-
- እግዚአብሔር፡ ለስምዕ፡ ዘኀረየኪ፡ እምከርሥ፨
- ውስተ፡ ቤተ፡ መቅደስ፡ ዘቦእኪ፡ በዓመት፡ ሠላስ፨
- ድምያና፡ ልሕቅት፡ በጸጋ፡ መንፈስ፡ ቅዱስ፨
- ይስቅየኒ፡ ጠለ፡ ፍቅርኪ፡ ለምእመንኪ፡ ይቡስ፨
- እስከ፡ እገብር፡ ጽጌ፡ ወፍሬ፡ ዘነፍስ፨
-
- ሰላም፡ ለዝክረ፡ ስምኪ፡ ዘመዐዛሁ፡ ጽጌ፡ ርዳ፨
- ዘይሤኒ፡ ጣዕሙ፡ እምኅብስተ፡ ሰማይ፡ ጸዐዳ፨
- ድምያና፡ ሰማዕት፡ ከመ፡ ጊዮርጊስ፡ ዘልዳ፨
- ናበውእ፡ ለኪ፡ አምኃ፡ ስብሐት፡ ወጋዳ፨
- ምስለ፡ ጠባባት፡ ደናግል፡ በኵሉ፡ ዘንእዳ፨
-
- ሰላም፡ ለመቃብርኪ፡ መካነ፡ ምሕረት፡ ወሣህል፨
- ለዘእምሕማም፡ ድኅኑ፡ በብዙኅ፡ ስኢል፨
- ዘውገ፡ ደናግል፡ ድምያና፡ ክልልተ፡ መንፈስ፡ ወኀይል፨
- ምሕረትኪ፡ ማይ፡ ወስእለትኪ፡ መሐፒል፨
- ያንጽሑነ፡ እምርስሐት፡ በቀል፨
-
- ሰላም፡ እብል፡ ለአእፅምትኪ፡ ኵሎን፨
- እለ፡ አውሐዛ፡ ዕፍረተ፡ ከመ፡ በለሳን፨
- ድምያና፡ ቅብእነ፡ ቅብአ፡ በረከት፡ ወሥን፨
- ወንዒ፡ ዮም፡ ማእከሌነ፡ ትባርክነ፡ በዛኅን፨
- ምስለ፡ ደናግል፡ አርብዓ፡ ዘክርስቶስ፡ መድኅን፨
-
- አምኃ፡ ሰላም፡ ናቀርብ፡ ለደናግል፡ አርብዓ፨
- በእንተ፡ ኢየሱስ፡ ክርስቶስ፡ እለ፡ ኮና፡ ስምዐ፨
- ምስለ፡ ድምያና፡ እሞን፡ ዘተጸውዐ፡ ለመርዓ፨
- ጸውዐነ፡ ከመ፡ ንስተይ፡ ስቴ፡ መድኃኒት፡ ጽዋዐ፨
- ድካመ፡ ዚአነ፡ ከመ፡ ይኩን፡ ጽንዐ፨
-
- ናሁ፡ ዜኖኩ፡ በኅዳጥ፡ ለስብሐትኪ፡ ምሥጢሮ፨
- እስመ፡ አነ፡ ድኩም፡ በትጋህ፡ ወበምህሮ፨
- ድምያና፡ ብፅዕት፡ ለክብረ፡ ዚአኪ፡ አነክሮ፨
- ከመ፡ እጼውዕ፡ ኪያኪ፡ በማሕሌት፡ ወዘምሮ፨
- ለፍቁርኪ፡ ምልእኒ፡ አእምሮ፨
-
- ስብሐት፡ ለአብ፡ ለዘሣረረ፡ ዓለማተ፨
- ወስብሐት፡ ለወልድ፡ ለዘፈጠረ፡ ፍጥረታተ፨
- ወለመንፈስ፡ ቅዱስ፡ ስብሐት፡ ለዘሀገበ፡ ሕይወተ፨
- ከመ፡ እፍረይ፡ ፍሬ፡ ንስሓ፡ አስተብቍዒ፡ ሊተ፨
- ድምያና፡ እንዘ፡ ትብሊ፡ ጽንሕዎ፡ ንስቲተ፨