Details
-
- ኀበ፡ ክርስቶስ፡ አምላኪየ፡ ኣቀድም፡ ጸልዮ፨
- ወኀበ፡ ማርያም፡ እስእል፡ በእንተ፡ ጌጋይየ፡ አስተሥርዮ፨
- ድርሳነ፡ ሠለስቱ፡ ደቂቅ፡ ከመ፡ እንግር፡ በተጋንዮ፨
- እደ፡ ኅሊናየ፡ ይጽብት፡ ለመጽሐፍ፡ ቀላዮ፨
- [This line is missing.]
-
- በከመ፡ ድኅንክሙ፡ ቅድመ፡ እምእቶነ፡ እሳት፡ ነዳዲ፨
- በትእዛዘ፡ አምላክ፡ እብኖዲ፨
- አናንያ፡ ወአዛርያ፡ ወሚሳኤል፡ ዓዲ፨
- አድኅኑኒ፡ ወባልሑኒ፡ እመሥገርተ፡ ሰይጣን፡ ረዋዲ፨
- በቀለ፡ አቡየ፡ ወእምየ፡ እፍዲ፨
-
- ሰላም፡ እብል፡ ለዝክረ፡ ስምክሙ፡ በኢያንትጎ፨
- ለልብየ፡ መዋቲ፡ ሐብለ፡ ፍቅርክሙ፡ እስመ፡ መዘጎ፨
- ሲድራቅ፡ ወሚሳቅ፡ ወአብደናጎ፨
- ከመ፡ ዐቀብክሙ፡ ለልዑል፡ ሕጎ፨
- ኰነነ፡ ጸሎትክሙ፡ ሰማየ፡ ዐሪጎ፨
-
- ሰላም፡ ለሥዕርተ፡ ርእስክሙ፡ ነደ፡ እሳት፡ ዘኢለከፎ፨
- ወለርእስክሙ፡ ሰላም፡ ርስነ፡ ነበልባል፡ ዘኢቀሰፎ፨
- ሠለስቱ፡ ደቂቅ፡ ቅጥቀጥተ፡ ርእሱ፡ ለግልፎ፨
- ገብርኤል፡ መልአክክሙ፡ ነደነክሙ፡ አክናፎ፨
- ከመ፡ ዘይከድኖ፡ ለንህብ፡ እደ፡ ሰብእ፡ ቀፎ፨
-
- ሰላም፡ ለመቃብሪክሙ፡ ኀበ፡ ሖርክሙ፡ ምድረ፡ ጽማዌ፨
- ዳንኤል፡ ነቢይ፡ አመ፡ ቀተሎ፡ ለአርዌ፨
- ሠለስቱ፡ ደቂቅ፡ ምሉኣነ፡ ጥበብ፡ ወልባዌ፨
- አድኅኑኒ፡ ወባልሑኒ፡ እመሥገርተ፡ ሕማም፡ ምንሳዌ፨
- በላዕለ፡ እምየ፡ ዘአምጽአ፡ ደዌ፨
-
- ይደልዎሙ፡ ብፅዐ፡ ወመሐና፡ ለዘሰመዩ፨
- ወኪያክሙ፡ ዘፈረዩ፨
- ሠለስቱ፡ ደቂቅ፡ በእንቲአየ፡ ጸልዩ፨
- እምልብየ፡ ወእምኅሊናየ፡ ሦከ፡ ኀጢአት፡ ጻሕይዩ፨
- ከመ፡ በዲቤሁ፡ ኢይፍረይ፡ ለስሕተት፡ ጌጋዩ፨
-
- አምኃ፡ ሰላም፡ ወፍቅር፡ መሥዋዕተ፡ ልቡና፡ ወፈውስ፨
- በዝ፡ ብሔር፡ ወበዝመቅደስ፨
- ሠለስቱ፡ ደቂቅ፡ ነቢያተ፡ ነነዌ፡ ወፋርስ፨
- ጸሪቀ፡ መበለት፡ አሐቲ፡ በከመ፡ ተወክፈ፡ ክርስቶስ፨
- ተወከፍ፡ ጸሎትየ፡ እንተ፡ ባሕር፡ ወየብስ፨
- ተረፈ፡ መልክእ፡
-
- ሰማዕታተ፡ አምላክ፡ ልዑል፡ ዘኢሰገድክሙ፡ ለምስል፨
- ወዘአቍረርክሙ፡ ርስነ፡ ነበልባል፨
- አናንያ፡ ወአዛርያ፡ ወሚሳኤል፨
-
- ለእግዚአብሔር፡ አምላክ፡ በይነ፡ ዘዐቀብክሙ፡ ሕጎ፨
- በነደ፡ እሳት፡ ተወድዩ፡ በከርሠ፡ ነሪጎ፨
- ሲድራቅ፡ ወሚሳቅ፡ ወአብደናጎ፨
-
- በይነ፡ ዘአቅረብኩ፡ ለክሙ፡ ድርሳነ፨
- ኵሎ፡ ዕለተ፡ ወዘመነ፨
- ሠለስቱ፡ ደቂቅ፡ ሀቡኒ፡ ኪዳነ፨
- ምስሌክሙ፡ ከመ፡ እንበር፡ አነ፨