Details
-
- በስመ፡ አብ፡ ወወልድ፡ ወመንፈስ፡ ቅዱስ፡ መሠረተ፡ ሰማይ፡ ወምድር፨
- ወጠፈረ፡ ዓለም፡ እወጥን፡ ሕንጻ፡ መነኮሳት፡ አድባር፨
- ሐመረ፡ ኅሊናየ፡ ሐድፍ፡ ቡሩክ፡ አምላክ፡ መምህር፨
- ለጥበብ፡ ወአእምሮ፡ ነጋድያነ፡ ዕሙቅ፡ ምሥጢር፨
- ከመ፡ ትጕሥኦሙ፡ ልቡናየ፡ ባሕር፨
-
- ሰላም፡ ለፅንሰትከ፡ አመ፡ ሰብዑ፡ ለነሐሴ፨
- ፅንሰተ፡ ማርያም፡ ወፍልሰታ፡ ወክብረ፡ በዓሎሙ፡ ለሥላሴ፨
- በረከተ፡ አውሴ፡ ወኤፍሬም፡ ቡሩክ፡ አምላክ፡ መትልወ፡ ሙሴ፨
- ጸግወኒ፡ እንብብ፡ ውዳሴከ፡ ምስለ፡ ዘማርያም፡ ውዳሴ፨
- አምጣነ፡ እስራኤል፡ አንተ፡ ወአነ፡ ምናሴ፨
-
- ሰላም፡ ለዝክረ፡ ስምከ፡ ዘያስትፌሥሑ፡ ወይሴብሕዑ፡ ልስሙ፨
- ካህናተ፡ ዓለም፡ ታቦር፡ ወአርሞንኤም፡ ሥነ፡ ገዳሙ፨
- ቡሩክ፡ አምላክ፡ ማያት፡ አመ፡ በደመናት፡ ጸልሙ፨
- ኀይለከ፡ አንሥእ፡ እደዊከ፡ ገጸ፡ ዚአነ፡ ይኅትሙ፨
- ከመ፡ ኀተሞ፡ ያዕቆብ፡ ለኤፍሬም፡ ቀዲሙ፨
-
- ሰላም፡ ለዕርገትከ፡ ኀበ፡ መንበረ፡ አብ፡ ተሰፍሐ፨
- ወኀበ፡ ተለዐለ፡ ወልድ፡ ወመንፈስ፡ ቅዱስ፡ ተሰብሐ፨
- ቡሩክ፡ አምላክ፡ በለነ፡ እምአርያም፡ እስከ፡ ትለብሱ፡ ኀይለ፡ ጽርሓ፨
- ንበሩ፡ ደርገ፡ ለደብርየ፡ ኢየሩሳሌም፡ ኀቤሃ፨
- እፌኑ፡ ለክሙ፡ ጰራቅሊጦስሃ፨
-
- ናሁ፡ ሠናይ፡ ወናሁ፡ አዳም፨
- ፍልሰተ፡ ማርያም፡ ድንግል፡ ወዕርገተ፡ ቡሩክ፡ አኃወ፡ ጾም፨
- ሶበ፡ ይሄልዉ፡ ኅቡረ፡ እግዚአ፡ ጊዮርጊስ፡ ፍልሰተ፡ አፅም፨
- አምጣነ፡ ህየ፡ አዘዘ፡ በረከቶ፡ ወይባርኩነ፡ ዮም፨
- ቡሩክ፡ አምላክ፡ አበ፡ ኵሉ፡ ወድንግል፡ እም፨
-
- አምኃ፡ ሰላም፡ አቅረብኩ፡ በቃለ፡ መዐርዒር፡ ጕርዔ፨
- ለልደተ፡ ድንግል፡ ንግሥት፡ ወንጉሠ፡ ዓለም፡ ትንሣኤ፨
- ለስብሐተ፡ ሥሉስ፡ ቅዱስ፡ ቡሩክ፡ አምላክ፡ ቀርነ፡ ጽዋዔ፨
- አስተጋብአነ፡ ንስብክ፡ ወንዜኑ፡ ማእከለ፡ ደብረ፡ ኮል፡ ጉባኤ፨
- ትንሣኤ፡ ወልደ፡ አብ፡ ወንግበር፡ ልደታተ፡ ክልኤ፨
-
- ሰላም፡ ለጽዋዔ፡ ስምዕከ፡ እምዘ፡ ወለደት፡ እልፈ፡ ወአእላፈ፨
- ደብረ፡ ማርያም፡ ዝየ፡ ኀበ፡ ዕረፍት፡ ተነጽፈ፨
- ቡሩክ፡ አምላክ፡ ረድእ፡ ፊልሞና፡ ዘአስተናበብከ፡ አእዋፈ፨
- ቀላያተ፡ እመ፡ ወረድኩ፡ ኩነኒ፡ ኀዳፈ፨
- ወእመ፡ ዐረጉ፡ ሰማያተ፡ ዘኪሩቤል፡ ክንፈ፨
-
- ሰላም፡ ለጥብዐተ፡ ስምዕከ፡ እንዘ፡ ይብል፡ መነ፡ ተኀሥሡ፨
- ለሐራ፡ ሠገራት፡ ዘወፅአ፡ ወኢፈርሀ፡ ፀአተ፡ ነፍሱ፨
- ቡሩክ፡ አምላክ፡ ብፁዕ፡ ወኅሩይ፡ ዘአፍቀረከ፡ እምንእሱ፨
- እስመ፡ በስሐት፡ የዐርግ፡ ደብረ፡ ኮል፡ ወገነታቲሃ፡ ያንሶሱ፨
- ወእንተ፡ መከረ፡ ብከ፡ መከረ፡ በርእሱ፨
-
- ሰላም፡ ሰላም፡ ለፍጻሜ፡ ስምዕከ፡ እብሎ፨
- በአንቅዖ፡ ደም፡ ወማይ፡ ለወልደ፡ ማርያም፡ ዘተመሰሎ፨
- ቡሩክ፡ አምላክ፡ ቶማስ፡ ዘመርአስ፡ ፈጻሜ፡ ስምዕ፡ ወተጋድሎ፨
- እስመ፡ ለስምዕከ፡ ኢዮብ፡ በደመና፡ እግዚአብሔር፡ ተሰአሎ፨
- ወሰማየ፡ ለነፍስከ፡ ኤልያስ፡ አልዐሎ፨
-
- ስብሐት፡ ለአብ፡ ለዘአንቅሐኒ፡ ለወጢን፨
- ወስብሐት፡ ለወልድ፡ ዘአፈጸመኒ፡ በዛኅን፨
- ወስብሐት፡ ለመንፈስ፡ ቅዱስ፡ ዘአጽንዐኒ፡ እምርስዓን፨
- ወበአኅብሮ፡ ይበሉ፡ ካህናት፡ ምስለ፡ መላእክት፡ ወጻድቃን፨
- አኰቴት፡ ወክብር፡ ለአብ፡ ወወልድ፡ ወመንፈስ፡ ቅዱስ፡ ይእዜኒ፡ ወዘልፈኒ፡ ወለዓለመ፡ ዓለም፡ አሜን፨