Details
-
- በስመ፡ ሥሉስ፡ ቅዱስ፡ ወበስመ፡ አምላክ፡ ዋሕድ፨
- ድርሳነ፡ መልክእከ፡ ዮም፡ ትጸግወኒ፡ ለአብድ፨
- አማሕፀንኩከ፡ ይምአታ፡ ፈጻሜ፡ ኵሉ፡ ፈቃድ፨
- ዳዊትኒ፡ በከመ፡ ይቤ፡ ኢትኅድገኒ፡ ለባዕድ፨
- እስከ፡ እነግር፡ መዝራዕተከ፡ ለዘይመጽእ፡ ትውልድ፨
-
- ሰላም፡ ለዝክረ፡ ስምከ፡ ሶበ፡ ተዘከሮ፡ ልብነ፨
- ዘያስተባዝኅ፡ ተድላ፡ ወዘያረስእ፡ ኀዘነ፨
- ፍጻሜ፡ ስብሐቲከ፡ አባ፡ አርእየኒ፡ ፍጡነ፨
- እትወለድ፡ ብከ፡ በይነዝ፡ አመ፡ ልደተ፡ ነፍስ፡ ኮነ፨
- ፅንሰ፡ ማሕፀና፡ ለሲኦል፡ እስመ፡ ኮንኩ፡ አነ፨
-
- ሰላም፡ ለመቃብሪከ፡ ውስተ፡ ርእሰ፡ ደብር፡ ተያጥሮን፨
- ዘየዐውዶ፡ ጽዳሌ፡ ወይገለብቦ፡ ብርሃን፨
- ይምአታ፡ ምልክአም፡ ፍቁረ፡ መላእክት፡ ኄራን፨
- አድኅነኒ፡ በጸሎትከ፡ እምዘ፡ ይመጽእ፡ ኀዘን፨
- ወባልሐኒ፡ እምግሩም፡ ደይን፨
-
- ይምአታ፡ ተወኪፈከ፡ ዘአወፈይኩከ፡ ዘንተ፨
- አምኃ፡ ልሳንየ፡ ሐምሳ፡ ወተላዊሁ፡ ክልኤተ፨
- በጊዜ፡ አንበቦ፡ ካህን፡ እንዘ፡ ትሬስዮ፡ ቅጽበተ፨
- ዘይፌውስ፡ ለዘደወየ፡ ወዘያነሥእ፡ ምዉተ፨
- ለኅጡአ፡ ዕሤት፡ ወልድከ፡ ሀበኒ፡ ዕሤተ፨
-
- አመ፡ ምጽአትከ፡ ወልደ፡ አምላክ፡ ድኅረ፡ ኀለፈ፡ ለዓለም፡ ኅልፈታ፨
- ወአመ፡ አባግዕ፡ መልኡ፡ ለቤትከ፡ በውሳጢታ፨
- ድንግለ፡ ዘለፋ፡ ጽኑዕ፡ ወመርዐተ፡ ዕጹብ፡ ሐተታ፨
- ነፍስየ፡ ውስተ፡ እሳት፡ ከመ፡ ኢትንበር፡ ባሕቲታ፨
- ሀለወኒ፡ ዘእተአመኖ፡ ወልድከ፡ ይምአታ፨
- ተረፈ፡ መልክእ፡
-
- ሰላም፡ ለከ፡ ይምአታ፡ ጻድቅ፨
- ጽዑነ፡ ደብር፡ ምጡቅ፨
- እመ፡ ይጸሐፍ፡ በቀለመ፡ ወርቅ፨
- ተኣምሪከ፡ ኢየኀልቅ፨
-
- ሰላም፡ ለከ፡ በጸሎትከ፡ ኲናት፡ ወበሰይፍከ፡ መስቀል፨
- ሠዐርከ፡ አንተ፡ ወራዙተ፡ ዘቀትል፨
- ይምአታ፡ ወሬዛ፡ ገድል፨
-
- ሰላም፡ ለከ፡ በጊዜ፡ ዕረፍትከ፡ አባ፡ መላእክተ፡ ሰማይ፡ ወረዱ፨
- በማዕጠንተ፡ ወርቅ፡ ሥጋከ፡ እንዘ፡ የዐውዱ፨
- ዕበየከ፡ ከመ፡ ያክሕዱ፨
-
- ሰላም፡ ለከ፡ ንግደትየ፡ በጽሐ፡ አኮኑ፡ ወተፈጸመ፡ ምግብየ፨
- እንበለ፡ አስተዳሉ፡ አነ፡ ስንቀ፡ ፍኖትየ፨
- እንበሌከ፡ አባ፡ አስተብቍዖትየ፨
- እምብዕለ፡ ቤትከ፡ ክፍለኒ፡ ዐስብየ፨