ እንዘ፡ እብል፡ ኪያክሙ፨
- ብርሃናተ፡ ዓለም፡ ጽዱላን፡ እኤምኀክሙ፨
- ጻድቃን፡ ዘዴጐ፡ እለ፡ ጻመውክሙ፡ በእንተ፡ ስሙ፨
- ምስለ፡ አቤል፡ መምህረ፡ ሕግ፡ ዘማሕተመ፡ ኂሩት፡ ማሕተሙ፨
- አፍቀረነ፡ እግዚእ፡ ወሊባኖስ፡ ለብርሃን፡ ተቅዋሙ፨