Details
-
- ኦማርያም፡ እሰግድ፡ ለኪ፡ ወእዌድሰኪ፨
- ካዕበ፡ እንዘ፡ እስእል፡ ኀቤኪ፨
- ትክሥቲ፡ ሊተ፡ ውዳሴሁ፡ ለሠረቀ፡ ብርሃን፡ ገብርኪ፨
- ለዘተሐጥአ፡ እምጠቢባን፡ በሥምረተ፡ ክርስቶስ፡ ወልድኪ፨
- እስመ፡ ዚአየ፡ አንቲ፡ ወአነ፡ ዘለኪ፨
-
- ጐሥዐ፡ ልብየ፡ ቃለ፡ ሠናየ፨
- ወውዳሴከ፡ ብዙኀ፡ ይነግር፡ አፉየ፨
- ሠረቀ፡ ብርሃን፡ ትቀስም፡ ፍሬ፡ ማሕሌትየ፨
- እንበለ፡ ጐንድዮ፡ ነዓ፡ ኀቤየ፨
- እስመ፡ ምጽአትከ፡ ይሴፎ፡ ዐይንየ፨
-
- ሰላም፡ ለዝክረ፡ ስምከ፡ ስቡሕ፡ ወውዱስ፨
- ወለሥዕርትከ፡ ኍሉቅ፡ ውስተ፡ ልበ፡ ጥበብ፡ ክርስቶስ፨
- ሠረቀ፡ ብርሃን፡ አእኳቲ፡ እንዘ፡ ዐቀምከ፡ ንኡስ፨"
- አንከረ፡ ወተደመ፡ በትረ፡ ማርያም፡ እንጦንስ፨
- ሶበ፡ ርእየከ፡ በደማን፡ በዐቢይ፡ ሞገስ፨
-
- ሰላም፡ ለርእስከ፡ ወለገጽከ፡ አምሳሉ፨
- ለእግዚአብሔር፡ ሕያው፡ ዘሀሎ፡ ወይሄሉ፨
- ሠረቀ፡ ብርሃን፡ ብፁዕ፡ ወእኩት፡ በአፈ፡ ኵሉ፨
- ዘፈኖከ፡ መንፈቀ፡ ዓሣ፡ መስፈልተ፡ እንግዳ፡ ዘይደሉ፨
- በኀበ፡ ክልኤ፡ ተረክበ፡ በፍጹም፡ አካሉ፨
-
- ሰላም፡ ለአእዳዊከ፡ ዘፀጋም፡ ወየማን፨
- መስተፅዕነ፡ ቀሊል፡ ደመና፡ ሠረቀ፡ ብርሃን፨
- ሶበ፡ ነጸረከ፡ ይቤ፡ በትረ፡ ማርያም፡ ምእመን፨
- ለከኑ፡ ፍቁርየ፡ እንዘ፡ በኀበ፡ ሰብእ፡ ምኑን፨
- እሊዐከ፡ ትሕትና፡ ኀበዝ፡ መጠን፨
-
- ሰላም፡ ለልብከ፡ ወለኵልያቲከ፡ ምስለ፡ ኅሊና፨
- ለአማዑቲከ፡ ዓዲ፡ ወለንዋየ፡ ውስጥከ፡ በዕሪና፨
- ሠረቀ፡ ብርሃን፡ ዮሴፍ፡ ምእመነ፡ ማርያም፡ ወለተ፡ ሐና፨
- ዘተሳተፍከ፡ ስደታ፡ ወኵሎ፡ ኀዘና፨
- እስመ፡ አንተ፡ ውስተ፡ ቤት፡ ወአንተ፡ በፍና፨
-
- ሰላም፡ ሰላም፡ ለግንዘተ፡ ሥጋከ፡ እብሎ፨
- ለመቃብሪከ፡ እሙር፡ ውስተ፡ ሐይቀ፡ ክብራ፡ ዘሀሎ፨
- ሠረቀ፡ ብርሃን፡ አሥርቅ፡ ለረድኤትከ፡ ጸዳሎ፨
- ለልብየ፡ ደብተራ፡ ጌጋይ፡ እስመ፡ ጊሜ፡ ጽልመት፡ ጠብለሎ፨
- ወሰይጣነ፡ ውዴት፡ ጸሐፈ፡ ምግባርየ፡ ኵሎ፨
-
- ሠረቀ፡ ብርሃን፡ ተወከፍ፡ እምኔየ፡ ዘወደስኩከ፡ ተውዳሰ፨
- ቅብአ፡ ኃጥአን፡ ኢትበል፡ ኢይትቀባእ፡ አንሰ፨
- ክርስቶስ፡ አኮኑ፡ ሥጋ፡ ኃጥኣን፡ ዘለብሰ፨
- ወበማይ፡ ዘውሕዘ፡ እምገቦሁ፡ ኀጢአቶሙ፡ ደምሰሰ፨
- ወተከለ፡ ሎሙ፡ ደብታራ፡ ሐዳሰ፨