Details
-
- ሰላም፡ ሰላም፡ እምብዙኅ፡ በውሑድ፨
- ለዝክረ፡ ስምክሙ፡ ንብል፡ በገቢረ፡ በዓል፡ ውሉድ፨
- በትረ፡ ጊዮርጊስ፡ ሐዋርያ፡ ወስምዖን፡ ዘዐምድ፨
- በትረ፡ ተራድኦ፡ እምሁከተ፡ ዘመን፡ ክቡድ፨
- ለዐቂቦትነ፡ አኃዙ፡ በእድ፨
-
- ሰላም፡ ለሥዕርትክሙ፡ ሐመልማለ፡ ርእስ፡ ገዳም፨
- ወበበ፡ ርእስክሙ፡ እብል፡ ለርእስክሙ፡ ሰላም፨
- በትረ፡ ጊዮርጊስ፡ ወስምዖን፡ በዘትመጽእ፡ ዓለም፨
- እምገድልከ፡ ጻማ፡ ተሰዶ፡ ወምግባርከ፡ ቀዊም፨
- አስተሳትፉኒ፡ ለብእሲ፡ ድኩም፨
-
- ሰላም፡ ለገጽክሙ፡ ሥነ፡ ጸጋሁ፡ ዘተሰብሐ፨
- ለቀራንብቲክሙኒ፡ አንብዓ፡ ስእለታት፡ ዘነዝኃ፨
- በትረ፡ ዮርጊስ፡ ወስምዖን፡ ዜንዉኒ፡ ዜና፡ ፍሥሐ፨
- ሰይጣንሰ፡ ኢይንግረኒ፡ ዜናሃ፨
- በከመ፡ ስሙ፡ ለሐሰት፡ አቡሃ፨
-
- ሰላም፡ እብል፡ ለመልክኣቲክሙ፡ ሠናያነ፨
- ፀአተ፡ ንፍስክሙኒ፡ በመዋዕለ፡ ጾም፡ ዘኮነ፨
- በትረ፡ ጊዮርጊስ፡ ወስምዖን፡ ከመ፡ ንትካየድ፡ ኪዳነ፨
- ኀቤየ፡ ንዑ፡ በትሕትና፡ ምስለ፡ ማርያም፡ እምነ፨
- እስመ፡ ኢተክህለኒ፡ እምጻእ፡ ኀቤክሙ፡ አነ፨
-
- ሰላም፡ ለበድነ፡ ሥጋክሙ፡ ወግንዘትክሙ፡ በክብር፨
- ለመቃብሪክሙኒ፡ ነቅዐ፡ ማየ፡ ሕይወት፡ መንክር፨
- አርአያ፡ ትሩፋት፡ ስምዖን፡ ወበትረ፡ ጊዮርጊስ፡ መምህር፨
- ዘኢወፅአ፡ እምቃልክሙ፡ በውስተ፡ ኵሉ፡ ብሔር፨
- ነቢብ፡ አልቦ፡ ወአልቦ፡ ነገር፨
-
- ነሢአክሙ፡ ሰላመ፡ አምኃ፡ ማሕሌትየ፡ ዝንቱ፨
- ዘበኃምስቱ፡ ይትፈቀድ፡ መጠነ፡ ጊዜያት፡ ኃምስቱ፨
- በትረ፡ ጊዮርጊስ፡ ወስምዖን፡ ለበረከትክሙ፡ መክፈልተ፡ ሀብቱ፨
- ጸግዉኒ፡ አስበ፡ ጻማየ፡ በዓለመ፡ ነገሥት፡ ሠለስቱ፨
- ወአግብኦ፡ ፍዳ፡ እምጥንት፡ ለጻድቅ፡ ሥርዓቱ፨