መልክአ፡ ዮሐኒ፡ ዘደብረ፡ ዓሣ፡
Malkəʾa Yoḥanni za-Dabra ʿĀśā
Image of Yoḥanni of Dabra ʿĀśā
-
- ዜና፡ ተኣምሪከ፡ እንግር፡ ለእለ፡ ይትገብኡ፡ ሰብእ፨
- ውስተ፡ ቤትከ፡ ክቡር፡ መአዝነ፡ ዓለም፡ አርባዕ፨
- ነሣኤ፡ በረከት፡ ዮሐኒ፡ እምኀበ፡ እግዚእ፨
- ይስብሮ፡ አምሳለ፡ ዕፅ፡ ለዕበድየ፡ መግዝዕ፨
- ጥበበ፡ ዚአከ፡ አንበሳ፡ ጽኑዕ፨
-
- ሰላም፡ ለፅንሰትከ፡ እምቃለ፡ ዳዊት፡ ዘተጠየቀ፨
- በኅሊና፡ ጌጋይ፡ ፅንሰቶ፡ እምዘዘከረ፡ ጥንቁቀ፨
- ፈለገ፡ አእምሮ፡ ዮሐኒ፡ ዘታፈአለፍል፡ ወርቀ፨
- አውሕዝ፡ ሊተ፡ ለገብርከ፡ ፈልፈለ፡ አብርሃም፡ ጽድቅ፨
- አመ፡ በጌጋይ፡ ይከሥት፡ ማየ፡ ኄር፡ ኀልቀ፨
-
- ሰላም፡ ለልደትከ፡ እምዘተወጥን፡ ውስቴታ፨
- በብሂለ፡ ስቡሕ፡ ወውሱድስ፡ ለቤተ፡ ክርስቲያን፡ ማሕሌታ፨
- ቢጸ፡ ዐርከ፡ ሥሉስ፡ ዮሐኒ፡ ነሣኤ፡ ጸሎት፡ ወልታ፨
- ኩነኒ፡ አበ፡ ነፍስየ፡ ከመ፡ ኢይኩን፡ እጓለ፡ ማውታ፨
- አመ፡ ለጉቡኣን፡ ይዴለዉ፡ ፯ቱ፡ ሐተታ፨
-
- ሰላም፡ ለዝክረ፡ ስምከ፡ እምዘትረ፡ ጸቃውዕ፡ ጥዑም፨
- ወለሥዕርትከ፡ ሰላም፡ ዘኵለንታሁ፡ አዳም፨
- ባሕታዌ፡ ምኔት፡ ዮሐኒ፡ ወብእሴ፡ ገዳም፨
- እፎ፡ እፎ፡ በፍርሀተ፡ ብእሲ፡ ሥዩም፨
- መነነተከ፡ ወላዲት፡ እም፨
-
- ሰላም፡ ለቆምከ፡ ዘተመሰለ፡ በቀልተ፨
- ወለመልክእከ፡ ጽጌ፡ ዘይሠረጉ፡ ምኔተ፨
- በሕገ፡ ፍጡራን፡ ዮሐኒ፡ እንበለ፡ ታእምር፡ መዊተ፨
- አንገሠከ፡ አምላክከ፡ ዘኢተሐልፍ፡ መንግሥተ፨
- በይነ፡ ዘተወረውከ፡ ጸድፈ፡ እምትርአይ፡ ብእሲተ፨
-
- ብሔረ፡ ሕያዋን፡ እንተ፡ ትበጽሕ፡ ከመ፡ ትረሲ፡ ህላዌ፨
- ምስለ፡ ነቢያት፡ ክልኤቱ፡ ኅጡኣነ፡ ሕማም፡ ወደዌ፨
- ርግበ፡ ተየውሖ፡ ዮሐኒ፡ ወጠቢበ፡ ጠቢብ፡ አርዌ፨
- እግዚእከ፡ ርኅሩኀ፡ ልብ፡ አመ፡ ይፌኑ፡ ድምፃዌ፨
- ረስየኒ፡ እትቀበል፡ መርዓዌ፨
-
- ለእለ፡ ተዝካረከ፡ ገብሩ፡ እንዘ፡ ሀለዉ፡ በምድር፨
- ውዳሴከ፡ ሐለዩ፡ በቃለ፡ ሐዋዝ፡ መዝሙር፨
- ኦዮሐኒ፡ ብእሴ፡ እግዚአብሔር፨
- ዕሥዮሙ፡ ዕሤተ፡ ጽድቅ፡ ውስተ፡ ሰማያዊት፡ ሀገር፨
- እስመ፡ ለቅኑይ፡ ዕሤቱ፡ ንቡር፨