Details
-
- መንፈሰ፡ አብ፡ ወወልድ፡ ወመንፈስ፡ ቅዱስ፡ ዘአስተናገረ፡ ነቢያተ፨
- ለሐዋርያትኒ፡ ዘልሳነ፡ ኵሉ፡ ከሠተ፨
- ተከሥተ፡ ብርሃን፡ አቡየ፡ እማሕፀነ፡ እምየ፡ አንተ፨
- ለወልድከ፡ ይእዜ፡ ይክሥት፡ ሊተ፨
- ሰላመ፡ ዚአከ፡ እትናበብ፡ ንስቲተ፨
-
- እዌጥን፡ ዝክረ፡ ውዳሴከ፡ አቡየ፡ ተከሥተ፡ ብርሃን፨
- በዓለ፡ ዛቲ፡ መካን፨
- ወአበ፡ ነፍሶሙ፡ አንተ፡ ለአበው፡ ጻድቃን፨
- ያስተበፅዑከ፡ በርቱዕ፡ ልሳን፨
- ዘርእየ፡ ዐይን፡ ወዘሰምዐ፡ ዕዝን፨
-
- ሰላም፡ ለዝክረ፡ ስምከ፡ ስመ፡ ፈጣሪ፡ ልዑል፨
- ዘሆህያቲሁ፡ መስቀል፨
- ተከሥተ፡ ብርሃን፡ ኪያከ፡ ረዳኤ፡ ግፉኣን፡ ዘእብል፨
- አድኅነኒ፡ እምአፅራርየ፡ በጸሎትከ፡ ዘይክል፨
- አቡየ፡ ሰባኪሃ፡ ለሐዳስ፡ ወንጌል፨
-
- ሰላም፡ ለሕንብርትከ፡ ተከሥተ፡ ብርሃን፡ ዕንቈ፡ ባሕርይ፨
- ወልዑል፡ ዕበይ፨
- ለቶማስ፡ ወልድከ፡ ዘትርጓሜ፡ ስሙ፡ ፀሓይ፨
- ፈንዎ፡ የሐውጸነ፡ በኀይለ፡ ረድኤቱ፡ ሠናይ፨
- ወይባልሐነ፡ እምኵሉ፡ እኩይ፨
-
- ሰላም፡ ለትንሣኤከ፡ ከመ፡ በደኅሪት፡ ዘመን፨
- ምስለ፡ ኵሎሙ፡ ሙታን፨
- አባ፡ አቡነ፡ ተከሥተ፡ ብርሃን፨
- ምርሐነ፡ ፍና፡ የማን፡ ለደቂቅከ፡ ትሑታን፨
- ኀበ፡ ምቅዋሞሙ፡ ለአበው፡ ኄራን፨
-
- በሰላም፡ ወፍቅር፡ ዘአቅረብኩ፡ ዘንተ፨
- ተወኪፈከ፡ ማሕሌተ፨
- ተከሥተ፡ ብርሃን፡ አቡነ፡ አስተምሕር፡ ሊተ፨
- ከመ፡ ትሥረይ፡ በምሕረቱ፡ ዘገበርኩ፡ ኃጢአተ፨
- ከመ፡ ለቤዝዎ፡ ኃጥኣን፡ ፈጣሪ፡ ዘሞተ፨
-
- ኦአጋእዝትየ፡ ቡራኬ፡ አረጋይ፡ ኢታስትቱ፨
- በእንተ፡ ምግባርየ፡ ከንቱ፨
- ሰላመ፡ አቡክሙ፡ ጻድቅ፡ ዘጸሐፍኩ፡ በበ፡ መክፈልቱ፨
- ኪያክሙኒ፡ ይዕቀብክሙ፡ ረድኤቱ፨
- ረድኤተ፡ ጻድቃን፡ ውሉዱ፡ ወኄራን፡ አግብርቱ፨