Details
-
- እግዚአብሔር፡ ሕያው፡ ቅድመ፡ ይትፈጠር፡ ዓለም፨
- እንተ፡ ነበርከ፡ በትሥልስት፡ ወተዋሕዶ፡ ፍጹም፨
- ነገረ፡ ገድሉ፡ ለሙሴ፡ መትልወ፡ ሙሴ፡ ሥዩም፨
- ከመ፡ እንብብ፡ በቅድመ፡ እሉ፡ ካህናተ፡ ብዙኅ፡ ሰላም፨
- ዘንተ፡ ጥበበከ፡ ጸግወኒ፡ ዮም፨
-
- ሰላም፡ ለዝክረ፡ ስምከ፡ ዘቦቱ፡ ተልዕሎ፨
- ወለሥዕርትከ፡ ሰላም፡ ዘቅብአ፡ ትሕትና፡ አጥለሎ፨
- እንዘ፡ ኢትናፍቅ፡ ሙሴ፡ ወታበዝኅ፡ ተወክሎ፨
- ጸሊ፡ ኀበ፡ አምላክ፡ እምቅድመ፡ ዓለማት፡ ዘሀሎ፨
- የሀበነ፡ ለሕዝብከ፡ ምሕረቶ፡ ወሣህሎ፨
-
- ሰላም፡ ለትንሣኤከ፡ አመ፡ ምጽአተ፡ ወልድ፡ እግዚእ፨
- በግርማ፡ መለኮት፡ መፍርህ፡ ለኰንኖ፡ ኵሉ፡ ኃጥእ፨
- ሙሴ፡ ርኁብ፡ እምገቢረ፡ እከይ፡ መብልዕ፨
- ዘትመስል፡ ሕንጻ፡ ዚአከ፡ ሕንጻ፡ ሰሎሞን፡ ብፁዕ፨
- ይመጽኡ፡ ለነጽሮ፡ ብዙኃን፡ ሰብእ፨
-
- ምእመናነ፡ ዝንቱ፡ ቤትከ፡ እምነ፡ ብዙኅ፡ ተሐጕሎ፨
- ረአይ፡ ዘልፈ፡ በጽፍቅ፡ ወተሣህሎ፨
- እስመ፡ ለከ፡ ሙሴ፡ እንተ፡ ኢተአምር፡ ተበቅሎ፨
- ሤመከ፡ መንፈስ፡ ወአልዐለከ፡ አልዕሎ፨
- ከመ፡ ትርአይ፡ በጽፍቅከ፡ ምእመናነ፡ ኵሎ፨
-
- ስብሐታተ፡ ዝንቱ፡ ስምከ፡ ፍዳ፡ ነበብኩ፡ ይእዜ፨
- በትረ፡ ህላዌ፡ ፍቅርከ፡ እንዘ፡ እከውን፡ አኃዜ፨
- አቡየ፡ ሙሴ፡ በየማንከ፡ አዛዜ፨
- አንሥአኒ፡ ሊተ፡ እምድቀትየ፡ ትካዜ፨
- እስመ፡ ለወልድከ፡ ሊተ፡ ኀደገኒ፡ ጊዜ፨