Details
-
- ገድልከ፡ ኮነ፡ ከመ፡ ዕለቱ፡ ለቃና፨
- ዘየዐውዶ፡ ስብሐት፡ በአርአያሁ፡ ለደመና፨
- አረጋዊ፡ ዘጾርከ፡ በትረ፡ ሃይማኖት፡ ወትድስና፨
- አስኬማከኒ፡ ንብረታ፡ ጽሙና፨
- አስኬማከኒ፡ አስኬማከኒ፡ አልባቲ፡ ሙስና፨
-
- በስመ፡ አብ፡ ወወልድ፡ ወመንፈስ፡ ቅዱስ፡ ማሕየዊ፨
- ለዘወጠንክዎ፡ ሥመር፡ ሕንጻ፡ ሥላሴከ፡ አረጋዊ፨
- እንበለ፡ ፍጻሜ፡ ኢይትርፍ፡ ከመ፡ ሕንጻ፡ ናምሩድ፡ ዐላዊ፨
- እግረ፡ ልቡናየ፡ ባርክ፡ እግዚኦ፡ እምሐቅለ፡ ኀልዮ፡ አፍአዊ፨
- ከመ፡ ልቡናሁ፡ ኢይጻእ፡ ለኤፍራም፡ ለብሓዊ፨
-
- ሰላም፡ ለልደትከ፡ እማሕፀነ፡ ቅድስት፡ እድና፨
- በእንቲአየ፡ ሰአላ፡ አረጋዊ፡ ብዙኀ፡ ቀኖና፨
- ለወልጦ፡ ልብየ፡ ትምጻእ፡ ማርያም፡ ምስለ፡ ሕፃና፨
- ኅድግሰ፡ ዕበደ፡ ወልጦ፡ በከዊነ፡ ሠናይ፡ ኅሊና፨
- ማየ፡ መሳብክት፡ አውየኖ፡ በከብካብ፡ ዘቃና፨
-
- ሰላም፡ ለዝክረ፡ ስምከ፡ እንተ፡ አልቦቱ፡ ድምሳሴ፨
- ኀበ፡ ጸሐፍዎ፡ ቅድመ፡ ዲበ፡ ዐምደ፡ ወርቅ፡ ሥላሴ፨
- አምጣነ፡ ኢይክል፡ ወድሶ፡ እንተ፡ ከማከ፡ ብእሴ፨
- ነዓ፡ ነዓ፡ ምስለ፡ ገብረ፡ ክርስቶስ፡ ወሙሴ፨
- ታይድአኒ፡ አረጋዊ፡ ዘለከ፡ ውዳሴ፨
-
- ሰላም፡ ለዕርገትከ፡ በዘነበ፡ አርዌ፡ ደብረ፡ ዳሞ፨
- እንዘ፡ ሚካኤል፡ በሰይፉ፡ የዐቅበከ፡ ቀዊሞ፨
- አረጋዊ፡ ማቴዎስ፡ ሰባኬ፡ ወንጌል፡ በኢያርምሞ፨
- ሀብተ፡ ጸጋከ፡ ሀበነ፡ ለውሉድከ፡ ተዘኪረከ፡ ሕማሞ፨
- ለዘበእንቲአነ፡ ወልድ፡ አንጸፍጸፈ፡ ደሞ፨
-
- በዛቲ፡ ጸሎት፡ ሶበ፡ ንጼውዐከ፡ ንሕነ፨
- አረጋዊ፡ የዋህ፡ እንበለ፡ ጐንድዮ፡ ስምዐነ፨
- ወብእሴ፡ ሐሰት፡ እመቦ፡ ዘዕብየከ፡ መነነ፨
- ኢተወለድኩ፡ ብሂሎ፡ እምወላዴ፡ አእላፍ፡ አቡነ፨
- ርስተ፡ ጸጋከ፡ ኢይረስ፡ ምስሌነ፨