Details
-
- በስመ፡ አብ፡ ወወልድ፡ ወመንፈስ፡ ቅዱስ፡ በአኅብሮ፨
- ውዳሴ፡ መልክእከ፡ እጽሕፍ፡ መጠነ፡ ተውህበኒ፡ አእምሮ፨
- ሰባኬ፡ ትንሣኤ፡ አፍጼ፡ ዘተፈኖከ፡ ለምሕሮ፨
- ለገብርከ፡ መፍቀሬ፡ አምላክ፡ አግርር፡ ፀሮ፨
- እስመ፡ በስምከ፡ ቀደሰ፡ ማኅደሮ፨
-
- ሰላም፡ ለዝክረ፡ ስምከ፡ በአፈ፡ አምላክ፡ ዘተጸውዐ፨
- ወለሥዕፍርትከ፡ ሰያብ፡ ዘጽዕድው፡ እምልብሰ፡ መርዐ፨
- መናኔ፡ መዛግብት፡ አፍጼ፡ ወዘብዕለ፡ ዓለም፡ ፍግዐ፨
- ከመ፡ እጽገብ፡ እምበረከትከ፡ ዘተመነይኩ፡ ሰቡአ፨
- በገራህተ፡ ልብየ፡ አብቍል፡ ሰላመከ፡ ዘርአ፨
-
- ሰላም፡ ለቆምከ፡ ለወንጌለ፡ ክርስቶስ፡ አትሮንሱ፨
- ወለአልክእከ፡ ፍትው፡ ዘሜላተ፡ ብርሃን፡ ልብሱ፨
- አፍጼ፡ ፀሓይ፡ ዘአቀመከ፡ ኢያሱ፨
- ሐውጸነ፡ በበዓልከ፡ ምስለ፡ እስክንድር፡ ወፈረሱ፨
- ዘምስለ፡ ጉባ፡ ወስምዖን፡ ዘተበስረ፡ ፅንሱ፨
-
- ሰላም፡ ለተሠውሮትከ፡ እንበለ፡ ያእምር፡ አሐዱ፨
- እመኃዊከ፡ ኄራን፡ እለ፡ ምስሌከ፡ ነገዱ፨
- መምህረ፡ መምህራን፡ አፍጼ፡ ለእግዚአብሔር፡ ፈጻሜ፡ ፈቃዱ፨
- በበዓልከ፡ አሜሃ፡ መላእክተ፡ ሰማይ፡ ወረዱ፨
- ወበመቅደስከ፡ በስብሐት፡ ዖዱ፨
-
- ሰላም፡ ለተሠውሮትከ፡ ውሳጤ፡ መቅደስ፡ ምሥራቃዊ፨
- ወለበአትከ፡ ዓዲ፡ በውስተ፡ ጽርሑ፡ ለመርዓዊ፨
- ጸሊ፡ አፍጼ፡ ኀበ፡ ሊቅከ፡ ናዝራዊ፨
- ከመ፡ ታድኅነኒ፡ እመሠገርተ፡ አርዌ፡ ነዓዊ፨
- ጸሎትከ፡ አባ፡ ጽሙዐ፡ ያረዊ፨
-
- ውሑደ፡ ነገርኩ፡ እንዘ፡ ብዙኅ፡ ውዳሴከ፨
- በቃለ፡ ሰላምየ፡ ዝንቱ፡ ሶበ፡ ሰአልኩ፡ ኀቤከ፨
- አፍጼ፡ በለኒ፡ ወአስምዐኒ፡ ቃለከ፨
- እምብዙኅ፡ ጻማ፡ ኣአርፈከ፡ ሰማዕኩ፡ ጸሎተከ፨
- ወስእለተከ፡ ኀበ፡ ሀሎ፡ ፍሥሓ፡ አነብረከ፨
- ተረፈ፡ መልክእ፡
-
- ሰላም፡ ለክሙ፡ አሌፍ፡ ወጽሕማ፨
- አረጋዊ፡ ዓዲ፡ ወአባ፡ ገሪማ፨
- አፍጼ፡ ወጉባ፡ ይምአታ፡ ጰንጠሌዎን፡ ወአባ፡ ሊቃኖስ፨
- ለለ፡ ጽባሑ፡ ዑድዋ፡ ለዛቲ፡ መቅደስ፨
-
- ፈሊሶ፡ እምእስያ፡ በመንኖ፡ ክብር፡ ወብዕል፨
- ኀበ፡ ሀለወት፡ ቦቱ፡ ታቦተ፡ ማርያም፡ ድንግል፨
- ኀበ፡ ኢየሱስ፡ ክርስቶስ፡ ዘአብ፡ ቃል፨
- ኢንርአይ፡ ሙስናሃ፡ ለደብረ፡ ሐመልማል፨
- ጸሊ፡ አፍጼ፡ መነኮስ፡ ኀያል፨