Details
-
- ቀዳሜ፡ ልሱሓን፡ ጰራቅሊጦስ፡ መንፈሰ፡ አብ፡ ወወልድ፨
- ልስሐተ፡ ልሳንየ፡ ይቅሥም፡ ከመ፡ ተላሜድ፨
- ዘሚካኤል፡ ክቡር፡ ዘመደ፡ ክቡራን፡ ዘመድ፨
- ከመ፡ እወድስከ፡ በመዝሙረ፡ ማሕሌት፡ ንዑድ፨
- ጥበበ፡ ሀበኒ፡ ለገብርከ፡ አብድ፨
-
- ሰላም፡ ሰላም፡ ለዝክረ፡ ስምከ፡ ቀናንሞ፨
- ወለሥዕርትከ፡ ዓዲ፡ ተጽፍሮ፡ ቈዝዕ፡ ዘኢአየሞ፨
- ዘሚካኤል፡ ካልኡ፡ ለዘሚካኤል፡ መምህረ፡ ዳሞ፨
- ዜና፡ ኂሩትከ፡ ለኅሊናየ፡ ገረሞ፨
- ወለአፉየ፡ እመዐር፡ ጥዕሞ፨
-
- ሰላም፡ ለመላትሒከ፡ ምዑዛነ፡ አፈው፡ ወርሔ፨
- ወእምሥነ፡ ጽሓይ፡ ወወርኅ፡ ጽዱላነ፡ ሥን፡ ወሱራሄ፨
- ዘሚካኤል፡ ኢያሱ፡ ወልደ፡ አብራንዮስ፡ ሙናሄ፨
- አዕርገኒ፡ ደብረ፡ ጸሎት፡ ወመልእልተ፡ መስቀል፡ ኵለሄ፨
- ከመ፡ እቤል፡ ህየ፡ ኤሎሄ፡ ኤሎሄ፨
-
- ሰላም፡ ለአእዳዊከ፡ በሰናስለ፡ ንጽሕ፡ እለ፡ ተአስሩ፨
- ወለመዛርኢከ፡ ደርገ፡ እንተ፡ ምስሌሆሙ፡ ኀብሩ፨
- ዘሚካኤል፡ ኅሩይ፡ ለእግዚአብሔር፡ ፍቁሩ፨
- አንተኑ፡ ገብረ፡ ክርስቶስ፡ ዘመነነ፡ ክብሩ፨
- ወሚመ፡ ማርቆስ፡ ዘቶርማቅ፡ ደብሩ፨
-
- ሰላም፡ ለግንዘተ፡ ሥጋከ፡ በልብሰ፡ ሐሜለት፡ አነዳ፨
- ወለመቃብሪከ፡ ሰላም፡ ለመቅደሰ፡ ጊዮርጊስ፡ ውስተ፡ ዐጸዳ፨
- ትሩፈ፡ ምግባር፡ ዘሚካኤል፡ ወምዑዝ፡ እምጽጌ፡ ረዳ፨
- አብራኪከ፡ ቅድመ፡ መንበሩ፡ ለአኃዜ፡ ዓለም፡ ይስግዳ፨
- ከመ፡ ያስተሥርያ፡ ዘዚአየ፡ ሰዳ፨
-
- ሶበ፡ አዕረፈ፡ ዘሚካኤል፡ ከዊኖ፡ ህልወ፡ በቤቱ፨
- እንዘ፡ ርሁብ፡ ወጽሙእ፡ ውእቱ፨
- ላእካነ፡ አብራንዮስ፡ አሜሃ፡ እለ፡ መጽኡ፡ ለአፍልሶቱ፨
- ተበሀሉ፡ በበይናቲሆሙ፡ ኀበ፡ እምድር፡ ተልዕሎቱ፨
- ለዐጸደ፡ መቅደሱ፡ ለጊዮርጊስ፡ በድነዝ፡ መቅበርቱ፨
-
- ይትባረክ፡ እግዚአብሔር፡ እምንዋመ፡ ሐኬት፡ ዘአንቃሕከኒ፨
- ድርሳነ፡ መልክእከ፡ አንብብ፡ አቅመ፡ ተክህለኒ፨
- ዘሚካኤል፡ አምሳሉ፡ ለገብረ፡ ክርስቶስ፡ መናኒ፨
- ዜና፡ ኂሩትከ፡ ለተናግሮ፡ ኖኀኒ፨
- ወትሩፋቲከ፡ ለነቢብ፡ በዝኀኒ፨
-
- ተወከፍ፡ አምኃየ፡ ህይንተ፡ ጸሪቅ፡ አሐዱ፨
- ኀበ፡ አንበረኒ፡ እንብብ፡ መንፈሰ፡ ወላዲ፡ ወወልዱ፨
- ዘሚካኤል፡ ጻድቅ፡ ለአብራንዮስ፡ ምክሐ፡ ነገዱ፨
- እንበለ፡ ዝንቱ፡ አምኃየ፡ ወንዋያትየ፡ ውሕዱ፨
- ወለንዴትየ፡ ኆፃ፡ ኢይትወሰን፡ ፍቅዱ፨
- ተረፈ፡ መልክእ፡
-
- ሰላም፡ ለከ፡ ዜና፡ ዝክርከ፡ ጥዑም፡ ውስተ፡ ክሉ፡ ዓለም፡ ዘተሰምዐ፨
- ወበአፈ፡ ኵሉ፡ ግብርከ፡ ተበፅዐ፨
- ዘሚካኤል፡ መናኔ፡ መርዐ፨
-
- ሰላም፡ ለከ፡ ዘሚካኤል፡ ባሕርይ፡ ዘኢይትረከብ፡ ሤጡ፨
- ማዕሰ፡ አንደየ፡ ሶበ፡ ሰጠጡ፨
- ወአዕፅምትየ፡ ኵሎ፡ ለእመ፡ ቀጥቀጡ፨
- እምረከቡ፡ ፍቅርከ፡ በውስጡ፨