Details
-
- ሰላም፡ ለልደትከ፡ ማእከለ፡ ሮሜ፡ ዐባይ፨
- በቤተ፡ አቡከ፡ ንጉሥ፡ ብዙኀ፡ ዕበይ፨
- ኢያንከረከ፡ ምንተ፡ ዘደኃሪሁ፡ ብካይ፨
- ሑረትከ፡ ሄኖክ፡ ለባሕረ፡ ኤርትራ፡ ቀላይ፨
- ኖታያዊሃ፡ ኮንከ፡ በመርበብት፡ ሠናይ፨
-
- ለምጽአትከ፡ ዝየ፡ እምቤተ፡ አቡከ፡ ቅድመ፨
- ምስለ፡ አኃዊከ፡ ኅሩያን፡ እለ፡ መነኑ፡ ዓለመ፨
- ጸላእክሙ፡ ፍግዐ፡ ወአፍቀርክሙ፡ ሕሰመ፨
- ዘያፈቅር፡ ውሉደ፡ አበ፡ ወእመ፨
- ኢኮነ፡ ምስሌየ፡ ፈቲዎ፡ ዓለመ፨
-
- ሰላም፡ ለዝክረ፡ ስምከ፡ እምነ፡ ብርሃን፡ ጽዱል፨
- ለቀራንብቲከ፡ ሰላም፡ ወለአዕይንቲከ፡ ኵሑል፨
- ቢጸ፡ ቂርቆስ፡ ሄኖክ፡ ወዐርከ፡ ጊዮርጊስ፡ ክሉል፨
- ቅረበኒ፡ ነዓ፡ ለምሕረት፡ ወሣህል፨
- እስመ፡ እምዘመን፡ እኩይ፡ አድኅኖተ፡ ትክል፨
-
- ሰላም፡ ለሐቌከ፡ ኤፉደ፡ መቃርስ፡ ዘዐጠቀ፨
- ወለአቍያጺከ፡ ሰላም፡ እለ፡ ያገንያ፡ ጽፉቀ፨
- ሄኖክ፡ አቡነ፡ እንተ፡ ትከውን፡ መጽድቀ፨
- ሶበ፡ እገይስ፡ ኀቤከ፡ እመ፡ ኢነሣእኩ፡ ወርቀ፨
- በለኒ፡ ሠመርኩ፡ አሐተ፡ ጸሪቀ፨
-
- ሰላም፡ ለግንዘተ፡ ሥጋከ፡ በእደ፡ መላእክት፡ አርጋብ፨
- ወለመቃብሪከ፡ ሰላም፡ ዐጸደ፡ አርዝ፡ ዕጹብ፨
- ሄኖክ፡ አቡየ፡ ከመ፡ ኬንያዊ፡ ጠቢብ፨
- ወእምኔከ፡ ይትፌወሱ፡ ብዙኃን፡ ሕዝብ፨
- ሰዳዴ፡ አጋንንት፡ አንተ፡ በመስቀል፡ ዘዐርብ፨
-
- ሰላም፡ ለቆብዕከ፡ ወለስምዕከ፡ ክልኤቲ፨
- ኅሩየ፡ ኢየሱስ፡ ሄኖክ፡ ምስለ፡ አኃዊሁ፡ ሰብዓቱ፨
- መኒኖሙ፡ መንግሥተ፡ ለክርስቶስ፡ በአፍቅሮቱ፨
- አርዑተ፡ መስቀል፡ ጾሩ፡ ወመካልየ፡ ገድል፡ ኃምስቱ፨
- ወተሠይሙ፡ ካዕበ፡ በአህጉረ፡ ዐሠርቱ፨
-
- ለአብ፡ ወወልድ፡ ወመንፈስ፡ ቅዱስ፡ እንዘ፡ ኣቄርብ፡ ስብሐተ፨
- በከመ፡ ወጠንኩ፡ ቅድመ፡ ወፈጸምኩ፡ ዘንተ፨
- በልብየ፡ ዘሀሎ፡ ሠናየ፡ ተምኔተ፨
- ስብሐተ፡ ጸሎቱ፡ ፈጸምኩ፡ ይኩነኒ፡ ሀብተ፨
- በረከተ፡ አቡየ፡ ሄኖክ፡ ዘይመልእ፡ ቤተ፨