Details
- ማስገቢያ፡
-
- ሰላም፡ ለክሙ፡ እለ፡ ደብረ፡ ዴጐ፡ ቅዱሳን፨
- አንትሙ፡ ውእቱ፡ ዘመንፈስ፡ ቅዱስ፡ አስከሬን፨
- ማእከሌክሙ፡ ረፈቀ፡ እሳተ፡ መለኮት፡ ርሱን፨
- ዜና፡ ዕረፍትክሙ፡ ምዕዘኒ፡ ከመ፡ ወግረ፡ ስኂን፨
- መዐዛክሙ፡ ጥዕመኒ፡ ከመ፡ ዘሴሬቅ፡ ወይን፨
- ትንባሌክሙ፡ ይኩነኒ፡ ምዕዳወ፡ እምደይን፨
-
- ያመጽኡ፡ አምኃሁ፡ እምናቤዎን፡ ሐርጌ፨
- ለዘቤተ፡ ልሔም፡ ተወልደ፡ እምድንግል፡ ጽጌ፨
- ሊቃውንት፡ ዘበክብር፡ አዕማደ፡ እግዚኡ፡ ለሐጌ፨
- አምሰጡ፡ በትዕግሥቶሙ፡ እምነ፡ ዘሰይጣን፡ ዝንጓጌ፨
- ወለማኅበሮሙ፡ አልቦቱ፡ ኑታጌ፨
-
- ሰላም፡ ለዝክረ፡ ስምክሙ፡ ዘሐዋዝ፡ ጥቀ፨
- ለዘይሰምዕ፡ በእዝኑ፡ ወበኅሊናሁ፡ ጥንቁቀ፨
- ጻድቃን፡ ዘዴጐ፡ ዕበይክሙ፡ ተአውቀ፨
- እመ፡ በትሕትና፡ ማእከሌክሙ፡ ረፈቀ፨
- ሊቀ፡ ጠቢባን፡ ክርስቶስ፡ ዘይሜህር፡ ጽድቀ፨
-
- ሰላም፡ ለቆምክሙ፡ ለዕፀ፡ በቀልት፡ አምሳሉ፨
- ወለመልክእክሙ፡ ሰላም፡ ዘፍትው፡ በኀበ፡ ኵሉ፨
- ጻድቃን፡ ዘዴጐ፡ በእንቲአነ፡ ሰአሉ፨
- በአስተሐምሞ፡ አልባቢክሙ፡ አልዕሉ፨
- ወልብክሙ፡ በሰማይ፡ የሀሉ፨
-
- እግዚአብሔር፡ አምላክነ፡ አመ፡ ሐወጸ፡ እምሰማይ፨
- ማእከሌክሙ፡ ረፈቀ፡ በአምሳለ፡ ብእሲ፡ ነዳይ፨
- ጻድቃን፡ ዘዴጐ፡ ለወልድክሙ፡ ሐካይ፨
- ሥረዩ፡ ኀጢአትየ፡ ወብዝኀ፡ እኪት፡ ጌጋይ፨
- እስመ፡ ይኄይስ፡ ፍቅርክሙ፡ እምብዙኅ፡ ንዋይ፨
- ተረፈ፡ መልክእ፡
-
- ሰላም፡ ሰላም፡ እንዘ፡ እብል፡ ኪያክሙ፨
- ብርሃናተ፡ ዓለም፡ ጽዱላን፡ እኤምኀክሙ፨
- ጻድቃን፡ ዘዴጐ፡ እለ፡ ጻመውክሙ፡ በእንተ፡ ስሙ፨
- ምስለ፡ አቤል፡ መምህረ፡ ሕግ፡ ዘማሕተመ፡ ኂሩት፡ ማሕተሙ፨
- አፍቀረነ፡ እግዚእ፡ ወሊባኖስ፡ ለብርሃን፡ ተቅዋሙ፨