Details
-
- በጽዋዐ፡ ጥበብ፡ እሳተ፡ ከመ፡ ራጉኤል፡ አስተዮ፨
- ለዘተሳተፈ፡ ዕዝራ፡ ከመ፡ ሱቱኤል፡ ተሰምዮ፨
- ነበልባለ፡ እሳት፡ ሴት፡ ድርሳነ፡ መልክእከ፡ ለአሠንዮ፨
- እሳትየኒ፡ ወይነ፡ ሰማይ፡ ለምሥጢረ፡ ነድ፡ እርአዮ፨
- ወሀሊበ፡ መዝሙር፡ ጽዕድወ፡ ዘዳዊት፡ ሐለዮ፨
-
- ሰላም፡ ለዝክረ፡ ስምከ፡ ፀሓየ፡ ፍሥሓ፡ ስቁል፨
- በኍልቈ፡ ፊደላት፡ ክልኤ፡ አየራተ፡ ስሙ፡ ለቃል፨
- ለክብረ፡ በአዓልከ፡ ሴት፡ በአተ፡ ማርያም፡ ድንግል፨
- ናሁ፡ ትዜምር፡ ምስለ፡ ወልዳ፡ አርአያ፡ ሱራፌል፡ ወኪሩቤል፨
- እንዘ፡ ትብል፡ ሃሌ፡ ህሉያ፡ በዜማ፡ ልዑል፨
-
- ሰላም፡ ለፀአተ፡ ነፍስከ፡ ውስተ፡ ሰማያት፡ ሀገር፨
- አመ፡ ዕሥራ፡ ወረቡዑ፡ ለወርኀ፡ ኅዳር፨
- ካህናተ፡ ሰማይ፡ ቡሩካን፡ አጠንተ፡ ግሩም፡ መንበር፨
- ተበሀሉ፡ ሴት፡ ቢዜ፡ ሞትከ፡ በብሂለ፡ ዘዳዊት፡ መዝሙር፨
- አማን፡ ሞተ፡ ጻድቅ፡ ከመዝ፡ ክቡር፨
-
- ሰላም፡ ለመቃብሪከ፡ ዘይስእሉ፡ ኀቤሃ፨
- ሕሙማነ፡ ነፍስ፡ ሕይወተ፡ ወትኩዛነ፡ ልብ፡ ፍሥሓ፨
- ሴት፡ ጴጥሮስ፡ ለመንግሥተ፡ ሰማይ፡ ዴዴሃ፨
- ንሥሓ፡ ሀበኒ፡ ወጸግወኒ፡ ዕድሜ፡ መዋዕል፡ ብዙኀ፨
- እስመ፡ ድኅረ፡ ሞቱ፡ ለሰብእ፡ አልቦቱ፡ ንሥሓ፨
-
- ካህናተ፡ ሰማይ፡ ሰብሑ፡ ወሰመዩ፡ በመለኮተ፨
- ኢብሂለ፡ ቀትር፡ ወሌሊት፡ እንበለ፡ ያዕርፉ፡ ምንተ፨
- ሠሚረከ፡ ሴት፡ አምኃ፡ ከናፍርየ፡ ስብሐተ፨
- በከንቱ፡ ተወከፍ፡ ወአዕርግ፡ ሰማያተ፨
- በቀለመ፡ ብሩር፡ ወወርቅ፡ ጽሒፈከ፡ ዘንተ፨