Details
-
- ሰላም፡ ለፅንሰትከ፡ በማሕፀነ፡ እም፡ ነአስ፨
- ለልደትከ፡ ሰላም፡ ወለዝክረ፡ ስምከ፡ ውዱስ፨
- ኅሩየ፡ አምላክ፡ ጉባ፡ መፍቀሬ፡ ኅድአት፡ ወመርስ፨
- ፍትሐኒ፡ በሥልጣንከ፡ እማእሰረ፡ ልሳን፡ ሐዲስ፨
- እንግር፡ ዜና፡ ገድልከ፡ በዛቲ፡ መቅደስ፨
-
- ሰላም፡ ለሥዕርተ፡ ርእስከ፡ ወለርእስከ፡ ጸዋሬ፡ አክሊል፨
- ወለቀራንብቲከ፡ ዐይን፡ ዘአርአያሆን፡ ጽዱል፨
- ጉባ፡ አቡነ፡ ወላዴ፡ ቅዱሳን፡ በገድል፨
- ባርከነ፡ ለደቂቅከ፡ በዘእዴከ፡ መስቀል፨
- እስመ፡ በረከቱ፡ ለአብ፡ ለወልድ፡ ጠል፨
-
- ሰላም፡ ለፀአተ፡ ነፍስከ፡ እምዓለመ፡ ሕማም፡ ወጻዕር፨
- ወለበድነ፡ ሥጋከ፡ ሰላም፡ ምስለ፡ ግንዘትከ፡ ክቡር፨
- ወለመቃብሪከ፡ ዓዲ፡ በውሳጤ፡ ልዑል፡ ደብር፨
- ባርከነ፡ በመስቀልከ፡ መምህረ፡ ሰላም፡ ወፍቅር፨
- ጉባ፡ አቡነ፡ እስመ፡ አንተ፡ ኄር፨
-
- ስብሐት፡ ለአብ፡ በማዕከለ፡ ዛቲ፡ ዐጸድ፨
- ወስብሐት፡ ካዕበ፡ ምስለ፡ መንፈስ፡ ቅዱስ፡ ወወልድ፨
- ለዘወሀቡኒ፡ ሥላሴ፡ ጠበብተ፡ አሐዱ፡ ፈቃድ፨
- ሀበኒ፡ ዐስበ፡ ጻማየ፡ ጽድቀ፡ ምግባርየ፡ ፍድፉድ፨
- ውዳሴ፡ መልክእከ፡ እስመ፡ ፈጸምኩ፡ [በገሀድ]፨