-
- ሰላም፡ ለፅንሰትከ፡ ሠናይ፡ ወአዳም፨
- ወለልደትከ፡ ዓዲ፡ እማሕፀነ፡ ቡርክት፡ እም፨
- በኵረ፡ ጳጳሳት፡ ዮሐንስ፡ በምግባረ፡ ሠናይ፡ ፍጹም፨
- ከመ፡ እንግር፡ ውዳሴከ፡ በልሳንየ፡ ድኩም፨
- ለገብርከ፡ እግዚእየ፡ አብሐኒ፡ ዮም፨
-
- ሰላም፡ ለዝክረ፡ ስምከ፡ ተጸውዐ፡ ዘቀደመ፨
- በኀበ፡ ሊቃውንት፡ ቀድመ፡ ወበጳጳሳት፡ ዳግመ፨
- ጥዑመ፡ ልሳን፡ ዮሐንስ፡ እንተ፡ ትስብክ፡ ሰላመ፨
- ተማሕፀነ፡ በሥልጣንከ፡ ከመ፡ ኢይርክብ፡ ኅሡመ፨
- ልቡና፡ ዐዋዲ፡ ረድእከ፡ በከንቱ፡ ዘደክመ፨
-
- ሰላም፡ ለመላትሒከ፡ በማየ፡ አንብዕ፡ እለ፡ ተሐጽባ፨
- ለኢትዮጵያ፡ እምከ፡ እስከ፡ የኀልፍ፡ ዕጸባ፨
- ንጹሐ፡ ተፈጥሮ፡ ዮሐንስ፡ ለቤተ፡ ክርስቲያን፡ ርግባ፨
- ሶበኒ፡ በጸሎትከ፡ ግዕዛነ፡ ፄዋ፡ ረከባ፨
- ለንጉሠ፡ ነገሥት፡ ኀይለ፡ ሥላሴ፡ አምኃ፡ አቅረባ፨
-
- ሰላም፡ ለአእጋሪከ፡ ምስለ፡ ሰኻንው፡ እለ፡ ጌሣ፨
- ውስተ፡ ቤተ፡ መቅደስ፡ ዐባይ፡ በጊዜ፡ ጸሎት፡ ወኀሠሣ፨
- ጽጌ፡ ተዋሕዶ፡ ዮሐንስ፡ ለምድረ፡ ትግሬ፡ ሞገሳ፨
- በአማን፡ መንፈስ፡ ቅዱስ፡ በእደዊሁ፡ ቀደሳ፨
- ለዘጾረት፡ እም፡ ኪያከ፡ በከርሣ፨
-
- ሰላም፡ እብል፡ ለመከየደ፡ እግርከ፡ በዘምሮ፨
- ለብፁዐ፡ አምላክ፡ አቡከ፡ እለ፡ ዴገና፡ አሠሮ፨
- ዕንቈ፡ ጵጵስና፡ ዮሐንስ፡ ለብርሃነ፡ ፀሓይ፡ ዘትትጋወሮ፨
- ጸሎተከ፡ ወስእለተከ፡ ወልታ፡ መድኃኒት፡ ገቢሮ፨
- ንጉሠ፡ ነገሥት፡ ሞአ፡ ወአግረረ፡ ፀሮ፨
-
- ሰላም፡ ለመልክእከ፡ ዘአርአያሁ፡ ሐዋዝ፨
- ዘአስተዋደደ፡ አምላክ፡ በትርሢተ፡ ሥጋ፡ ዐዚዝ፨
- ዐጽቀ፡ ቤተ፡ ክህነት፡ ዮሐንስ፡ ወዘቤተ፡ መንግሥት፡ ዐርዝ፨
- ይቅብአኒ፡ ቅድስናከ፡ እምቅብአ፡ በረከት፡ ምዑዝ፨
- ከመ፡ በኵለሄ፡ ይትፈቀር፡ ዘዚአየ፡ ግዕዝ፨
-
- ሰላም፡ ለመልክእከ፡ ለመልክአ፡ ክርስቶስ፡ አምሳሊሁ፨
- እንዘ፡ እዴሁ፡ ይትሐጸብ፡ እስመ፡ ፈጠሮ፡ ለሊሁ፨
- ረዳኤ፡ ምንዱባን፡ ዮሐንስ፡ ለገብረ፡ ሥላሴ፡ ተስፋሁ፨
- አስምዐኒ፡ ቃለ፡ ዚአከ፡ ዘያስተፌሥሕ፡ ዜናሁ፨
- ልቡና፡ ሰማዒት፡ ሥጋየ፡ ዘቆመት፡ ቅድሜሁ፨
-
- አምኃ፡ ሰላም፡ አቅረብኩ፡ ለመልክእከ፡ በልሳንየ፡ ድክምት፨
- አኮ፡ በአእምሮ፡ እንበለ፡ ዳዕሙ፡ በድፍረት፨
- ተወከፈኒ፡ ሊቅየ፡ ዮሐንስ፡ ዘውገ፡ ኀይላት፨
- ከመ፡ ሠምረ፡ ወተወክፈ፡ ጸሪቀ፡ አሐቲ፡ ብእሲት፨
- እግዚአብሔር፡ አምላክከ፡ አቡሃ፡ ለምሕረት፨