Details
- ማስገቢያ፡
-
- ሰላም፡ ለመግደላዊት፡ ማርያም፡ ስማ፨
- ለኢየሱስ፡ ዘርእየቶ፡ እምሐዋርያት፡ ቀዲማ፨
- ወለአንስት፡ ሰላም፡ ዘተሳተፋ፡ ድካማ፨
- እንዘ፡ ይትራወጻ፡ ኀበ፡ መቃብሩ፡ ለፌማ፨
- እንበለ፡ ያፍርሆን፡ ዘሌሊት፡ ግርማ፨
-
- በሥምረተ፡ አብ፡ ክቡር፡ ወጠንኩ፡ ናሁ፨
- ዝክረ፡ ስምኪ፡ ኣየድዕ፡ በበ፡ ጾታሁ፨
- እስመ፡ አርአየኪ፡ ቅድመ፡ ኵሉ፡ ክርስቶስ፡ ትንሣኤሁ፨
- መግደላዊት፡ ማርያም፡ ለኅዙነ፡ ልብ፡ ተስፋሁ፨
- ሐዋርያት፡ በነገርኪ፡ ፍሥሓ፡ አብዝኁ፨
-
- ሰላም፡ ለዝክረ፡ ስምኪ፡ ወለሥዕርትኪ፡ ጸሊም፨
- ወለርእስኪ፡ ቅቡእ፡ ቅብአ፡ ሃይማኖት፡ መድምም፨
- መግደላዊት፡ ማርያም፡ ዘኵለንታኪ፡ ፍጹም፨
- ከሠተ፡ ለኪ፡ ትንሣኤሁ፡ ቅድመ፡ ኵሉ፡ ዓለም፨
- አመ፡ ውስተ፡ ገነት፡ ቆመ፡ ፈጣሪ፡ ግሩም፨
-
- ሰላም፡ ለትንሣኤ፡ ሥጋኪ፡ አመ፡ ደኃራዊ፡ ዕለት፨
- እንተ፡ ይከብት፡ ሱራፊ፡ በንፍሐተ፡ ቀርን፡ ዕምርት፨
- መግደላዊት፡ ማርያም፡ ማዕከለ፡ ጉቡኣን፡ አርድዕት፨
- ህየ፡ ሰበኪ፡ ዜና፡ ትንሣኤ፡ ቃል፡ ቅድስት፨
- እስከነ፡ አንከራ፡ አሐትኪ፡ አንስት፨
-
- ይትባረክ፡ እግዚአብሔር፡ ዘአፈጸመኒ፡ ሊተ፨
- እንብብ፡ ዘለኪ፡ ውዳሴ፡ ከመ፡ ኪሩቤል፡ ስብሐተ፨
- መግደላዊት፡ ማርያም፡ እስእለኪ፡ ስእለተ፨
- ከመ፡ ትንግርኒ፡ ወታይድዕኒ፡ ብስራተ፨
- እንዘ፡ ትብሊ፡ ፍቁርየ፡ ኢትመውት፡ ሞተ፨
-
- መጠነ፡ አቅረብኩ፡ ለኪ፡ አምኃ፡ ስብሐት፡ ወውዳሴ፨
- እምበረከትኪ፡ ሕቀ፡ እንዘ፡ እከውን፡ ኀሣሤ፨
- መግደላዊት፡ ማርያም፡ ዘተአመንኪ፡ ቅድመ፡ ሥላሴ፨
- ለፀርየ፡ ፈርኦን፡ ብእሴ፡ ካሕድ፡ ወላዴ፡ ከዊን፡ አባሴ፨
- ውስተ፡ ቀላየ፡ ሀጕል፡ ያስጥሞ፡ ሥልጣንኪ፡ ሙሴ፨