Details
-
- ተዘከርኩ፡ በሌሊት፡ ለኢትዮጵያ፡ ኂሩታ፨
- ወሠናይታ፡ ኀበ፡ እግዚአብሔር፡ አስተበቁዖታ፨
- ከመ፡ ሕገ፡ አምላኩ፡ ያነብብ፡ በመዓልት፡ ወበሌሊታ፨
- እንዘ፡ እዛዋዕ፡ ምስለ፡ ልብየ፡ ለኅሊናየ፡ ንቅሕታ፨
- በሳምናዊት፡ ዘመን፡ ዘወለደት፡ መንታ፨
-
- ኢትዮጵያ፡ ታበጽሕ፡ ዕደዊሃ፡ ኀበ፡ እግዚአብሔር፨
- ከመ፡ ብንተ፡ ዐይን፡ ይዕቀባ፡ እምኀይለ፡ ጸላኢ፡ ወፀር፨
- እንዘ፡ ትብል፡ አምላኪየ፡ ዘበሰማያት፡ ወምድር፨
- ይሥዐር፡ ጸብአ፡ እምኔሃ፡ ወእምአጽናፈ፡ ምድር፨
- አምጣነ፡ ተስፋሃ፡ ጽኑዕ፡ እምኵሉ፡ አህጉር፨
-
- ሰላም፡ ለዝክረ፡ ስምኪ፡ ጊዜ፡ ተጸውኦ፡ አዳም፨
- ከመ፡ አስካለ፡ ወይን፡ ዘገነት፡ ወከመ፡ ስማ፡ ለማርያም፨
- ኢትዮጵያ፡ ዘዮም፡ ወአቢሲኒያ፡ ዘትማልም፨
- በዝክረ፡ ስምኪ፡ እትፌሣሕ፡ ለዓለም፨
- አምጣነ፡ በተግባር፡ ግብርኪ፡ ወአኮ፡ በስም፨
-
- ሰላም፡ እብል፡ ለላዕከ፡ ቤቴል፡ ሥዕርትኪ፨
- ዘበላዕለ፡ ርእስ፡ አድነነ፡ ወዘተሐጽነ፡ በርእስኪ፨
- ኢትዮጵያ፡ ሀገሩ፡ ለቀዳማዊ፡ በኵርኪ፨
- አቤሜሌክ፡ ጴጥሮስ፡ ኢትዮጵያዊ፡ ኢይርአይ፡ ሙስናኪ፨
- አመ፡ በፄዋዌ፡ መፍርህ፡ ተመነየ፡ ለኪ፨
-
- ሰላም፡ ለመልክእኪ፡ እምውሉደ፡ ዓለም፡ ቅድው፨
- እንዘ፡ በጸጋ፡ ይልሂ፡ እምነ፡ አህጉር፡ ወበድው፨
- ኢትዮጵያ፡ ምድርኪ፡ እመዐዛ፡ ጽጌ፡ ፍትው፨
- መዐዛ፡ ዕፍረትኪ፡ ምግባሮሙ፡ ለቅዱሳን፡ አበው፨
- አምጣነ፡ ምዑዝ፡ ጼናሁ፡ እምኵሉ፡ አፈው፨
-
- ሰላም፡ ለክሙ፡ ጳጳሳት፡ ዘኢትዮጵያ፨
- ወነገሥታተ፡ ምድር፡ ዘአቢሲንያ፨
- ከመ፡ እምኵሉ፡ ጸለየ፡ ጎርጎርዮስ፡ ለሰብአ፡ አርማንያ፨
- አፍቀርክዋ፡ ወአእመርክዋ፡ እምዐጸደ፡ ግብጽ፡ ወሶርያ፨
- ለኢትዮጵያ፡ ምድርክሙ፡ ዘሠናይ፡ ላህያ፨
-
- አምኀ፡ ሰላም፡ አቅረብኩ፡ ለክብርኪ፡ ኢትዮጵያ፡ ቅድስት፨
- ኦሆ፡ በሐሊት፨
- ሶበ፡ አደመኒ፡ ሊተ፡ ክብረ፡ ዚኣኪ፡ ሥነ፡ ሕይወት፨
- ፈቀድኩ፡ እንግር፡ ክብረ፡ ዚአኪ፡ ለቀደምት፡ ወለደኃርት፨
- ተዘኪርየ፡ ሠናይተኪ፡ በኵሉ፡ ሰዓት፨
-
- በክብር፡ ወበስብሐት፡ እመ፡ ርኢኩ፡ ሠናይቶ፨
- ለመዋዕለ፡ ሣህልኪ፡ ኵሉ፡ ወለሕይወትኪ፡ ተፍጻሜቶ፨
- ሀገረ፡ ቅዱሳን፡ ኢትዮጵያ፡ እንተ፡ ኢትክሊ፡ ተከብቶ፨
- ናሁ፡ ፈጸምኩ፡ ተናግሮ፡ ወለክብርኪ፡ አእኩቶቶ፨
- ወኢይንበር፡ በላዕሌኪ፡ ዘይነብብ፡ ከንቶ፨