Details
-
- ሰላም፡ ለፅንሰትክሙ፡ ወለልደትክሙ፡ እማሕፀን፨
- በሕገ፡ ሩካቤ፡ ሥሩዕ፡ ወበግዕዘ፡ ንኡስ፡ ሕፃን፨
- ደቂቀ፡ እንድርያስ፡ ሰማዕት፡ ጽዱላነ፡ ምግባር፡ ወሥን፨
- አብርሁ፡ አዕይንተ፡ ልብየ፡ በአእምሮ፡ መንፈስ፡ ብርሃን፨
- እምዜና፡ ዝክርክሙ፡ ኅዳጠ፡ እትናገር፡ በልሳን፨
-
- ሰላም፡ ለዝክረ፡ ስምክሙ፡ እምጸቃውዐ፡ መዐር፡ ጥዑም፨
- ወለሥዕርትክሙ፡ ሰላም፡ ዘሥነ፡ ራእዩ፡ አዳም፨
- ጥቡዓነ፡ ልብ፡ ሰማዕት፡ ዘፍናዊክሙ፡ ሰላም፨
- ሶበ፡ ሰማዕክሙ፡ ዜና፡ ጽድቁ፡ ለመምህረ፡ ቀኖና፡ ወጾም፨
- ከመ፡ ትንበሩ፡ ህየ፡ ወፃእክሙ፡ እምዓለም፨
-
- ሰላም፡ ለመቃብሪክሙ፡ ለደብረ፡ ጽጌ፡ በዐጸዳ፨
- እንተ፡ በላዕሌሃ፡ ወረደ፡ እክለ፡ አርያም፡ ጸዐዳ፨
- ዓዲ፡ ይውሕዝ፡ ፈለገ፡ ዮርዳኖስ፡ በዐውዳ፨
- ተሐበዩኒ፡ ሰማዕት፡ አመ፡ ዕለተ፡ በቀል፡ ወፍዳ፨
- ወአመ፡ ኢታድኅን፡ እም፡ ዘወለደት፡ ወልዳ፨
-
- በዓሥር፡ ዕለት፡ አርእስቲክሙ፡ ሶበ፡ ተወቅየ፨
- እንድርያስ፡ ብፁዕ፡ በከመ፡ ተነበየ፨
- መስፍነ፡ ሀገር፡ መጽአ፡ ሰሚዖ፡ በህየ፨
- አብድንተ፡ ሥጋክሙ፡ ሰማዕተ፡ ውስተ፡ ከርሠ፡ ምድር፡ ወደየ፨
- ወመቃብሪክሙኒ፡ አሥረጸ፡ መክርየ፨
-
- አምኃ፡ ማሕሌት፡ አቅረብኩ፡ ለመልክእክሙ፡ በጽዋዔ፨
- ኀይለ፡ እግዝእትየ፡ ድንግል፡ እንዘ፡ ይከውነኒ፡ ረዳኤ፨
- ተወከፉኒ፡ ሰማዕት፡ ምስለ፡ ያዕቆብ፡ ቀርነ፡ ጉባኤ፨
- ወአሠርግዉኒ፡ ልብሰ፡ ከብካብ፡ ጊዜ፡ ይከውን፡ ውዋዔ፨
- ከመ፡ ዕራቅየ፡ ኢይቁም፡ በሐዳስ፡ ትንሣኤ፨