Details
-
- ሰብዓ፡ ነገሥት፡ ኀበ፡ አንገለጉ፡ በአኅብሮ፨
- ዘከመ፡ ቆምከ፡ ጊዮርጊስ፡ ሃይማኖተ፡ ክርስቶስ፡ በአዝምሮ፨
- ወበከመ፡ ነበርከሂ፡ ሱባዔ፡ ዓመታት፡ በተጽዕሮ፨
- ከመ፡ እጽሐፍ፡ ለኵነኔከ፡ ወለሥቃይከ፡ ነገሮ፨
- ሐታቴ፡ ኅቡእ፡ ምክር፡ ሀበኒ፡ አእምሮ፨
-
- ፅዕለተ፡ ስሙ፡ ቅዱስ፡ ሶበ፡ ለልብከ፡ አኅዘኖ፨
- በመንኖ፡ ኵሉ፡ እስከነ፡ አልባሰ፡ ዘትከድኖ፨
- ክርስቶስሃ፡ ጊዮርጊስ፡ አመ፡ ቆምከ፡ በተአምኆ፨
- ሞገሰ፡ ወርዛዌከ፡ ሶበ፡ ነጸረ፡ ወለላሕየ፡ ገጽከ፡ ሥኖ፨
- መንክረ፡ ወመድምመ፡ ለንጉሥ፡ ኮኖ፨
-
- ሃይማኖተ፡ አበው፡ ኦርቶደክሳዌ፡ አመ፡ ኮንከ፡ ዜናዌ፨
- በዋሕድ፡ ህላዌ፡ ወሥላሴ፡ ግጻዌ፨
- ጊዮርጊስ፡ ሶቤሃ፡ ዐፀደ፡ ሥዋይ፡ ወምንሳዌ፨
- መሠጡከ፡ ወአዕረጉከ፡ ሐራ፡ ዱድያኖስ፡ አርዌ፨
- ከመ፡ በግዕ፡ ዘአልቦ፡ ኖላዌ፨
-
- ቀዊመ፡ ዕርቃንከ፡ በጉባዔ፡ አኅርው፡ ወተቀሥፎትከ፡ በአሥራው፨
- ርእሰ፡ ኃዘን፡ ውእቱ፡ ወጥንተ፡ ሰቆቃው፨
- እጉስ፡ መናስው፡ ጊዮርጊስ፡ በጤገነ፡ ሥቃይ፡ ቅልው፨
- አመ፡ ይመጽእ፡ በስብሐቲሁ፡ እግዚአብሔር፡ ሕያው፨
- ቃውምየ፡ ወቤዛየ፡ ደምከ፡ ክዕው፨
-
- ምስለ፡ ፊቅጦር፡ ወአባዲር፡ ወመርቆሬዎስ፡ ፒሉፓዴር፨
- ወምስለ፡ አኃዊከ፡ ኵሉ፡ ሰማዕታተ፡ ክርስቶስ፡ ፍቁር፨
- ጊዮርጊስ፡ ነዓ፡ ለበዓልከ፡ ክቡር፨
- እንዘ፡ ትሠርር፡ ነዓ፡ በማእከለ፡ ሰማይ፡ ወምድር፨
- በፈረስከ፡ ዘይትለሐይ፡ ከመ፡ ባሕር፨
-
- ተወኪፈከ፡ ጊዮርጊስ፡ አምኃ፡ ጸሎትየ፡ መባዐ፨
- አቅረብኩ፡ ለከ፡ በኍልቈ፡ ሥቃይከ፡ ሰብዓ፨
- ዘኢርእየ፡ ዐይን፡ ወዘእዝነ፡ ሥጋ፡ ኢሰምዐ፨
- ዘባዕጽ፡ ኢየአምሮ፡ እንበለ፡ ብእሲ፡ ዘነሥአ፨
- መጽሐፈ፡ ብርሃን፡ ዕሥየኒ፡ ወመና፡ ኅቡአ፨
- ተረፈ፡ መልክእ፡
-
- ሰላም፡ ለከ፡ አዕፅምቲከ፡ ቅዱስ፨
- በእንተ፡ ሥቃይ፡ መብዕስ፨
- ሐመደ፡ ሥጋከ፡ በደብረ፡ ይድራስ፨
- ዘዘረዎ፡ ምስለ፡ ነፋስ፨
-
- ሰላም፡ ለከ፡ ዕጉሠ፡ ጻማ፡ ወሕማም፨
- እስከ፡ ሱባዔያት፡ አክራም፨
- ከመ፡ ሕገ፡ ዓሣ፡ ጥቡስ፡ ወበሱል፡ በፍሕም፨
-
- ሰላም፡ ለከ፡ ገድልከ፡ መንክር፨
- ወሥቃይከ፡ መሪር፨
- ከመ፡ ግዕዘ፡ ኃሠር፡ ጥዑል፡ ወደባሰ፡ ምድር፨
- ዝርወ፡ አባል፡ መልዕልተ፡ ደብር፨
-
- ሰላም፡ ለከ፡ ሥቃየ፡ ተሰብሮ፨
- ወበልጓመ፡ ፈረስ፡ ትጽዕሮ፨
- ኢያኅደግከ፡ ለክርስቶስ፡ ፍቅሮ፨
- ጊዮርጊስ፡ ብእሴ፡ አእምሮ፨