Bibliography
Z
ሄኖክ ገብረ ሚካኤል, ed. ገድል፡ ወተአምር፡ ዘአቡነ ስምዖን ወመልክዐ፡ ደቂቀ አቡነ አብሳዲ። ግእዝ-ትግርኛ, ፳፻፲፭ ዓ/ም.
-
- በስመ፡ እግዚአብሔር፡ ሕያው፡ መስተሣህል፡ ወመሓሪ፨
- በአካል፡ ሥላሴ፡ ወበመለኮት፡ ዘይዔሪ፨
- ፈጣሬ፡ ኵሉ፡ ፍጥረት፡ ወሀብታተ፡ ኵሉ፡ ፈጣሪ፨
- ጸግወኒ፡ ልበ፡ ድርሰት፡ መልክአ፡ ምናሴ፡ በአምሳለ፡ ዐዘቅት፡ እክሪ፨
- ወኀጢአትየ፡ በምልአት፡ አስተሥሪ፨
-
- አኮ፡ በአብዝኆ፡ አላ፡ በአውኅዶ፨
- ድርሳነ፡ መልክእከ፡ እንብብ፡ እግዚአብሔር፡ ዘንእዶ፨
- ዕጉሠ፡ መከራ፡ ምናሴ፡ ዘካርያስ፡ ወልደ፡ ሀዶ፨
- ለሦክ፡ ኀጢአትነ፡ በእሳተ፡ ጽድቅከ፡ ታንድዶ፨
- ንትመሐፀን፡ ኀቤከ፡ ወንሰብክ፡ ወልዶ፨
-
- ሰላም፡ ለዝክረ፡ ስምከ፡ ዝክረ፡ ምናሴ፡ ዘነሥአ፨
- ከመ፡ ቀተልኮ፡ ለፀር፡ ጸላኤ፡ ሠናያት፡ ኅቡአ፨
- ምናሴ፡ አዳም፡ ዘተሰመይከ፡ እግዚአ፨
- ተራድኣ፡ ለነፍስየ፡ አመ፡ ጊዜ፡ ሁከት፡ መጽኣ፨
- እስመ፡ ኢያርትዐት፡ ቅድመ፡ ግብረ፡ ጽድቅ፡ ዘርዐ፨
-
- ሰላም፡ ለመቃብሪከ፡ እንተ፡ በውስቴቱ፡ ተወድየ፨
- ንጹሐ፡ ንጹሓን፡ ሥጋከ፡ እንተ፡ ተመሰለ፡ ለየ፨
- ምጥወ፡ ኪዳን፡ ምናሴ፡ እምነ፡ ፈጣሪ፡ ሰማየ፨
- በለኒ፡ በጣዕመ፡ ቃልከ፡ ጊዜ፡ ተኀልፍ፡ ነፍስየ፨
- ለእመ፡ ሀለኩከ፡ አንሰ፡ ኢትፍራህ፡ ወልድየ፨
-
- ለስመ፡ ምናሴ፡ ነቢይ፡ ስመ፡ ዚአሁ፡ ዘወረስከ፨
- ወከመ፡ ካልእ፡ በኪሞስ፡ ወልደ፡ ኤዎስጣቴዎስ፡ አቡከ፨
- እምነ፡ ቅዳሳን፡ ምናሴ፡ መኑ፡ ዘይተግህ፡ ከማከ፨
- እንዘ፡ ንብል፡ ኵለሄ፡ ንሕነ፡ ካህናቲከ፨
- በቃለ፡ መልክእከ፡ ንሴብሕ፡ ወንዜምር፡ ለከ፨
-
- ናሁ፡ ተጽሕፈ፡ መልክእ፡ ዘለከ፡ ውዳሴ፨
- ኵሉ፡ ዘአፍኣ፡ እንበለ፡ ውሳጣይ፡ ካዕሴ፨
- መራሔ፡ ምእመናን፡ ሕዝብ፡ ምናሴ፡ ካልአ፡ ሙሴ፨
- ወኀደገ፡ ሎሙ፡ ረድአ፡ ዚአከ፡ አውሴ፨
- አመ፡ ነገሩከ፡ ይሰዱከ፡ ሰማየ፡ ሥላሴ፨
-
- ስብሐት፡ ለእግዚአብሔር፡ ለፈጽሞ፡ ዝንቱ፡ መልክእ፨
- ዘመጠወነ፡ ክፍለ፡ እምዘዚአሁ፡ ጠባይዕ፨
- ባርከነ፡ ምናሴ፡ በቃለ፡ ኪዳንከ፡ ጽኑዕ፨
- ነጺሮሙ፡ ዘገበርከ፡ ወሰሚዖሙ፡ በርትዕ፨
- ይምጽኡ፡ ኀቤከ፡ እማእዝን፡ አርባዕ፨