Details
-
- እግዚአብሔር፡ ባዕለ፡ ጸጋ፡ ጸጋዌ፡ ጸጋ፡ በከንቱ፨
- ወጽንዐ፡ ድኩማን፡ ኀይለ፡ ረድኤቱ፨
- በጠፈረ፡ ልብየ፡ ያሥርዕ፡ ፀሓየ፡ ጥበብ፡ ለለ፡ ዕለቱ፨
- ከመ፡ ይስድድ፡ ግላ፡ ጽልመት፡ እንተ፡ ሀለወት፡ ውስቴቱ፨
- ድርሳነ፡ መልክኡ፡ ለቶማስ፡ ከመ፡ እርአይ፡ ቦቱ፨
-
- ሰላም፡ ለዝክረ፡ ስምከ፡ ነገረ፡ ፍሥሓ፡ ዘባቲ፨
- ወሰላም፡ ካዕበ፡ ለሥዕርተ፡ ርእስከ፡ ለለ፡ አሐቲ፨
- ወላዴ፡ ኅሩያን፡ ቶማስ፡ ዘመነንከ፡ ግብረ፡ መዋቲ፨
- አጽንዖ፡ ለሰብእናየ፡ በረድኤትከ፡ እንታክቲ፨
- እስመ፡ ድክምተ፡ ኀይል፡ ጥቀ፡ ወኅዝንት፡ ይእቲ፨
-
- ሰላም፡ ለግንዘተ፡ ሥጋከ፡ ዘሥርዓተ፡ አበው፡ ሥርዓታ፨
- ወለመቃብሪከ፡ ዝጉብ፡ ባሕርየ፡ ሥጋ፡ በውስቴታ፨
- አንጽዐኒ፡ ቶማስ፡ ለጸዊረ፡ መስቀል፡ ዘጎልጎታ፨
- ዓለምነሰ፡ ዘአሥዋከ፡ ድካም፡ ፍኖታ፨
- ለቤተ፡ ምግባር፡ አፀወት፡ ኆኅታ፨
-
- ሰላም፡ ለከ፡ ለባሴ፡ ጻማ፡ ወሕማም፨
- በእንተ፡ ኢየሱስ፡ ክርስቶስ፡ አኃዜ፡ ኵሉ፡ ዓለም፨
- ቶማስ፡ ርእሳ፡ ለደብረ፡ ማርያም፨
- በእንቲአነ፡ ጸሊ፡ ኀቤሃ፡ በጸሎትከ፡ ፍጹም፨
- አምጣነ፡ ርኅርኅት፡ ይእቲ፡ ወሠናይት፡ እም፨