Details
-
- ሰላም፡ ለዝክረ፡ ስምኪ፡ ዝክረ፡ መንፈስ፡ ቅዱስ፡ ሕይወት፨
- እንተ፡ ባረኮ፡ ይትረዓይ፡ በዐይነ፡ ኵሉ፡ ፍጥረት፨
- ፍቅርተ፡ ክርስቶስ፡ ኤዶም፡ ዘመዐዛኪ፡ ረድኤት፨
- ሥቅይዋ፡ ለለ፡ ጊዜሁ፡ ለሰብእናየ፡ ገነት፨
- ኤፌሶን፡ ቀኖና፡ ሕግ፡ ወግዮን፡ ጸሎት፨
-
- ሰላም፡ ለሥዕርተ፡ ርእስኪ፡ እለ፡ ተቀብኣ፡ ቅብአ፡ አሚን፨
- ህየንተ፡ ሣራ፡ ወርብቃ፡ በእደ፡ ፈጣሪ፡ መድኅን፨
- ፍቅርተ፡ ክርስቶስ፡ ፀሓይ፡ ዘሥርጋዌኪ፡ ብርሃን፨
- ኢክህሉ፡ ቀሪቦተኪ፡ ካህናተ፡ ሐሰት፡ አብዳን፨
- ወኢረከበኪ፡ ጸላኢ፡ ሰይጣን፨
-
- ሰላም፡ ለመቃብርኪ፡ እምጽርሐ፡ አርያም፡ እለ፡ ወረዱ፨
- ለዐቂቦቱ፡ መላእክት፡ ክብረ፡ ዚአሁ፡ አግሀዱ፨
- ፍቅርተ፡ ክርስቶስ፡ ብፅዕት፡ ለእግዚአብሔር፡ በፈቃዱ፨
- ኢክህሉ፡ ቀረቦተኪ፡ እስመ፡ ናፈቁ፡ ወክሕዱ፨
- በግብረ፡ እበዱ፡ ለንስጥሮስ፡ እኩያን፡ ውሉዱ፨
-
- ሰላምኪ፡ ኢይትርፍ፡ ጻማሁ፡ ለነባቤ፡ ዝንቱ፡ ድርሳን፨
- እስመ፡ ኑኀ፡ ዕድሜ፡ ይትዌከፍ፡ እምእግዚአብሔር፡ መድኅን፨
- ፍቅርተ፡ ክርስቶስ፡ ቅድስት፡ በስእለትኪ፡ ኪዳን፨
- ወይድኀን፡ ጊዜ፡ ሐተታ፡ እምጻዕረ፡ ኵነኔ፡ ወደይን፨
- እስመ፡ ጸላኤሁ፡ እኩይ፡ ረቂቅ፡ ሰይጣን፨
- ተረፈ፡ መልክእ፡
-
- ሰላም፡ ለኪ፡ ፍቅርተ፡ ክርስቶስ፡ ፌበን፡ በሰረገላ፡ ኀዘን፡ ዘተጽዕኑ፨
- ማኅበራንኪ፡ እለ፡ የኀዝኑ፨
- በጊዜ፡ ሞትኪ፡ እለ፡ መነኑ፨
-
- ሰላም፡ ለኪ፡ ፍቅርተ፡ ክርስቶስ፡ እምነ፡ በልቡናኪ፡ ቤት፡ እንተ፡ ኢቦአ፡ ናፍቆ፨
- ቃለ፡ ፈጣሪ፡ ድምፀ፡ መሰንቆ፨
- ዘትሰምዒ፡ ዘልፈ፡ በአድለቅልቆ፨
- ጸግውኒ፡ ሊተ፡ ለልብየ፡ ጻህቆ፨
-
- ሰላም፡ ለኪ፡ ፍቅርተ፡ ክርስቶስ፡ ቅድስት፡ ሶበ፡ ጸዋዕኩኪ፡ በተአምኖ፨
- ለማእበለ፡ ኀዝን፡ ዘታዝኅኖ፨
- አውፅእኒ፡ ሊተ፡ እምተኮንኖ፨
- በእንተ፡ ቃለ፡ አብ፡ ዘመጽአ፡ ሰብአ፡ ከዊኖ፨