Details
-
- በስመ፡ አብ፡ ወወልድ፡ ወመንፈስ፡ ቅዱስ፡ በኀይል፨
- እለ፡ ኅቡራን፡ እሙንቱ፡ ሊሉያነ፡ ግጽው፡ አካል፨
- ተፈጥሮተ፡ አዳም፡ እጽሕፍ፡ ወሥነ፡ መልክዑ፡ ሥዑል፨
- ባርኪ፡ ሊተ፡ ባሕቱ፡ በበረከተ፡ እድ፡ ወቃል፨
- ንግሥተ፡ ሰማያት፡ ወምድር፡ ማርያም፡ ድንግል፨
-
- ሰላም፡ ለተፈጥሮትከ፡ እምባሕርየ፡ ግብራት፡ አርባዕቱ፨
- ዘኢይትረአይ፡ አሐዱ፡ ወዘይትረአዩ፡ ሠለስቱ፨
- በግእዘ፡ እንስሳ፡ አዳም፡ ከመ፡ ኢትሙት፡ በከንቱ፨
- ላዕሌከ፡ ነፍሐ፡ ፈጣሪ፡ ዘእምቅድመ፡ ዓለም፡ መንግሥቱ፨
- መንፈሰ፡ ሕይወት፡ ዘተሐዩ፡ ቦቱ፨
-
- ሰላም፡ ለተፈጥሮትከ፡ ክቡረ፡ ጽዋዔ፡ እምኵሉ፨
- ለእግዚአብሔር፡ አምላክ፡ እስመ፡ ውእቱ፡ አምሳሉ፨
- መልአከ፡ ፍጥረታት፡ አዳም፡ እለ፡ በታሕቱ፡ ወላዕሉ፨
- በጽሑፍ፡ ተፈጥሮትከ፡ ውዳሴ፡ መልክዕከ፡ አትሉ፨
- ተራድኦትየ፡ ሥመር፡ ወምስሌየ፡ ሀሉ፨
-
- ሰላም፡ ለተፈጥሮትከ፡ በአርአያ፡ አምላክ፡ ዘኮነ፨
- እምድኅረ፡ ይቤ፡ ለሊሁ፡ እግዚአብሔር፡ አነ፨
- ወልደ፡ ጠባዕያት፡ አዳም፡ እንተ፡ ወለድከ፡ ኪያነ፨
- እመ፡ ኢተፈጠርከሰ፡ በአርአያ፡ አምላክ፡ እሙነ፨
- አምሳለ፡ እንስሳ፡ ግእዝከ፡ እምኀጥአ፡ ግእዛነ፨
-
- ሰላም፡ ለዝክረ፡ ስምከ፡ ወለሥዕርትከ፡ ዘከብረ፨
- እምፀምረ፡ መስፍን፡ ጌዴዎን፡ ዘአቅርንተ፡ አፅራር፡ ሰበረ፨
- ንጉሠ፡ ፍጥረታት፡ አዳም፡ ዘምልክናከ፡ ተነግረ፨
- ውዳሴከ፡ እንብብ፡ እግዚኦ፡ ኀበ፡ ልበ፡ አምላክ፡ ሠምረ፨
- ምስለ፡ ዐፅመ፡ ገቦከ፡ ሔዋን፡ ሐውጸኒ፡ ወትረ፨
-
- ሰላም፡ ለመቃብሪከ፡ በከመ፡ ተብህለ፡ ወተነግረ፨
- በዐተ፡ መዛግብት፡ ቅድመ፡ ወኢየሩሳሌም፡ ድኅረ፨
- እምግብርናተ፡ ሞት፡ አዳም፡ አመ፡ ቤዝዎትከ፡ ሠምረ፨
- በህላዌ፡ ግቡር፡ ሥጋከ፡ ኮነ፡ ገብረ፨
- እግዚአብሔር፡ ንጉሥ፡ ዘይነግሥ፡ ወትረ፨
-
- እንዘ፡ ዲበ፡ መስቀል፡ በሥጋ፡ ርደተ፡ መለኮት፡ በነፍስ፨
- ውስተ፡ ነደ፡ እሳት፡ መፍርህ፡ በዕለተ፡ መስቀል፡ ቅዱስ፨
- መንገለ፡ ተደለወ፡ ለከ፡ ሀገረ፡ ብርሃን፡ ሐዲስ፨
- ኪያከ፡ ያወፅእ፡ አኮኑ፡ አዳም፡ ንጉሥ፨
- ወሰራዊትከ፡ እምሲኦል፡ መብእስ፨
-
- እምኀበ፡ ዘሎቱ፡ አምላክ፡ ተድላ፡ ሰማያዊ፡ መንክር፨
- ወኵለንታ፡ ዓለም፡ ካዕበ፡ መከየደ፡ እግር፨
- ዕሥየኒ፡ አዳም፡ ዕሤተ፡ ስብሐት፡ ወክብር፨
- ግብረ፡ ውዳሴከ፡ እስመ፡ ፈጸምኩ፡ በግብር፨
- ምስለ፡ እለ፡ ኪያከ፡ አበ፡ ጸውዑ፡ በምድር፨