Details
-
- ሰላም፡ ለዝክረ፡ ስምክ፡ ልዑለ፡ ጽዋዔ፡ እምጥንቱ፨
- ወለሥዕርተ፡ ርእስከ፡ ሰላም፡ ዘአዳም፡ ሥነ፡ ርእየቱ፨
- ትሩፈ፡ ምግባር፡ አሌፍ፡ ወዘውገ፡ ቅዱሳን፡ ተስዐቱ፨
- ነፍስየ፡ ርኅብተ፡ ጽድቅ፡ ጸውዖተከ፡ ትፈቱ፨
- እምግብረ፡ ዓለም፡ ባሕረ፡ ጌጋይ፡ ኢትጥፋዕ፡ በከንቱ፨
-
- ሰላም፡ ለርእስከ፡ መናኔ፡ ጌራ፡ ወርቅ፡ ጽሩይ፨
- ወለገጽከ፡ ሰላም፡ ተምሳሌ፡ ብሩህ፡ ፀሓይ፨
- ዘኢያጌብረከ፡ አሌፍ፡ ፍቅረ፡ ኀላፊ፡ ንዋይ፨
- ጊዜ፡ ሰአልኩከ፡ ዘምስለ፡ ብዙኅ፡ ብካይ፨
- ታዕድወኒ፡ ነዓ፡ ለብእሲ፡ ጊጉይ፨
-
- ሰላም፡ ለግንዘተ፡ ሥጋከ፡ ወለመቃብሪከ፡ ዘተሐትመ፨
- በእደ፡ ጻድቃን፡ አሌፍ፡ እንተ፡ መነንከ፡ ዓለመ፨
- ማዕከለ፡ አሕስአ፡ ገዳም፡ ኀበ፡ እግረ፡ ዮሐንስ፡ ቆመ፨
- እምብዝኀ፡ ንዴት፡ ጊዜ፡ አሐውር፡ ገዳመ፨
- አትልወኒ፡ በድኅሬከ፡ ወምርሐኒ፡ ፍጹመ፨
-
- ናሁ፡ አቅረብኩ፡ በበ፡ መጠኑ፡ ወክፍሉ፨
- መጠነ፡ ተጸዋዕከ፡ ኀበ፡ ክብር፡ ለክርስቶስ፡ በድምፀ፡ ቃሉ፨
- በጽድቀ፡ ዚአከ፡ አሌፍ፡ እንተ፡ ተፈሣሕኩ፡ በውስተ፡ ኵሉ፨
- ፍቅረ፡ እንቲአከ፡ ዘምስሌየ፡ የሀሉ፨
- ኪዳነ፡ ቃልከ፡ በቅድሜየ፡ ወድኅሬየ፡ ይትሉ፨