Details
-
- ናሁ፡ እዌጥን፡ ዝክረ፡ ውዳሴከ፡ እስመ፡ ሆከኒ፡ ልማድ፨
- ወአስተናሥአኒ፡ ፈቃድ፡ በውስተ፡ ልብየ፡ አብድ፨
- ሠረቀ፡ ብርሃን፡ እንጦንዮስ፡ ወላዴ፡ አእላፍ፡ ውሉድ፨
- ጽርሕከ፡ ዕንቈ፡ ቢረሌ፡ ወዐረፍተ፡ ቤትከ፡ መረግድ፨
- መንፈለ፡ ተሐንጾ፡ አበአኒ፡ በሰማይ፡ ዐጸድ፨
-
- ሰላም፡ ለፅንሰትከ፡ በገራህተ፡ ማሕፀን፡ ሠናይ፨
- ወለልደትከ፡ ሰላም፡ በዘመነ፡ ማዕረር፡ ሐጋይ፨
- እስመ፡ ከመ፡ ዘርእ፡ አንተ፡ ዘርአ፡ መንፈስ፡ ቅዱስ፡ ሥርናይ፨
- ሠረቀ፡ ብርሃን፡ ዕንቈ፡ ሰንፔር፡ ሠረቀ፡ ብርሃን፡ ዕንቈ፡ ባሕርይ፨
- ሠረቀ፡ ብርሃን፡ ሐዋርያ፡ ሠረቀ፡ ብርሃን፡ ነቢይ፨
-
- ሰላም፡ እብል፡ ለዝክረ፡ ስምከ፡ ጼው፨
- ዘተሰውጠ፡ ቦቱ፡ ቅብአ፡ መንፈስ፡ ቅዱስ፡ ፍትው፨
- ሠረቀ፡ ብርሃን፡ መቃርስ፡ በወርቀ፡ ንጽሕና፡ ሥርግው፨
- ነዓ፡ ነዓ፡ ምስለ፡ ቅዱሳን፡ አበው፨
- አማሕፀንኩከ፡ ኢትትርፍ፡ በአምላክ፡ ሕያው፨
-
- ሰላም፡ ለትንሣኤከ፡ በዕለተ፡ ትንሣኤ፡ ደኃሪ፨
- ምስለ፡ መላእክት፡ አእላፍ፡ አመ፡ ይመጽእ፡ ፈጣሪ፨
- ሠረቀ፡ ብርሃን፡ ካህን፡ ኀጣዊኢነ፡ አስተሥሪ፨
- አስተምህር፡ ለደቂቅከ፡ ኀበ፡ አምላከ፡ ጽድቅ፡ መሓሪ፨
- ኢይርከበነ፡ እደ፡ ሞት፡ አሣሪ፨
-
- እምሰሚዐ፡ ሠናይ፡ ዜናከ፡ እመቀ፡ ኅሊና፡ ሆከኒ፨
- ጻማ፡ ትሩፋቲከ፡ እንብብ፡ ሞገሰ፡ ቃልከ፡ ሀበኒ፨
- አሠረ፡ እንጦኒ፡ በርናባስ፡ ሠረቀ፡ ብርሃን፡ ዴጋኒ፨
- አባ፡ አባ፡ በእዴከ፡ ባርከኒ፨
- ሥነ፡ ሞገስከ፡ ሞገሰ፡ ይኩነኒ፨