Bibliography
Z
Marrassini, Paolo. “Il Gadla Alāniqos.” Egitto e Vicino Oriente 5 (1982): 143–82.
-
- በዋሕድናከ፡ አምላክ፡ ወትሥልትከ፡ ሥላሴ፨
- እምአፈ፡ መላእክት፡ ወሰብእ፡ ዘተሴሰይከ፡ እክለ፡ ቅዳሴ፨
- ለተጠምቀ፡ መድኅን፡ ዘኬደ፡ አቃርብተ፡ ሐቅል፡ ወከይሴ፨
- አብሐኒ፡ እንግር፡ በከመ፡ ነገረ፡ ሙሴ፨
- ለካህን፡ አሮን፡ ወምእመን፡ አውሴ፨
-
- ሰላም፡ ለዝክረ፡ ስምከ፡ ከመ፡ ዝክረ፡ ስሙ፡ ሠናይ፨
- ለመምህር፡ ጴጥሮስ፡ መስተስርየ፡ ኵሉ፡ ጌጋይ፨
- ተጠምቀ፡ መድኅን፡ ወልዱ፡ ለአላኒቆስ፡ ኅሩይ፨
- ሕፅበኒ፡ እምርስሐትየ፡ በማየ፡ ንስሓ፡ ጽሩይ፨
- አምጣነ፡ ንስሓ፡ ይኄይስ፡ እምብዙኅ፡ ንዋይ፨
-
- ሰላም፡ ለሥዕርተ፡ ርእስከ፡ ወለርእስከ፡ ዘተከለለ፨
- አክሊለ፡ እንጦንዮስ፡ ቆብዕ፡ መንገለ፡ ጾርከ፡ መስቀለ፨
- ተጠምቀ፡ መድኅን፡ ባሕታዊ፡ አመ፡ አስተርአይከ፡ ገድለ፨
- ሀነጹ፡ ለከ፡ ሥላሴ፡ ሰማያዊተ፡ መርጡለ፨
- እምሐሩረ፡ መርቄ፡ ፀሓይ፡ ትኩንከ፡ ምጽላለ፨
-
- ሰላም፡ ለገጽከ፡ ገጸ፡ አዶናይ፡ ስቡሕ፨
- ወለቀራንብቲከ፡ ሰላም፡ ቀራንብተ፡ ሙሴ፡ መካሕ፨
- ተጠምቀ፡ መድኅን፡ ጻድቅ፡ አረጋይ፡ ኖኅ፨
- ኅብአኒ፡ ውስተ፡ ታቦት፡ ዘመስኳት፡ አይኅ፨
- እስከነ፡ ይኃልፍ፡ በንስቲት፡ አውራኅ፨
-
- ሰላም፡ ለአዕይንቲከ፡ እለ፡ ነጸራ፡ ነጽሮ፨
- ወለአእዛኒከ፡ እለ፡ አጽምአ፡ ዘቃለ፡ ወንጌል፡ ፈክሮ፨
- ተጠምቀ፡ መድኅን፡ ኤልያስ፡ እስመ፡ አንተ፡ ብእሲ፡ አእምሮ፨
- መሥዕተ፡ ቀኖና፡ ኀበ፡ አሥመርከ፡ አሥምሮ፨
- ገፋዒ፡ አክዐብ፡ አንከረ፡ አንክሮ፨
-
- ሰላም፡ እብል፡ ለመላትሒከ፡ ቀይሓት፨
- ወለአእናፊከ፡ ዘኢያጼነዋ፡ ዕንጐታተ፡ ሐዲስ፡ ገነት፨
- ተጠምቀ፡ መድኅን፡ ሰሎሞን፡ ሕፃነ፡ አላኒቆስ፡ ዳዊት፨
- ጸግዎ፡ ለሰብእናከ፡ መንግሥተ፡ አቡሁ፡ ማኅሌት፨
- ኬልቲ፡ ወፌልቲ፡ ንጹሓን፡ ካህናት፨
-
- ሰላም፡ ለግንዘተ፡ ሥጋከ፡ በእደ፡ ኅሩያን፡ አበው፨
- ወለመቃብሪከ፡ ሰላም፡ መቃብረ፡ ሙሴ፡ ናባው፨
- ተጠምቀ፡ መድኅን፡ ሮማን፡ ዘመዐዛከ፡ ቅድው፨
- ባርኮሙ፡ ለደቂቅከ፡ እለ፡ ውስተ፡ ገዳም፡ ወበድው፨
- በቃሉ፡ ዘባረከከ፡ ፈጣሪ፡ ሕያው፨
-
- ናሁ፡ ፈጸምኩ፡ ነገረ፡ መልክእከ፡ ሐዲስ፨
- አስተዋዲድየ፡ ቃለ፡ በኍልቈ፡ ዕለታት፡ ሥላስ፨
- ተጠምቀ፡ መድኅን፡ በኵሉ፡ ወበኀበ፡ ኵሉ፡ ውዱስ፨
- ተወከፍ፡ ቃለ፡ አፉየ፡ አምጣነ፡ ብከ፡ ሞገስ፨
- በቅድመ፡ ማርያም፡ ድንግል፡ ወወልዳ፡ ክርስቶስ፨