Details
-
- በስመ፡ እግዚአብሔር፡ ስቡሕ፡ በዝየ፡ ወከሐ፨
- ከመ፡ ይሰባሕ፡ ኀይልከ፡ ዘሕምዘ፡ አርዌ፡ አልስሐ፨
- አፉየ፡ ወጠነ፡ እመ፡ ተፍጻሜቱ፡ አብጽሐ፨
- ስመከኒ፡ ምስለ፡ ስመ፡ ጻድቃን፡ ቶስሐ፨
- እስመ፡ ተሰተፍከ፡ ጊዮርጊስ፡ ኀይሎሙ፡ ብዙኀ፨
-
- ኀይልከ፡ ተለዐለ፡ እምኀይላተ፡ አበው፡ ኵሉ፨
- እምአዳም፡ አቡነ፡ ለትእዛዘ፡ ኦሪት፡ እስከ፡ ጥንተ፡ ቃሉ፨
- ጊዮርጊስ፡ ኢዮብ፡ ዕጉሠ፡ መከራት፡ ዘዘ፡ አምሳሉ፨
- እምወይነ፡ መዐትከ፡ ምሉእ፡ ዘኢይትከዐው፡ ጠሕሉ፨
- አዕይንተ፡ ኃጥእ፡ ፀርየ፡ በሰጊድ፡ የዐሉ፨
-
- ኀይልከ፡ ተበውሐ፡ ከመ፡ ስመ፡ ያስሚ፨
- በጊዜ፡ አንቅዐ፡ ማየ፡ ለአጥምቆተ፡ ሕዝብ፡ ዘአረሚ፨
- ጊዮርጊስ፡ ሙሴ፡ መልአከ፡ እስራኤል፡ ወብንያሚ፨
- ስድድ፡ እምቤትከ፡ በሐብለ፡ ጥብጣቤ፡ ማሕመሚ፨
- ኪያየ፡ ቢጸ፡ በጽሚት፡ ዘይሐሚ፨
-
- በኀይልከ፡ አእመርከ፡ ምሥጢረ፡ ኪሩብ፡ እለ፡ ገጸ፡ ንስር፡ ዘውገ፡ ጌጳ፨
- ጊዜ፡ ተነዝኀ፡ ደምከ፡ ከመ፡ በዕፀ፡ ጽሕድ፡ ወቈጽለ፡ ሆስጳ፨
- ጊዮርጊስ፡ ሕዝቅኤል፡ እምድኅረ፡ ነቢይ፡ ነጋዴ፡ ኢዮጳ፨
- ለነፍሰ፡ ፀርየ፡ ከመ፡ በጽማዌ፡ ትሂጳ፨
- አስተዳሉ፡ አሕፃከ፡ ወምላእ፡ ምጕንጳ፨
-
- ሞአት፡ በኀይልከ፡ ሰይጣን፡ ዐማፄ፨
- ዘአልቦከ፡ ንግሥት፡ ቃለ፡ እንባቆም፡ ገሣጼ፨
- ጊዮርጊስ፡ ዳንኤል፡ መፈክረ፡ አሕላም፡ እንተ፡ ድንጋፄ፨
- ኢትኅድገኒ፡ ትቤለከ፡ ወነጽረኒ፡ በሕዋጼ፨
- እጓለ፡ እመሕያው፡ አኮ፡ ነፍስትየ፡ ዕፄ፨
-
- ኀይልከ፡ አእመነ፡ ልበ፡ ከሓድያን፡ አእላፍ፨
- እንዘ፡ ያጠምቅ፡ በደም፡ ወበጥምቀተ፡ ማይ፡ ዘዘልፍ፨
- ጊዮርጊስ፡ ዮሐንስ፡ ዘተከለልከ፡ በሰይፍ፨
- ዘረገመኒ፡ በኅሊና፡ እንበለ፡ ይክሥት፡ በአፍ፨
- አይድዐኒ፡ ሊተ፡ እስመ፡ አንተ፡ ዖፍ፨
-
- ሱባዔ፡ ሣልስ፡ ዐቅመ፡ ፊደላት፡ ሰባሕኩ፡ በአዝልፎ፨
- ጊዮርጊስ፡ ዐስብየ፡ ሀበኒ፡ እሴፎ፨
- ስምለ፡ ኀይሎሙ፡ ኀይለከ፡ በአስተማስሎ፡ ወአስተሳትፎ፨
- ከመ፡ አብጽሕሰ፡ ለዝክረ፡ ነቢያት፡ ተረፎ፨
- በፊደል፡ ጠዋይ፡ ሐተምኩ፡ መጽሐፎ፨