Details
-
- ሰላም፡ ለፅንሰትኪ፡ ለሊቀ፡ ጳጳሳት፡ በጸሎቱ፨
- ወለልደትኪ፡ እምከርሥ፡ ለእግዚአብሔር፡ ጊዜ፡ ሥምረቱ፨
- እስመ፡ አንቲ፡ አርሴማ፡ ለጻህቅየ፡ ባዕልተ፡ ቤቱ፨
- ልሳንየ፡ አስተሰንአዊ፡ ተቅዋመ፡ ንባብ፡ ዝንቱ፨
- ማኅቶተ፡ ማሕሌት፡ ለኪ፡ ከመ፡ ዕሢም፡ ቦቱ፨
-
- ሰላም፡ ለዝክረ፡ ስምኪ፡ በሰንዱነ፡ ኪዳን፡ ጥብሉል፨
- ወለሥዕርትኪ፡ ሰላም፡ ለጽርየተ፡ ኅብሩ፡ ዕዱል፨
- ሥርጉተ፡ ትዕግሥት፡ አርሴማ፡ ወዑጽፍተ፡ ሐዲስ፡ ገድል፨
- ይጸሐፍ፡ በልሳንየ፡ ወበዘእንቲአየ፡ ቃል፨
- ማጾረ፡ ትርጓሜ፡ ረቂቅ፡ ኀይልኪ፡ ፊደል፨
-
- ሰላም፡ ለርእስኪ፡ ዕፍረተ፡ ሃይማኖት፡ ዘተቀብአ፨
- ወለገጽኪ፡ ላህይ፡ ብርሃነ፡ ልባዌ፡ ዘተመልአ፨
- አርሴማ፡ እግዚእኪ፡ ሶበ፡ ኀሠሠ፡ ርሱአ፨
- እምሰማየ፡ ብዕል፡ ውስተ፡ ምድረ፡ ንዴት፡ አይኅዐ፨
- እስከ፡ ዲበ፡ መስቀል፡ ረከበ፡ ግዱፈ፡ በግዐ፨
-
- ሰላም፡ ለፍልሰተ፡ ሥጋኪ፡ በቃለ፡ ፈጣሪ፡ ዘተቀደሰ፨
- ወንብረተ፡ ዝንቱ፡ ዓለም፡ እንተ፡ ኢኀሠሠ፨
- አርሴማ፡ ብፅዕት፡ ከመ፡ ኢይርአይ፡ ተጽናሰ፨
- ሴስይኒ፡ እመዝገብኪ፡ እስመ፡ ኢይክል፡ ሐሪሰ፨
- ወእስእለኪ፡ ተሀብኒ፡ ሐፍሰ፨
-
- ሰላም፡ ለዘአዕረፉ፡ ምስሌኪ፡ ዕሥራ፡ ወሰብዓቱ፡ ሰማዕታት፨
- ረድኤቶሙ፡ ትረድ፡ ላዕሌየ፡ ዘምስለ፡ ብዙኅ፡ ምሕረት፨
- ወኀበ፡ ሀለወ፡ ስሞሙ፡ ምስለ፡ ስምኪ፡ ቅድስት፨
- ወዓዲ፡ ኢይቅረብ፡ ሕማመ፡ ብድብድ፡ ወሞት፨
- በኵሉ፡ ጊዜ፡ ወበኵሉ፡ ሰዓት፨
-
- ስብሐት፡ ለአብ፡ ለዘፈጠረ፡ ኪያነ፨
- ወስብሐት፡ ለወልድ፡ እንተ፡ ረድአነ፡ ፍጡነ፨
- ወስብሐት፡ ለመንፈስ፡ ቅዱስ፡ ዘጸገወነ፡ ሥልጣነ፨
- ሰላመኪ፡ ንንብብ፡ አርሴማ፡ ወማሕሌተኪ፡ እሙነ፨
- ኵለሄረድኤትኪ፡ የሀሉ፡ ምስሌነ፨